Read lunyore 2 AKETSINYINGA 32 Bible Online

2 AKETSINYINGA 32 - lunyore bible

2 AKETSINYINGA 32

¹Olunyumakhwo, olwomuruchi Hesekia yali namal'le okhurumikhila OMWAMI mubusubilwa, Senakeribu, omuruchi wa Asiria yetsa okhuseera Yuda. Yafumbila amataala akombokhwakhwo tsiminga ma nahaana amalako mbu abasikari baabe bafunake amasisi.

²Olwa Hesekia yalola mbu Senakeribu yali niyetsele ma nali nelipaalo liokhulwana Yerusalemu,

³yamala nareeba abakhulundu baabe nende abemeli babasikari mbu yekale ebitaho biamaatsi ebili esioba welitookho ne bamala nibamukhonya.

⁴Omukanda omukali kwabandu kwebunjikha ma nibekala ebitaho nende omuchela okwabir'ranga mumikunda. Bareeba mbu, “Busina omuruchi wa Asiria yetse okhunyoola amaatsi amenji?”

⁵Omuruchi Yamala natiya butinyu okhulomba hamasisi kafunikha khandi niyombokhakhwo eminaara, khandi niyombokha lisisi lindi esioba oweyilio eliabalombanga. Okhumeetakhwo yameeta khulomba amatubango akali nikayabwa okhusinga emikunda khulwokhuhiniamwo amaloba elubeka webukwe ikulu welitookho lia Yerusalemu. Khandi yalomba amafumo amenji nende ebikhumba ebinji.

⁶Abasaatsa bosi bomwitookho barebwa hasi hobulindi bwabasikari, abakhongo ma nabalaka bosi bebunjikhe habundu halamu ahembi nesilibwa sielitookho. Ma nababool'la mbu,

⁷“Mube nesinani khandi nobusubili ne murabba abari khumuruchi wa Asiria tawe nohomba abasikari bayemel'langa tawe. Khuli netsingufu tsinyinji elubeka wefwe okhuyomba elubeka uwe.

⁸Ye ali netsingufu tsiabandu ne ifwe khuli netsingufu tsio MWAMI Nyasaye wefwe khulwa okhukhukhonya okhulwana lihe liefwe.” Abandu bali okhutinyilisibwa nende amang'ana ko MWAMI.

⁹Olunyumakhwo Senakeribu nende abasikari baabe nibasili Lakishi, yaruma amang'ana kano khu Hesekia nende abandu ba Yuda abali nibali nende Hesekia mu Yerusalemu:

¹⁰“Ise, Senakeribu omuruchi wa Asiria, reebanga nisina esimuhetsanga inywe olutswoni okhutsilil'la okhuba mu Yerusalemu elifumbiywe namahe kanje.

¹¹Hesekia amubool'langa mbu OMWAMI Nyasaye alamuhonokosia okhurula mumakhono kefwe, nebutswa amukaatanga inywe ma nalekhe inywe okhufwa khulwe inzala nende obuluho.

¹²Niye owali okhwononia ebiniini bio MWAMI halala netsisambwa ma nabool'la abandu ba Yuda nende Yerusalemu okhwekayakaya nende okhusambwa obwali khulusambwa l'lala lwonyene.

¹³Inywe simumanyilisianga akabakuka banje bakhola khubandu beb'bala bindi tawe? Mbula abanyasaye beb'bala bindi bahonia abandu babwe okhurula khumuruchi wa Asiria noho?

¹⁴Nilina olwa mulala khubanyasaye beb'bala yibio bahonokosia abandu babwe okhurula khu ifwe? Nakaliena akachilanga nimupaala mbu nyasaye wenywe namuhonokosie?

¹⁵Kho luno muralekha Hesekia okhumukaate nohomba okhumukosia singa mbwo tawe. Muramusubila tawe! Abulaho nyasaye welihanga liosi owahonokosia abandu baabe okhurula khumukhono kwo muruchi wa Asiria tawe. Kali kololi mbu nyasaye wenywe uyu siali onyala okhumunokosia tawe?”

¹⁶Abemeli ba Basiria baboola amang'ana amabi okhusila khu MWAMI Nyasaye halala nende khu Hesekia, omurumikhili wo MWAMI.

