Read lunyore 2 AKETSINYINGA 6 Bible Online

2 AKETSINYINGA 6 - lunyore bible

2 AKETSINYINGA 6

¹Ma omuruchi Solomoni nasaaya naboola mbu, “OMWAMI, ibe wahuye okhumenya mumalumbesi nende musiilima.

²Luno khwombokheye ehekalu yetsingufu; habundu aha nomenyenje inziayo.”

³Abandu ba Isiraeli bosi bali nibasinjiyeho. Kho omuruchi yasukhana okhubahenga ma nabasabila tsikhabi okhurula khu Nyasaye.

⁴Yaboola mbu, “OMWAMI, Nyasaye wa Isiraeli yetsoomibwe! Uhesisie esiesuho esia yali okhwesuhila papa wanje Daudi olwa yaboola mbu,

⁵‘Okhurula olwa ndahinia abandu banje Emisiri okhwola luno, sindayahulakhwo litookho musibala sia Isiraeli singa habundu hokhwombokha ehekalu aha ndakhekayakayilwa tawe. Khandi sindayelakhwo omundu undi okhwemel'la abandu ba Isiraeli tawe.

⁶Nebutswa luno mal'le okhwahula Yerusalemu singa habundu aha nandekayakayilwenje, ne nawe Daudi mal'le okhukhwela mbu wamihe abandu banje.’ ”

⁷Ma Solomoni natsilil'la okhuboola mbu, “Papa wanje Daudi yachooma okhwombokha Ehekalu khulwo okhwekayakaya OMWAMI Nyasaye wa Isiraeli,

⁸nebutswa OMWAMI yamubool'la mbu, ‘Wali habwene olwa wenya okhunyombokhela Ehekalu,

⁹nebutswa siwakhanyombokhelakhwo tawe. Omusiani uwo mwene niye owa naunyombokhele Ehekalu.’

¹⁰“Luno OMWAMI uhesisie akelisubisio lilie. Ise ndi omuruchi wa Isiraeli musilenje sia papa wanje, khandi nyombokhele Ehekalu eyokhwekayakayilamwo OMWAMI Nyasaye wa Isiraeli.

¹¹Mal'le okhura mu Hekalu tsana Lisanduku lie Indakano eyo MWAMI yalomba nabandu ba Isiraeli.”

¹²Kho imbeli wabandu bosi, Solomoni yatsia ma nasinjila imbeli wolusambwa, nachinga amakhonoke ikulu ma nasaaya.

¹³Solomoni yali niyalomba omusinji kwokhusinjilakhwo okwa yalomba khumukasa ma niyakura hakari womuchitsi. Kwali nobuchiikha obuhelana nende obubambukhu mbu etsimiita tsibili nende ebitonye b'bili biemita ne oburambi bwakwo bwali emita ndala nende ebitonye bitaru khumiita. Yaniina khumusinji yikwo, nasikama hasi ahabandu bosi bamulola ma nachinga amakhono mwikulu okhusaaya.

¹⁴Yasaaya mbu, “OMWAMI Nyasaye wa Isiraeli, abulaho nyasaye undi ofwanana n'nawe mwikulu nende khusibala. Ohesianga Indakanoyo nende abandubo ma obamanyia obuyanzibwo olwa bamenyanga mukhukhuhulila nomwoyo kwosi.

¹⁵Uhesisie lisubisio elia wesuhila papa wanje Daudi; olwaleelo amang'ana kosi kahesikhile.

¹⁶Ne luno, OMWAMI Nyasaye wa Isiraeli, saayanga mbu ohesie lisubisio lindi elia wesuhila papa wanje olwa wamubool'la mbu, khasotso nabetsenjeho mulala khubolwibulolwe owanobetsenje omuruchi wa Isiraeli, nikakhaba bakhalonda Amalako kaako singa Daudi mwene yakalonda.

¹⁷Kho luno, OMWAMI Nyasaye wa Isiraeli, olekhe amang'ana kosi kahesikhe aka wasubisia omurumikhiliwo Daudi.

¹⁸“Nebutswa siahene mbula ibe Nyasaye wakhamenya nabandu musibala noho? Kata likulu liene liosi silili likhongo eliakhanyala okhukhuhela tawe. Kho Ehekalu eya khwombokheye iyi yakhanyala mbwena okhukhuhela?

¹⁹OMWAMI Nyasaye wanje, ise ndi omurumikhili uwo. Ohulile okhusaaya khwanje, ma ungalusie akakhureebanga luno.

²⁰Olindenje Ehekalu yino om'basu nobutukhu. Ibe omwene wesuha mbu hano niho aha nawekayakayilwenje. Umbulilenje olwa nasukhanenje okhuhenga khu Hekalu yino nisaaya.

²¹Ohulile okhusaaya khwanje nende okhusaaya khwabandu baabo, Abaisiraeli olwa bahenganga khu Hekalu yino nibasaaya. Okhuhulile ma okhubeelel'le olwoli hango haho mwikulu.

