Read lunyore 2 AKETSINYINGA 5 Bible Online

2 AKETSINYINGA 5 - lunyore bible

2 AKETSINYINGA 5

¹Olwomuruchi Solomoni yali namal'le emilimo chiosi khu Hekalu, yara mu Hekalu tsana ebikoti biokhubiikhamwo ebindu biosi ebia Daudi papawe yali niyahaana khu MWAMI. Nabio biali efetsa, etsahabu nende ebindu bindi biosi.

²Ma omuruchi Solomoni nalanga abemeli bosi abetsinzibulo tsia Isiraeli nende abebilibwa biabwe nabalaka okhwebunjikha mu Yerusalemu, kho babe abanyala okhubukula Lisanduku lie Indakano okhulihinia Sayuni litookho lia Daudi ma balileere mu Hekalu.

³Bosi bebunjikha halala mumatukhu ke Lisabo lia Mahindu.

⁴Olwa abemeli bosi bali nibebunjikhile halala, nilwo olwa Balawi basikula Lisanduku lie Indakano

⁵ma nibalihila mu Hekalu. Khandi abesaalisi halala nende Abalawi babukula Liheema liokhubaho khwo MWAMI halala nebindu biamwo biosi nibalihila mu Hekalu.

⁶Omuruchi Solomoni halala nabandu ba Isiraeli bosi bebunjikha halala imbeli we Lisanduku lie Indakano ma nibalombelaho omusango kwamakondi amenji nende tsing'ombe tsinyinji etsiranyala okhubalwa.

⁷Ma abesaalisi nibahila Lisanduku lie Indakano yo MWAMI mu Hekalu, nibalira Habundu Hatsienukhu Okhusila, isi wamakerubi kabili.

⁸Tsimbaha tsiamakerubi tsana tsiabambukha ma nitsifuunikha Lisanduku nende emisaala echialichinganga.

⁹Tsindulo tsiemisaala tsana tsiali etsinyala okhulolwa nende omundu wosi owakhaba nasinjiye imbeli wa Habundu Hatsienukhu Okhusila, ne tawe habundu handi hosi. Emisaala yitsio tsisilinjiho okhwola leelo.

¹⁰Esindu sindi sisialikhwo Mwisanduku yimwo tawe nikarali amachina amabaatse kabili aka Musa yarelamwo khusikulu sia Sinai olwo MWAMI yalomba Indakano nabandu ba Isiraeli olwa bali nibarulanga Emisiri.

¹¹Olwabesaalisi bosi barula habundu hatsienukhu, bali nibesihile bosi sila okhuhendela akemikhosi chiabwe.

¹²Ne Abalawi bosi abali abembi mbu Asafu, Hemani, nende Yedutsuni halala nabandu bemubilibwa biabwe bali nibebiikhile tsingubo tsiekatani indahi. Abalawi yabo basinjila khulubeka lwebukwe wolusambwa, nibali nende amatungu, namalele nende obukhana. Ne halala n'nabo abesaalisi emia ndala namakhumi kabili bali nibakhupanga tsinzika.

¹³Abembi yabo benjisania mumwoyo mulala nende abakhupi betsinzika, namatungu, nobukhana nende amalele olwa betsoomia OMWAMI nibemba nibaboola mbu, “Mumwitsoomie OMWAMI sichila nomulahi, ne obuyanzibwe nobweinziayo.” Ma Ehekalu, inyumba yo MWAMI niyitsulamwo lilumbesi.

¹⁴Kho abesaalisi sibaali abanyala okhusinjila ma batsilil'le nende omulaamo tawe sichila inyumba yosi yali niyitsuyemwo lilumbesi niliakhanga nobulafu obumanyianga obukhongo bwo MWAMI.