Read lunyore 2 AKETSINYINGA 31 Bible Online

2 AKETSINYINGA 31 - lunyore bible

2 AKETSINYINGA 31

¹Olwa bali nibamal'le lisabo, abandu bosi ba Isiraeli batsia mu buli litookho mu Yuda nibasasaka etsisiilo tsiamachina, nibaremaka ebifwanani biosi ebia nyasaye mukhasi olangwa Ashera, ma khandi nibasambula tsisambwa, khandi nibalibul'la habundu hosi hokhwekayakayila abanyasaye abacheni. Bakhola mbwo khubandu bandi bosi mu Yuda kata ne mutsisoma tsiosi etsia Benjameni, Efuraimu nende Manase; ma nibakalukha mutsingo tsiabwe.

²Omuruchi Hesekia yakalusiaho obuloosie bwemilimo chiabesaalisi nende Abalawi ne buli mundu yalinji nende omulimo omuchoomekhe okwa yakholanga. Mumilimo yichi khwalimwo nende okhuhaana emisango emisambe, emisango chiobuhambani, okhusanga mubwekayakayi bwomuhekalu khandi okhwitsoomia nende okhukhupa embwo khubindu ebiabukhan'ne Muhekalu.

³Okhurula musiayo sisie siamakondi netsimbusi, nende esietsingombe yahaana emiruko khulwe emisango chiokhusambwa buli mukamba namukolooba nende yichio echihanwa litukhu lie Sabato nende Mwisabo lio Mwesi omutoro, halala nende amasabo kandi akenyekhanga kakholwe singa kahandiikwa mu Malako ko MWAMI.

⁴Okhumeeta khu yako, omuruchi yabool'la abandu ba Yerusalemu okhuleera ebihanwa ebiahuchil'lwa okhuleer'ra abesaalisi nende Abalawi kho babe abanyala okhuhaana obweyangu bwabwe bwosi khu kenyekhanga kosi khu Malako ko MWAMI.

⁵Khubwangu bwe lilako yilio liali niliakhahanwa, Abaisiraeli baleera ebihanwa ebisiyikhu ebiobuswache, ewaini, amafura komuseituni obuukhi nende ebindu bindi ebicheswanga mumikunda, khandi baleera esielikhumi sie bindu biosi ebia balin'nabio.

⁶Abandu ba Isiraeli nende Yuda bosi abamenya mumataala ka Yuda baleera esielikhumi khutsing'ombe tsiabwe nende amakondi kabwe, khandi baleera ebihanwa bindi ebinji ebiabahaana khu MWAMI Nyasaye wabwe.

⁷Bachiaka okhuleera ebihanwa mumwesi kwakhataru ma nibitsilil'la okhubunjikhwa khumiesi chine echialondakhwo.

⁸Olwa omuruchi Hesekia nende abakhulundu baabe balola ebindu biali nibihaanilwe, bafumia OMWAMI khandi nibafumia abandu ba Isiraeli.

⁹Omuruchi yal'loma khubesaalisi nende Abalawi khukebihanwa biene yibi,

¹⁰ne Asaria Omwesaalisi Omukhongo owolwibulo lwa Sadoku nabool'la omuruchi mbu “Okhurula abandu nibachaaka okhuleera ebihanwa mu Hekalu, khwabeye nebiakhulia ebikhuhela okhulia kata nende ebinji ebisikalanga, khuli nende yibi biosi sichila OMWAMI walaamila abandu baabe tsikhabi.”

¹¹Omuruchi Hesekia yahaana lilako mbu ebikoti biokhubiikhamwo ebindu bilombwe mu Hekalu yo MWAMI, ne yako kakholwa,

¹²ma nibara ebihanwa biosi nende ebie sielikhumi mubikoti yibio khulwo okhubiikhwa bulahi. Biarebwa mumakhono ko Mulawi olangwa Kanania okhubilinda, ne nibamwel'la amwabo Shimei okhuba omukhonyel'liwe.

¹³Abalawi likhumi belwa okhutiiya hasi wabwe, bali Yehieli, Asasia, Natsani, Asaheli, Yerimotsi, Yosabadi, Elieli, Isimachiahi, Mahatsi nende Benaya. Yaka kosi kakholwa mubunyali bwo Muruchi Hesekia nende Asaria Omwesaalisi Omukhongo.

¹⁴Kore omusiani wa Imuna, Omulawi owali omulindi omukali mu Silibwa sielubeka webukwe lwe Hekalu niye owasinjil'la okhubukula ebihanwa ebiahanwanga khu MWAMI khandi khulwokhubikabula.

¹⁵Mumataala kandi ahabesaalisi bamenyanga, yakhonyel'lwa mubusubilwa nende Abalawi bandi nabo ni Edeni, Miniamini, Yeshwa, Shemaya, Amaria nende Shekania. Bakabula ebiakhulia okhuhelana khu Abalawi basiabwe okhulondokhana singa obwemilimo chiabwe chiali,

¹⁶tawe okhulondokhana nebilibwa biabwe. Bahaana esitonye khubuli musaatsa wosi oli nemihika amakhumi kataru nende abali nomulimo kwabakholanga mu Hekalu bulitukhu okwali mubwabukhani mumikhoosi chiabwe.

¹⁷Abalawi bakabul'lwa emilimo chiabwe okhulondokhana nebilibwa biabwe ne Abalawi bemihika amakhumi kabili nohomba okhuyombiakhwo bahebwa emilimo chiabwe mumikanda.

¹⁸Bosi bali okhuhandikwa amera halala nabakhasi babwe, abaana babwe, nende abamenyani babwe sichila benyekhanga berechekhe inyinga yosi khulwo okhukhola emilimo emichienukhu.

¹⁹Balala khubesaalisi abamenyanga mumataala akahebwa abolwibulo lwa Haruni nohomba abamenyanga mubwayilo bwemiruko chiamataala kene yaka, khwali nende abandu boluyali abakabulanga ebiakhulia khubandu bes'saatsa bosi abe tsinyumba tsiabesaalisi nende khubuli mundu wosi owahandikwa mumera kebilibwa bia Balawi.

²⁰Musibala siosi esia Yuda Omuruchi Hesekia yakhola akali akabwene khandi akayanzisianga OMWAMI Nyasaye uwe.

²¹Akayakhola kali amalahi sichila buli sindu siosi esia yakhola khu Hekalu nohomba khulwokhulonda Amalako, yakhola nomwoyokwe kwosi mubusubilwa nende okhuyanza Nyasaye uwe.