Read lunyore 2 AKETSINYINGA 33 Bible Online

2 AKETSINYINGA 33 - lunyore bible

2 AKETSINYINGA 33

¹Manase yali nemihika likhumi nachibili olwa yachaaka okhuruka Yuda, ne yamiha mu Yerusalemu khulwemihika amakhumi karano nachirano.

²Yakhola tsimbi imbeli wo MWAMI, nalonda akes'sinyo akabanasibala abo MWAMI yakhunga imbeli wa Baisiraeli bali nibasili khwinjila musibala yisio bakholanga.

³Yali okhwombokha khandi habundu habanasibala bekayakayilanga, ha samwanawe Hesekia yali okhusambula. Yombokha tsisambwa khulwo obwekayakayi bwa Baali, khandi nalomba ebiniini biomunyasaye mukhasi olangwa Ashera, khandi nibekayakaya tsinyininyini.

⁴Yombokha tsisambwa tsiabetsinzibulo mu Hekalu, habundu ho MWAMI yali okhuboola mbu bamwekayakayilenjeho khasotso.

⁵Mumichitsi chibili chie Hekalu, yombokhamwo tsisambwa khulwo okhwekayakayilakhwo tsinyininyini.

⁶Yali okhwir'ra abasiani baabe Mwibanda lia Hinomu nabahaana singa omusango omusambe. Yakholanga obulakuli nende obulosi khandi yatsitsanga khubafumu nende okhul'loma khumisambwa. Yali okhukhola tsimbi tsingali imbeli wo MWAMI ma nachila OMWAMI nahambwa noburima.

⁷Yara esiniini mu Hekalu, habundu ha Nyasaye yabool'la Daudi nende omusiani we Solomoni mbu, “Hano mu Yerusalemu, mu Hekalu muno, niho ahandali okhwela okhurula musibala siosi esietsinzibulo likhumi nende tsibili tsia Isiraeli okhuba habundu he ise okhwekayakayilwa.

⁸Ne abandu bosi ba Isiraeli nibakhalonda amang'ana kanje ma balinde Amalako kosi akomurumwa wanje Musa yabahelesia, kho sinambuchil'le bakhungwe musibala siandahelesia abakuka benywe tawe.”

⁹Manase yemel'la abandu ba Yuda okhukhola tsimbi tsingali okhusila okhuyomba tsimbi tsiakholwa nende amahanga ako MWAMI yakhunga musibala olwabandu baabe bali nibasili okhwinjilamwo.

¹⁰OMWAMI yal'loma khu Manase halala nende abandu baabe nebutswa sibabukulamwo obukono tawe.

¹¹Kho OMWAMI yalekha abemeli bamahe kabandu ba Asiria okhuseera Yuda. Batila Manase, nibamufumira netsingaka mumolu ma nibamuboha neminyol'lo ma nibamuhila Babulonia.

¹²Mukhutsunwa khukhwe, yetutuyia, ma nakalukha khu MWAMI Nyasaye uwe, ma namureeba obukhonyi.

¹³Nyasaye yahuchil'la obusaayi bwa Manase ma nakalusia amasaayoke khulwo okhumuhuchil'la akalukhe Yerusalemu ma aruke khandi. Kano kachila Manase nahuchil'la mbu OMWAMI ni Nyasaye.

¹⁴Inyuma we yaka, Manase yameeta oburambi bwelisisi liesioba khulubeka lwebukwe welitookho lia Daudi, okhuchiachila mwibanda ahembi nesitaho sia Kihoni esili esinyolu okhwola Musilibwa sie Tsisutse nende habundu helitookho halangwa Ofeli. Manase yara omwemeli wa buli mukanda kwabasikari mubuli litaala liosi mu Yuda eliasirwakhwo oluhinga.

¹⁵Yahinia okhurula mu Hekalu abanyasaye beb'bala bindi nende esiniini esiayaramwo halala nende tsisambwa tsietsimbia tsindi etsiali khusikulu aha Ehekalu yombokhwa nende habundu handi hosi mu Yerusalemu; yahila ebindu yibi biosi esioba welitaala ma nabifuuba ehale.

¹⁶Khandi yali okhulomba tsisambwa etsio MWAMI yekayakayilwangakhwo ma nibahaana emisango chiobuhambani khandi nibahanilakhwo emisango chiokhukhupa embwo.

¹⁷Kata nikali mbu abandu batsilil'la okhuhaana emisango habundu handi hosi ahokhwekayakayila, bachihaananga khu MWAMI yenyene.

¹⁸Ebindu bindi biosi ebia Manase yakhola, amasaayo kayasaaya khu Nyasaye, nende amang'ana kosi akabaroobi bal'loma khuye muliira lio MWAMI Nyasaye wa Isiraeli, kahandiikwa mubitapu bia Abaruchi ba Isiraeli.

¹⁹Amasaayo komuruchi nende amakalusio ka Nyasaye khuko nende aketsimbi tsiayakhola nasili okhweyama; tsimbi tsiayakhola; habundu hokhwekayakayila abanyasaye betsimbia nende ebiniini bianyasaye omukhasi bia yalomba nende ebiniini ebiayekayakayanga, biosi biahandikwa mumang'ana kabaroobi.

²⁰Manase yafwa ma nayabilwa hango homuruchi ne omusiani uwe Amoni nabukula obukono bubwe okhuba omuruchi.

²¹Amoni yali nemihika amakhumi kabili nende chibili olwa yachaaka okhuruka Yuda ma naruka nali Yerusalemu khulwemihika chibili.

²²Singa papa uwe Manase, yali okhukhola tsimbi imbeli wo MWAMI, khandi yekayakayanga ebiniini bia samwana yekayakayanga.

²³Nebutswa obwabukhani bubwe khusamwana bwali mbu siyayetutuyiakhwo ma nakalukha khu MWAMI tawe; yali netsimbi tsinyinji okhuyomba etsia samwana yali n'natsio.

²⁴Abakhulundu ba Amoni baloosia masilisi obwokhumwira ma nibamwir'ra munyumba yomuruchi.

²⁵Abandu ba Yuda bamala nibeera abandu yabo abali nibeer're Amoni ma nibemekha omusiani uwe Yosia okhuba omuruchi.