Read lunyore 2 AKETSINYINGA 4 Bible Online

2 AKETSINYINGA 4 - lunyore bible

2 AKETSINYINGA 4

¹Omuruchi Solomoni yalaka mbu olusambwa lwomukasa lulombwe olwo oburambi bwalwo bwahelana nende obuchiikha mbu etsimiita tsirano natsine, ne okhutsia ikulu oburambi bwahela etsimiita tsine nende enusu.

²Khandi yalomba litangi liamaatsi liomukasa eliali singa ingara ne olutungu lwalio lwahela etsimiita tsibili nende ebitonye b'bili khumiita; ne liali etsimiita tsine nebitonye bine khumiita okhurula khululika iyi okhwola khululika lundi iyi; ne okhulibotokhana liosi liali etsimiita likhumi nachitaru nebitonye bibili.

³Ne okhulibotokhana liosi esioba khumunwa kwalio, khwaliho netsinyaali tsibili etsiokhuling'onia, olunyaali lulala lwali ikulu wolundi. Okhung'onibwa yikhwo khwali mukhwana khwe tsichulukhi ne tsialomba esindu silala nelitangi tsana.

⁴Litangi tsana liekhala khumikongo tsietsichulukhi tsietsahabu likhumi nachibili etsiahenga esioba, mbu buli tsitaru khutsio nitsihenganga elubeka l'lala.

⁵Tsimbafu tsielitangi tsana tsiali nobusiro obuhela etsimilimita amakhumi kane nakataru natsirano. Khundulo khwalio khwali singa khundulo khwesikombe, ne liafwana singa esimuli sielitanya. Litangi yilio liachinganga amaatsi akahela etsiliita etsielefu amakhumi kasasaba.

⁶Khandi balomba etsipeseni likhumi, mbu tsirano tsirebwe enandete we Hekalu ne tsirano tsirebwe esinyolu wayo. Tsiarumikhilwa okhusaaba ebitonye biemiruko echiasambwanga singa emisango. Amaatsi akomulitangi likali kali akabesaalisi okhwesinga.

⁷Balomba ebihani likhumi ebietsitaya ebialombwa khutsahabu singa obwo mufwano okwalakwa kuli. Babibiikha mu Hekalu mbu birano enandete ne birano bindi esinyolu.

⁸Khandi balomba etsimesa likhumi ma nibatsira munyumba ingali ye Hekalu, etsimesa tsirano nitsirebwe olubeka l'lala ne etsindi tsirano khulubeka lundi. Khandi balomba tsindaabo tsietsahabu emia ndala.

⁹Balomba omuchitsi kwemukari khulwa besaalisi nende okundi okwesioba. Emiliango chiomubilibwa hakari wemichitsi yitsi biafuunikhwakhwo omukasa.

¹⁰Litangi liarebwa ahembi mukona we Hekalu khulubeka lwebukwe enandete.

¹¹Hiramu khandi yalomba tsindabu, nemiikho nende tsindaabo. Yamalila okhulomba ebindu biosi ebia yali nasubisisie okhulombela Solomoni mu Hekalu.

¹²Yalomba etsisiilo tsibili, netsikofia etsiali singa tsindaabo khutsikofia chiechisiilo tsana, ne amang'oole keminyololo echiabaswa khukofia ya buli esiilo.

¹³Khandi yalomba amakomamanga komukasu tsimia tsine nikaloosibwa mutsinyaali tsibili okhubotokhana etsikofia tsiokhutsisiilo.

¹⁴Khandi yalomba amakaari likhumi nende etsibeseni likhumi,

¹⁵nende litangi elala netsichulukhi likhumi natsibili etsialiletel'la.

¹⁶Khandi yalomba tsindabu, nemiikho, nende etsihuma. Hiramu omukholi mukali wobusitsa yalomba ebindu yibi biosi okhurula khumukasa okwaruutwa singa omuruchi Solomoni yali namulachile, mbu birumikhilwe mu Hekalu yo MWAMI.

¹⁷Omuruchi yalaka mbu bisal'lusibubwe ma bilongelwe hakari wa Sukotsi nende Sereda Mwibanda lia Yorodani.

¹⁸Ebindu ebinji bialombwa, ma kata siyaliho owakhamanyilisisie obusiro bwosi obwomukasa okwarumikhilwa tawe.

¹⁹Khandi omuruchi Solomoni yalaka mbu ebirumikhilo biosi biomu Hekalu bilombwe khutsahabu. Nabio biali olusambwa nende etsimesa tsiemikaati etsihanwanga khu Nyasaye;

²⁰ebihani bietsitaya nende etsitaya etsialombwa khutsahabu isiyikhu etsiatukhanga imbeli wa Habundu Hatsienukhu Okhusila, singa kaloosibwa kabe;

²¹ebimili biokhung'onia, etsitaya nende amamaka, biosi ebialombwa khutsahabu isiyikhu,

²²amahana kokhusimisiakhwo etsitaya, tsindaabo, nende etsisahani tsiokhusambilakhwo obwali, nebifuria biokhuchingilakhwo amanda komul'lo nikang'alaye. Ebindu yibi biosi bialombwa khutsahabu isiyikhu. Emiliango chiesioba we Hekalu nende echia Habundu Hatsienukhu Okhusila tsiafuunikhwa nende etsahabu.