Read lunyore 2 AKETSINYINGA 7 Bible Online

2 AKETSINYINGA 7 - lunyore bible

2 AKETSINYINGA 7

¹Olwomuruchi Solomoni yali namal'le okhusaayakhwe, omul'lo kwekha okhurula mwikulu ma nikusamba emisango chiosi echiali nichihan'nwe, ne obulafu obukhongo obumanyianga mbu OMWAMI aliho bwakhosia mu Hekalu yosi.

²Ne khulwa mbu obulafu obukhongo bwali nibwakhanga mu Hekalu yosi abesaalisi sibaali abanyala okhwinjilamwo tawe.

³Olwabandu ba Isiraeli balola omul'lo nikwikhanga okhurula mwikulu ne obulafu obukhongo nibwakhanga mu Hekalu yosi, bakwa mafungama khumusinji kwamachina, nibekayakaya Nyasaye nende okhumwitsoomia khulwo bulahi bubwe nende obuyanzibwe obweinziayo.

⁴Ma Solomoni halala nende abandu bosi nibahaana emisango khu MWAMI.

⁵Yahaana emisango chietsing'ombe etsielefu amakhumi kabili nende tsibili namakondi etsielefu emia ndala namakhumi kabili singa omusango kwobuhambani. Ma nilwo olwa ye nende abandu bosi nibasaayila Ehekalu okhuchihaana khu MWAMI.

⁶Abesaalisi basinjila mubukono obwa barebwamwo ne abalawi basinjila khumukhono kundi okhuhengana n'nabo, ne betsoomia OMWAMI nobukhana bwokhukhupilamwo tsinyembo obwomuruchi Daudi yali niyahaana; khandi bemba olwembo mbu, “Obuyanzi bubwe nobweinziayo!” singa bali nibalakwa okhukhola nomuruchi Daudi Abesaalisi bakhupa tsinzika tsiabwe olwa abandu bosi bali nibasinjiye.

⁷Solomoni yasiya hakari homuchitsi, ahali imbeli we Hekalu, ma nahan'naho emisango echisambile nichili emichima, nende emisango chiobuswache, nende esinya yetsinyama chiemisango chiobuhambani. Yakhola mbwo sichila olusambwa lwomukasa olwa yali nalombele lwali olutititi okhusila ne silwakhanyal'le okhuhan'nwakhwo emisango chiosi tawe.

⁸Solomoni halala nabandu ba Isiraeli bosi bakhola Lisabo lia Mahindu khulwamatukhu kane nakataru. Khwaliho nomukanda omukali kwabandu okhurula ehale singa Mulung'anyi lwa Hamatsi oluli esinyolu nende khulwakho lwe Misiri enandete.

⁹Bali nibamal'le amatukhu kane nakataru mukhuhaana olusambwa khu MWAMI ma khandi nibamala amatukhu kandi kane nakataru okhukhola lisabo. Khwitukhu liokhumal'likha bali nomukho kwokhwikala,

¹⁰ne khwitukhu elialondakhwo, mbu litukhu lia makhumi kabili nende kataru khumwesi kwakhane nakhataru, Solomoni yaseebula abandu bakalukhe ingo. Basangal'la tsikhabi tsiosi etsio MWAMI yali nahelesisie abandube Abaisiraeli, nende Daudi nende Solomoni.

¹¹Olwomuruchi Solomoni yali namal'le okhwombokha Ehekalu nende hango hahe hoburuchi, namal'le okhuhesia lichoomo lilie obulahi,

¹²OMWAMI yalolekha khuye mubutukhu. Yamubool'la mbu, “Mbuliye okhusaaya khukhwo, ma mbuchiliye Ehekalu iyi singa habundu ahemisango nachihan'nwenje khu ise.

¹³Ne buli lwosi olwa nanzikal'lenje ifula okhukwa nohomba lwosi olwa narumenge tsisiche okhulia ebiraakwa nohomba okhuleera olumbe khubandu banje,

¹⁴ne abandu banje abalangwanga khuliira lianje nibaba nibasaaya khu ise ma baakhabe obweni bwanje, ne nibarula mutsimbi tsiabwe ma balekhe obubi bwabwe obwa bakhaba nibakholanga, kho nase nambahulile okhurula mwikulu, ma nambabeele tsimbi tsiabwe, nikhola esibala siabwe okhuba esiobuhinda khandi.

¹⁵Nanindenje Ehekalu iyi khandi nambul'lenje amasaayo kosi akasaaywanga hano,

¹⁶sichila mal'le okhuchiahula nende okhuchisiiya singa habundu aha nandekayakayilwenje inziayo. Nanjilinde nende okhuchisoola amatukhu kosi.

¹⁷Noba niurumikhila mubusubilwa singa papawo Daudi, nolinda amalako kanje ne nokhola amang'ana kosi aka ndali okhukhulaka,

¹⁸nakhole lisubisio elia ndesuhila papawo Daudi olwa ndamubool'la mbu esibala sia Isiraeli nasirukwenje nende abolwibulo lulwe inziayo.

¹⁹Nebutswa ibe nende abandu baabo nimwakhabule okhuhulila amalako nende amebaalo aka ndali okhumuhelesia, nimwekayakaya abanyasaye bandi,

²⁰kho namuhinie musibala esia ndamuhelesia khandi nakhupe Ehekalu ino omukongo eya mal'le okhusiiya singa habundu aha ngwana okhwekayakayilwa. Abandu siahabundu balatsichayilisia nibatsikhol'la obubi.

²¹“Ehekalu luno efumibwanga okhusila nebutswa olwene yilwo abandu bosi ababir'ra aheli balahuka nibareeba, ‘Nisina esiachila OMWAMI nakhola yaka khusibala yisi nende khu Hekalu iyi?’

²²Ne abandu balabakalusia nibaboola, ‘Kali khulwa mbu abandu behano balekha OMWAMI Nyasaye wabwe owabahinia Emisiri. Bahaana oluyali lwabwe khubanyasaye bandi nibabekayakaya. Nisio esiachila OMWAMI nibaler'ra likhupako yili.’ ”