Read lunyore 2 AKETSINYINGA 36 Bible Online

2 AKETSINYINGA 36 - lunyore bible

2 AKETSINYINGA 36

¹Abandu ba Yuda bali okhwela omusiani wa Yosia owalangwa Yoahasi, ma nibamukhola omuruchi mu Yerusalemu musilenje siasamwana.

²Yoahasi yali nemihika amakhumi kabili nachitaru olwa yakholwa omuruchi wa Yuda ma naruka nali Yerusalemu khulwe emiesi chitaru.

³Omuruchi Neko we Misiri yamutila okhuba omuhambe ma nakhalachila esibala sia Yuda okhurunga etsikilo tsiefetsa etsielefu tsitaru netsimia tsine nende etsikilo tsietsahabu amakhumi kataru natsine.

⁴Neko yamwemekha Eliakimu amwabo Yoahasi okhuba omuruchi wa Yuda ma nakalukhania eliira lilie okhuba Yehoyakimu. Yoahasi yahilwa Emisiri nende Neko.

⁵Yehoyakimu yali nemihika amakhumi kabili nachirano olwa yakholwa omuruchi wa Yuda ma naruchila Yerusalemu emihika likhumi na mulala. Yakhola tsimbi imbeli wo MWAMI Nyasaye.

⁶Omuruchi Nebukadinesa wa Babulonia yaseera Yuda, ma natiila Yehoyakimu namuhila Babulonia nabohelwe neminyol'lo.

⁷Nebukadinesa yabukulakhwo khumiandu chie Hekalu ma nachira munyumba yiye yoburuchi mu Babulonia.

⁸Esindu siosi esia Yehoyakimu yakhola, halala namang'ana amabi akayakholanga, kahandiikwa musitapu siabaruchi ba Isiraeli nende Yuda. Omusiani uwe Yehoyakini yabukula obukono bubwe singa omuruchi.

⁹Yehoyakini yali nemihika likhumi namunane olwa yakholwa omuruchi wa Yuda, ne yaruchila Yerusalemu khulwe emiesi chitaru nende amatukhu likhumi. Ye khandi yakhola tsimbi imbeli wo MWAMI.

¹⁰Mukhuchiaka khwomuhika, omuruchi Nebukadinesa yatiila Yehoyakini namuhila Babulonia singa omubohe, ma nabukula emianduchie Ehekalu. Ma Nebukadinesa namukhola Sedekia samwanawe mutu okhuba omuruchi wa Yuda nende Yerusalemu.

¹¹Sedekia yali nemihika amakhumi kabili namulala olwa yachaaka okhuruka Yuda ne yaruchila Yerusalemu khulwemihika likhumi namulala.

¹²Yakhola tsimbi imbeli wo MWAMI, khandi siyayetutuyia olwa yahulila amang'ana komuroobi Yeremia owal'lomanga amang'ana ko MWAMI tawe.

¹³Sedekia yakhola indiri khu Nebukadinesa, owali namuhachisie okhwesuha muliira lia Nyasaye mbu nabe omuhulili. Sedekia yali nesikala marwi nasuula okhweyama ma akalukhe khu MWAMI, Nyasaye wa Isiraeli.

¹⁴Okhumeeta khu kene yaka, abemeli ba Yuda, abesaalisi nende abandu balonda tsinjila tsietsimbi tsiabandu betsimbia etsili ahembi n'nabo khulwo khwekayakaya ebiniini ma nibafwabia Ehekalu eyo MWAMI mwene yachikhola inzienukhu.

¹⁵OMWAMI Nyasaye wabakuka baabe yali niyatsilil'la okhuruma abaroobi khulwo okhuchetsiyia abandu baabe sichila yali niyenyanga okhubahonia nende okhuhonia Ehekalu.

¹⁶Nebutswa batsekhel'la abarumwa ba Nyasaye nibachaaya amang'ana kaake khandi nibatsekhel'la abaroobi baabe, okhwola mukhumalikha lileko lio MWAMI khubandu baabe liali likali okhusila mbu sibakhahonokokhele tawe.

¹⁷Kho OMWAMI yamala naleera omuruchi wa Babulonia okhubaseera. Omuruchi uyo yeera abasiani ababuukha ba Yuda, kata abomu Hekalu. Omuruchi siyalikhwo netsimbabasi khumundu wosi tawe, abe omwana noho omukhulundu, omusaatsa nohomba omukhasi, omulwaye nohomba omulamu. Nyasaye yabahaana bosi khuye.

¹⁸Omuruchi wa Babulonia yayaaka Ehekalu, nende ebindu biomu Hekalu ebiobukusi, nende emianduchiomuruchi nende abemeli baabe, ma nahila ebindu biosi Babulonia.

¹⁹Yasamba Ehekalu nende litookho, halala netsinyumba tsiomuruchi halala nemiandu chialio chiosi ma nafunaka amasisi kalio nikakwa hasi.

²⁰Yabukula abandu bosi abarafwa nabahila Babulonia okhumurumikhila singa ababohe halala nabolwibulo lwabwe okhwola olwoburuchi bwa Perisia bwachiaka.

²¹Esibala siakhabe likunda khulwemihika amakhumi kane nakataru, khulwo khwitsusia okhuhuluukha khwe Sabato okhurakholwa singa obwo MWAMI yali niyaboola okhubir'ra mumuroobi Yeremia.

²²Mumuhika kwokhuranga okwa Kirushi wa Perisia yali omuruchi, OMWAMI yakhola akayali niyaboola okhubir'ra mumuroobi Yeremia kekholekhe. Yamukhola Kirushi okhuhaana lilako lino ma alirume muhandiike khulwo okhusomwa habundu hosi musibala siarukanga.

²³“Lino nilwo lilako lio Muruchi Kirushi omuruchi wa Perisia. OMWAMI Nyasaye wo Mwikulu waikhola okhuba Omuruchi wesibala siosi ma waimbelesia omulimo kwokhumwombokhela ehekalu mu Yerusalemu mu Yuda. Luno inywe abali abandu ba Nyasaye mutsieyo ne OMWAMI Nyasaye wenywe abe n'nenywe.”