Read lunyore 2 AKETSINYINGA 35 Bible Online

2 AKETSINYINGA 35 - lunyore bible

2 AKETSINYINGA 35

¹Omuruchi Yosia yalia lisabo lie Pasaka mu Yerusalemu khulwokhuhaana oluyali khu MWAMI. Litukhu lielikhumi nakhane mumwesi kwokhuranga, bera emiruko chie Pasaka.

²Yahelesia abesaalisi emilimo chiabakhoyele okhukhola mu Hekalu, ne nabatinyilisia bachikhole bulahi.

³Khandi yahaana amebaalo yaka khu Balawi, abebaali ba Isiraeli, abahanwa khu MWAMI: “Mure Lisanduku lietsienukhu lie Indakano mu Hekalu ya Solomoni omusiani wa Daudi yombokha. Inywe muratsilil'la okhulichinga buli siahabundu tawe, nebutswa murumikhile OMWAMI Nyasaye nende abandu baabe Isiraeli.

⁴Mubukule obweyangu bwenywe mu Hekalu okhulondokhana nebilibwa bienywe, nende emilimo chiamwahebwa nende omuruchi Daudi nende omusianiwe omuruchi Solomoni,

⁵ma mwekabule abene kho abalala khu inywe babe abanyala okhukhonya buli inyumba yabandu ba Isiraeli.

⁶Inywe musinje ebimeme bie Epasaka. Luno mwesiiye ma mulombe emisango kho Abaisiraeli basienywe babe abanyala khulonda amalako ko MWAMI yahaana okhubir'ra khu Musa.”

⁷Yosia yahaana khubandu abaliho bosi amakondi nende tsimbusi etsihela etsielefu amakhumi kataru khulwo khurumikhilwa khu Pasaka, khandi nahaana etsihili etsielefu tsitaru — biosi mbwo biali ebibie.

⁸Khandi abemeli baabe bahaana khubandu, khubesaalisi nende Abalawi emiruko tsiokhurumikhila. Ne abemeli abasinjiliye Ehekalu — Hilikia, Omwesaalisi Omukhongo, Sakaria nende Yehieli — bahelesia abesaalisi ebimeme biamakondi nende tsimbusi etsielefu tsibili nende tsimia tsisasaba, halala nende etsichulukhi tsimia tsitaru khulwokhuhaana emisango khwisabo lie Pasaka.

⁹Abemeli ba Abalawi — Kanania, Shemaya nende amwabo Netsaneli, Hashabia, Yeyieli nende Yosabadi bahaana ebimeme biamakondi etsielefu tsirano halala nebimeme bie tsimbusi, nende etsichulukhi tsimia tsirano khulwa Abalawi okhuhaana singa emisango.

¹⁰Olwa ebindu biosi biali nibirechekhelwe khulwe Pasaka, abesaalisi nende Abalawi babukula obukono bwabwe, singa bali okhulakwa nomuruchi.

¹¹Inyuma wokhwira ebimeme biamakondi bie Pasaka, Abalawi bali okhuhiiniakhwo amaseelo ne abesaalisi nibanyul'lusia amatsahi khulusambwa.

¹²Ma nibakabul'la abandu, buli mukandakwe inyumba emiruko tsiokhuhaana singa emisango emisambe kho babe abanyala okhuhaana okhulondokhana namalako akali musitapu sia Musa esia Malako.

¹³Abalawi basianikhila emisango chie Pasaka khumul'lo okhulondokhana khu malako, ne nibatekhela ebihanwa ebitsienukhu mutsindabu, mubipaala nende khubifuria ma bwangu nibakabila abandu inyama.

¹⁴Inyuma we yako okhukholwa, Abalawi bekabul'la inyama abene nende okhuhelesiakhwo abesaalisi bomulwibulo lwa Haruni, sichila abesaalisi bali nemilimo eminji khulwo okhusamba tsinyama etsiasambungwa tsinjima nende amafura kemisango.

¹⁵Abembi balondakhwo bano abesilibwa sia Asafu mulwibulo lwa Lawi bali mubukono obwa barebwamwo okhulondokhana namalako akomuruchi Daudi yahaana. Asafu, Hemani nende Yedutsuni, omuroobi womuruchi. Abalindi bomubilibwa bie Hekalu sibatakhwa okhurula ahabali nibalindanga tawe, sichila Abalawi bandi babarechekhela Lisabo lie Pasaka.

¹⁶Kho singa omuruchi Yosia yali nalachile, siesindu siakholwa litukhu yilio, khulwo okhwekayakaya OMWAMI, nibetsusinjia Lisabo lie Pasaka, nende okhuhaana emisango emisambe khulusambwa.

¹⁷Khulwamatukhu kane nakataru, abandu ba Yerusalemu balia Lisabo lie Pasaka halala nende Lisabo lio Mukaati okuralimwo amamela.

¹⁸Okhurula mumatukhu komuroobi Samweli Lisabo lie Pasaka siliali ndiakholwakhwo singa mbu tawe. Abulakhwoho omuruchi wosi khubarukanga owali okhukhola Lisabo lie Pasaka singa obwomuruchi Yosia, abesaalisi, Abalawi nende abandu ba Yuda, na Isiraeli nende Yerusalemu bakhola,

¹⁹mumuhika kwelikhumi namunane kwoburuchi bwa Yosia tawe.

²⁰Inyuma womuruchi Yosia okhukhol'la Ehekalu yaka kosi, Omuruchi Neko we Misiri yemel'la abelihe okhulwan'na habundu halangwa Karikemishi khumuchela kwa Efurate. Yosia yateema okhumwikal'la,

²¹nebutswa Neko yarumila Yosia amang'ana kano, “Liye lianwananga yili silili khuibe, Omuruchi wa Yuda tawe. Ise sinzitsile okhulwana ibe tawe nebutswa okhulwana abasuku banje, ne Nyasaye, umbooleye khole bwangu. Nyasaye ali halala n'nase kho oranzikal'la tawe, khase OMWAMI alakhumuma.”

²²Yosia yasuula okhuhul'la aka Nyasaye yaboolanga nikabir'ranga mumuruchi Neko kho yamala niyefwanania omundu undi ma natsia hobulwani bwali musipaapi sia Mekito.

²³Olwa bali nibalwananga, Omuruchi Yosia yalaswa nolusele lwo Omumisiri. Yamala nabool'la omurumikhili uwe, “Mbinia hano, Mal'le khusaalila obubi!”

²⁴Bamuchinga okhurula mwikaari lilie nibamura mwikaari lindi eliakhabili elia yali nareyeho ma nilimuhila Yerusalemu. Ebwene yiyo yamala nafwa ma nayabilwa mubilindwa biabaruchi. Abandu bosi aba Yuda nende Yerusalemu bali okhwekhuula okhufwa khukwe.

²⁵Omuroobi Yeremia yalooka olwembo lwokhwekhuula omuruchi Yosia. Yakwa ifwo mu Isiraeli khulwa abembi, abasaatsa nende abakhasi okhwemba olwembo yilu nibekhuulanga Yosia. Olwembo yilu lunyoolekha mutsinyembo tsiabunjelesibwa khulwolwekhuulu.

²⁶Amang'ana kosi aka Yosia yakhola, obuyanzi bubwe khu MWAMI, obuhulili bubwe khu Malako,

²⁷nende amang'ana kobulamubwe okhurula mukhuchaaka okhwola mukhumal'likha, kosi kahandiikwa musitapu siabaruchi ba Isiraeli nende Yuda.