²²“Omundu naba naleerwa musiina khulwo khumukhol'la owasie obubi ma aleerwe khulusambwa lulwo oluli mu Hekalu iyi khulwo okhwesuha mbu siali nesikha tawe,

²³E OMWAMI, ohulile noli mwikulu ma okhalachile abarumikhili baabo. Ohaane esinyasio khu uyo oli nesikha singa kamukhoyele ma olekhele uyo orali nesikha.

²⁴“Abandubo Abaisiraeli nibaba nibalekwa nabasuku babwe sichila bakhwoneye ibe, ne nibaba nibakhukalukhila ma betse mu Hekalu ino, nibakhusaaya mukhwechieyia mbu obalekhele,

²⁵mwatsa obahulile noli mwikulu. Obalekhele tsimbi tsiabwe ma obakalusisie esibala siabwe esia wabahelesia bo nende abakuka babwe.

²⁶“Noba niwakhekal'la ifula okhukwa sichila abandubo bakhwoneye ne nibakheyama tsimbi tsiabwe ma bahenge khu Hekalu ino, nibakhusaaya mukhwetutuyia,

²⁷E Nyasaye, obahulile noli mwikulu ma obeele okhwona khwabarumikhilibo, abandu ba Isiraeli, ma obebaal'le okhukhola akahabwene. Nilwo olwe ibe E OMWAMI olaruma ifula okhukwa khusibala sisio, esia wahelesia abandu baabo singa obulaame bwabwe inziayo.

²⁸“Inzala niyakhaba musibala nohomba olumbe nohomba kata ebiraakwa nibiakhononekha khulwo obusindu bwokhubikhakhia nohomba okhulibwa nemisinga chiechisiche, nohomba, kata abandubo nibaba nibaserwa nabasuku babwe, nohomba kata obulwaye nohomba olufu nibiakhanyoolekha mubo,

²⁹ohulile okhusaaya khwabwe. Omundu wosi khubandu baabo Abaisiraeli niyakhachingula amakhono okhusaaya khuibe mu Hekalu iyi khulwe esibeela mumwoyo kukwe,

³⁰ohulile okhusaaya khukhwe. Obahulilenje noli hango haho mwikulu ma obabeele. Ibe wenyene, wamanya amakani akali mumioyo chiabandu. Okhol'le siomundu singa obwakhoyanga,

³¹kho abandubo bakhufumie nibakhuhulila amatukhu kosi olwa bamenyanga musibala esia wahelesia abakuka befwe.

³²“Omucheni omenyanga musibala siehale naba nahul'la obwoli omukhongo khandi owetsingufu khandi singa obwoli omwerechekhu okhukhola ling'ana, ma yetse okhusaaya mu Hekalu iyi,

³³mwatsa ohulile okhusaaya khukhwe. Noli mwikulu ahomenyanga, omuhulile na omukhol'le kosi aka yakhakhureeba, kho abandu bomusibala bosi bakhumanye ibe nibakhuhulila singa abandubo Abaisiraeli bakholanga. Ma nilwo olwa balamanya mbu Ehekalu iyi eya ndakhwombokheye niyo eyokwana okhwekayakayilwa mwo.

³⁴“Noba nolaka abandubo okhutsia okhuseera abasuku babwe, nabo nibakhakhusaaya, hosi aha bakhaba nibali, nibahengele khwitookho yili elia wahula nende khu Hekalu iyi eya ndakhwombokheye,

³⁵mwatsa ohulile okhusaaya okhwabwe. Obahulile noli mwikulu ma obahe obulechi.

³⁶“Abandubo nibakhakhwonela; ne abuleho wosi orakhol'le tsimbi; ma muburima bubwo olekhe abasuku babwe babaleke ma babahile mubuhambe musibala sindi, kata esibala tsana nisiakhaba ehale okhusila,

³⁷ohulile okhusaaya khwabandu baabo. Ne nibakharula mutsimbi tsiabwe nibali musibala siehale yisio ma bakhusaaye, nibeyama tsimbi tsiabwe nende obubi bwabwe obwa bakhola ohulile okhusaaya khwabwe E OMWAMI.

³⁸Ne nikakhaba mbu nibali musibala yisio bakhalekha tsimbi tsiabwe ma mubwatooto nende mubulunji bakhusaaye nibahengele khusibala yisi esia wahelesia abakuka befwe, nokhwitookho yili elia wahula, nende khu Hekalu iyi eya ndakhwombokheye,

³⁹kho ohulile okhusaaya khwabwe. Noli hango hano mwikulu obahulile ma obabeele tsimbabasi khandi abalekhele tsimbi tsiabwe.

⁴⁰“Ne luno, E Nyasaye wanje, okhuhengekhwo ma ohulilenje amasaayo akahanwanga mu Hekalu muno.

⁴¹Luno E OMWAMI Nyasaye obukhe, ne noli ne Lisanduku lie Indakano, elimanyianga obunyali bubwo, winjile mu Hekalu ma omenyemwo inziayo. Okasie abesaalisibo mukosi aka bakholanga, ne abandu baabo bosi basangale khulwo bulahi bubwo khubo.

⁴²OMWAMI Nyasaye, orasuula omuruchi owa wela tawe. Witsul'le obuyanzi obwa wali n'nabwo khumurumikhili uwo Daudi.”