¹⁷Ebarwa yo Muruchi yahandika yanyeka OMWAMI Nyasaye wa Isiraeli. Yaboola, “Abanyasaye bamahanga sibahonokosia abandu babwe okhurula mubunyali bwanje tawe; kata khandi nyasaye wa Hesekia siyakhahonokosie abandu babe okhurula khu ise tawe.”

¹⁸Abemeli bahanzukha amang'ana mu Luheburania khulwo okhuriisia abandu nende okhufwisia omwoyo abandu ba Yerusalemu abali ahembi namasisi kelitookho, kho bube butoro okhufumila litookho yilio.

¹⁹Bal'loma khu ka Nyasaye wa Yerusalemu munjila singa eya bal'lomanga amang'ana kabanyasaye babandu bandi, ebiniini ebialombwa namakhono kabandu.

²⁰Ma omuruchi Hesekia nende omuroobi Isaya omusiani wa Amosi nibasaaya khu Nyasaye nibamulakayilanga mbu abakhonye.

²¹OMWAMI yaruma Om'malaika owali okhwira abasikari halala nabemeli belihe lia Abasiria. Kho omuruchi yakalukha Asiria nasimbile omurwe. Litukhu elala olwomuruchi yali nali muhekalu yanyasaye uwe, balala khubasiani baabe bamwira netsinganga tsiabwe.

²²Munjila yiyi OMWAMI yasoola omuruchi Hesekia nende abandu ba Yerusalemu okhurula khubunyali bwa Senakeribu, omuruchi wa Asiria, khandi nabasoola okhurula khubasuku babwe bandi. Yamala nalekha abandu okhumenya mumulembe nabarende bebibala ebili ahembi khubo.

²³Abandu abenji betsa Yerusalemu nibaleeranga ebihanwa khu MWAMI nende ebindu biobukusi khu Hesekia omuruchi wa Yuda. Okhurula olwene yilwo Hesekia yahebwa oluyali olukali netsimbia tsiosi.

²⁴Mumatukhu yako Omuruchi Hesekia yachaaka okhulwala ma naba ahembi okhufwa. Yamala nasaaya ne OMWAMI namuha esimanyilo mbu alahona.

²⁵Nebutswa Hesekia yali nomwekhonyo omukali kata siyakhupila OMWAMI embwo khuko MWAMI yali namukholeye tawe, kho abandu ba Yuda nende Yerusalemu bamala nibanyoola omunyakhano.

²⁶Mukhumal'likha, Hesekia nende abandu ba Yerusalemu betutuyia, ma OMWAMI siyahaana esinyasio khubandu tawe okhwola olwa Hesekia yali namal'le okhufwa.

²⁷Omuruchi Hesekia yali omuhinda okhusila ma siabuli mundu namuhelesia oluyali. Yamala niyombokha ebiachi biokhubiikhamwo efetsa, etsahabu, amachina kobukusi, ebihunyanga bulahi, ebikhumba nende ebindu bindi ebiobukusi.

²⁸Okhumeetakhwo, yombokha ebiachi ebiokhubiikhamwo obuswache bubwe, ewaini nende amafura komuseituni; niyombokha ebikuuli ketsing'ombe, nende habundu hasirwa khulwa amakondi.

²⁹Yombokha amataala, ma nanyoola tsing'ombe nende amakondi netsimbusi tsinyinji, sichila Nyasaye yamuhelesia obuhinda obwinji.

³⁰Yali omuruchi Hesekia owali okhwikala Esitaho sia Kihoni ma nahenjia amaatsi kasio okhubir'ra mumutaro okhutsia mukari welisisi lia Yerusalemu. Hesekia yahesia kosi akayakholanga,

³¹kata olwomurumwa wa Babulonia yetsa okhureeba khumang'ana karang'anyile akali nikekholekhele musibala, Nyasaye yalekhanga Hesekia okhukhola amang'ana kaake omwene khulwo khuteema ifwo yiye.

³²Amang'ana kandi kosi akomuruchi Hesekia yakhola nende akokhuyanza OMWAMI okhusila, kahandiikwa mumabisulo komuroobi Isaya omusiani wa Amosi, khandi kahandiikwa mumang'ana kabaruchi ba Yuda nende Isiraeli.

³³Hesekia yafwa ma nayabilwa elubeka wemukulu webilindwa biabaruchi. Abandu bosi ba Yuda nende Yerusalemu bamuhelesia oluyali olukali olwa yafwa. Omusiani uwe olangwa Manase yabukula obukono bubwe singa omuruchi.