Read lunyore 2 AKETSINYINGA 34 Bible Online

2 AKETSINYINGA 34 - lunyore bible

2 AKETSINYINGA 34

¹Yosia yali nemihika munane olwa yachaaka okhuruka Yuda ne yamiha nali Yerusalemu khulwemihika amakhumi kataru na mulala.

²Yakhola akayanzisia OMWAMI; yalonda ako Muruchi Daudi kuka nyene yakholanga khulwo okhulonda amalako ka Nyasaye kosi.

³Omuhika kwa munane kwa Yosia yali narukanga, nasili omubuukha, yachaaka okhwekayakaya Nyasaye wakuka uwe Omuruchi Daudi. Emihika chine nichiweye, yachaaka okhusambula Habundu aha banasibala bekayakayilanga, ebifwanani bianyasaye mukhasi Ashera nende ebiniini bindi biosi.

⁴Abandu baabe nibarumikhilanga obunyali bwa Yosia basambula tsisambwa etsia Baali yekayakayilwangaho khandi nibaremaka tsisambwa tsiobwali bwasambilwangakhwo etsiali ahembi netsisambwa etsiekayakayilwangakhwo Baali. Bali okhusa ebiniini bia Ashera nibikwa olukuukhi khandi nibasa ebiniini bindi biosi ma nibasasia olukuukhi lwabio khubilindwa biabandu bahaananga emisango khubio.

⁵Yasambila ebikumba biabesaalisi betsimbia khutsisambwa tsiabwe. Khulwo okhukhola yaka kosi, yakhola Yuda nende Yerusalemu okhuba hasiyikhu khandi.

⁶Yakhola akene yaka khumataala ka Manase, Efuraimu nende aka Simioni kata okhwola khu Nafutali, nende habundu hosi hasasikha mutsimbeka tsiosi.

⁷Yasambul'la tsisambwa nende emisaala chia Ashera khandi natubula ebiniini nibikwa olukuukhi khandi naremania tsisambwa tsiobwali mubitonye musibala siosi sia Isiraeli. Ma nakalukha Yerusalemu.

⁸Mumuhika kwelikhumi namunane okwoburuchibwe, Yosia namal'le okhusiiya esibala nende Ehekalu khulwo okhuhiniaho obwekayakayi bwesibala, yaruma abandu bataru okhutsia okhulomba Ehekalu yo MWAMI Nyasaye obuhia. Abandu tsana bali Shafani omusiani wa Asalia, Maaseya, omukafuna wa Yerusalemu nende Yoa omusiani wa Yoahasi, omukhulundu omukali.

⁹Amapesa kali nikasoloywe nende abalindi Abalawi mu Hekalu kahanwa khu Hilikia, Omwesaalisi Omukhongo. Amapesa yako kali nikasoloywe okhurula khubandu ba Efuraimu, nende aba Manase nende khubandu belubeka lwenandete lwoburuchi, nende khubandu ba Yuda, Benjameni nende aba Yerusalemu.

¹⁰Amapesa yaka kahanwa khubandu bataru abasinjil'la okhulombwa khwe Hekalu, ne nabo nibakahaana

¹¹khubafundi betsimbao, nende abombokhi khulwo okhukula amachina nende tsimbao ebiarumikhilwa okhulomba emiombokho echiabaruchi ba Yuda balekha nichiasasikha.

¹²Abandu bokhutiya bali abandu abasubilwa okhusila. Bali khuhengelesibwa nende Abalawi bane: Yahatsi nende Obadia abesilibwa sia Merari nende Sakaria na Meshulamu abesilibwa sia Kohatsi. Abalawi bali abembi abalahi.

¹³Abalawi bandi bali okhusinjil'la okhuchingwa khwemisiko nende okhuhengelesia abatiyi bemilimo chiabukhan'ne, ne abandi bali abahandichi nohomba abalindi bebilibwa.

¹⁴Olwa amapesa kali nikahinibwanga musikoti sia kabiikhwamwo esiomu Hekalu, Hilikia yetuya khusitapu sia Malako ko MWAMI, Amalako ka Nyasaye yahelesia Musa.

¹⁵Yabool'la Shafani, omuhandichi mbu, “Mal'le okhunyoola esitapu sia Malako mu Hekalu.” Yahelesia Shafani,

¹⁶ma Shafani nahelesia omuruchi. Shafani yabool'la omuruchi mbu, “Khumal'le okhukhola buli sindu esiokhubooleye khukhole.

¹⁷Khubukuye amapesa akabiikhwa mu Hekalu ma khukahan'ne khubatiiyi nende abasinjil'li babwe.”

¹⁸Ma nameeta okhuboola mbu, “Ndi hano nende esitapu esia Hilikia yambelesia.” Ma nasisoma nomwoyo omukali khumuruchi.

¹⁹Olwomuruchi yahul'la esitapu nisisomwanga, yarandula tsingubo tsitsie musihenda mwoyo,

²⁰ma nahaana amalako yaka khu Hilikia, khu Ahikamu omusiani wa Shafani, omuhandichi wemise, nende Asaya omutiyi womuruchi

²¹naboola mbu, “Tsie mureebele OMWAMI nende abandu abasili mu Isiraeli nende Yuda amang'ana yaka. Mureebelesie akesitapu yisi siekesianga. OMWAMI ali nelileko n'nefwe sichila abakuka befwe sibalonda ling'ana lio MWAMI khandi sibakhola singa esitapu yisi siboolanga mbu okhwola kakholwe tawe.”

²²Hilikia nende abandi abomuruchi yali niyahuuye, batsia okhul'loma khu Hulida omuroobi owali omukhasi wa Shalumu omusiani wa Tokiwatsi omwitsukhulu wa Hasira owamenyanga habundu ahayia mu Yerusalemu, yalindanga etsikanzo tsia besaalisi. Babool'la Hulida akali nikekhol'le,

²³ne naye nababool'la bakalukhe khumuruchi

²⁴ma bamubool'le amang'ana kano, okhurula khu MWAMI: “Ise nzia okhuhaana esinyasio khu Yerusalemu nende abandu bamwo bosi okhulondokhana nebiesuho biosi ebiahandikwa musitapu esisomeywenje Omuruchi.

²⁵Bamala okhuundekha ma bahaana emisango khubanyasaye bandi, khulwe yako bainjema lileko nende kosi akabakhola. Oburima bwanje buli khu Yerusalemu ne sibulasima tawe.

²⁶Ne khu komuruchi mwene, yaka niko ako MWAMI Nyasaye wa Isiraeli aboolanga: Ibe wali okhuhuyia khu akahandikwa musitapu

²⁷ma niweyama khandi niwetutuyia imbeli wanje norandula tsingubo tsitsio nende okhwekhuula. Olwa wahul'la singa obwa ndali okhuboola nambaane esinyasio khu Yerusalemu nende abandu bamwo. Ise mal'le okhuhul'la lisaya lilio,

²⁸ma likhupako liosi elianandeere khu Yerusalemu sinalitse tawe okhwola olwa ibe nofwe. Nandekhe nofwile mumulembe.” Abandu bakalukha khumuruchi Yosia nibamuleer'ra amang'ana yaka.

²⁹Omuruchi Yosia yalanga abemeli bosi ba Yuda nende Yerusalemu halala.

³⁰Yatsia halala n'nabo khu Hekalu yo MWAMI, nibali halala nabesaalisi nende Abalawi nende abandu bandi bosi, abahinda nende abatakha. Imbeli wabwe bosi omuruchi yasoma nomwoyo omukali esitapu siosi esie indakano esiali nisinyooywe mu Hekalu.

³¹Omuruchi yasinjila hatsisiilo tsiomuruchi ma nalomba indakano nende OMWAMI khulwo okhumuhulila, nende okhulonda amalako kaake, nende amachetsiyioke nomwoyo kukwe kwosi nende amapaalo kaake kosi nende okhukhola kosi ake indakano singa kahandiikwa musitapu.

³²Nachila abandu ba Benjameni nende buli mundu wosi owali Yerusalemu nibesuha okhulinda indakano. Khulwe yako abandu ba Yerusalemu nibahuchil'la okhulonda akenyekhanga khu indakano akabali nibalombele nende Nyasaye wabakuka babwe.

³³Omuruchi Yosia yatuya ebiniini bies'sinyo ebiali musibala siabandu ba Isiraeli, ne khuluhono lwa yali nasili mwoyo, yenya abandu bamurumikhile OMWAMI, Nyasaye wa bakuka babwe.