Read lunyore 2 AKETSINYINGA 8 Bible Online

2 AKETSINYINGA 8 - lunyore bible

2 AKETSINYINGA 8

¹Solomoni yabukula oluhono lwemihika amakhumi kabili okhwombokha Ehekalu nende inzuye yoburuchi.

²Khandi yombokha obuhia amatookho akomuruchi Hiramu yamuhelesia ma naruma Abaisiraeli okhutsia okhumenya muko.

³Yafumila olusoma lwa Hamatsi nende Soba

⁴nende amatookho akasirwa namasisi akali mu Palimura musitsiimi. Yombokha obuhia amatookho akali Hamatsi akalinji akokhubiikha ebindu biokhukabulwa.

⁵Khandi Solomoni yombokha obuhia amatookho kano: Betsi Horoni eliemukulu nende Betsi Horoni eliemwalo (amatookho akasirwa namasisi akali nebilibwa ebinyala okhwikal'lwa),

⁶litookho lia Balatsi, amatookho kosi aka yabikhangamwo ebiokhulia, nende amatookho aketsisululi tsitsie nende amakaari kobulwani kabikhwanga. Yahesia lichoomo lilie liokhwombokha mu Yerusalemu, mu Lebanoni nende musibala siosi esia yarukanga.

⁷Solomoni yahandika abetsukhulu babandu ba Kanaani okhukhola emilimo emitinyu; yabo aba Baisiraeli babula okhwira olwa babukula esibala yisio okhuba esiabwe. Mubene yabo bali; Abahiti, Abaamori, Abaperisi, Abahiwi nende Abayebusi, ne abetsukhulu babwe basilinji butswa abasumba ba Baisiraeli okhwola leelo.

⁹Abaisiraeli sibarumikhilwakhwo mumilimo emitinyu tawe, nebutswa bakhola emilimo singa abasikari bomwihe, abemeli, etsisawoni tsiokhusinjil'la amakaari kokhulwana, nende abokhwilusia etsisululi.

¹⁰Baliho abakhongo tsimia tsibili namakhumi karano abali abasinjil'li bemilimo emitinyu echiakholwa khubwombokhi bwetsinyumba nende obwombokhi bundi.

¹¹Solomoni yahinia omukhasiwe, owali omukhaana womuruchi we Misiri, okhurula mwitookho lia Daudi namuhila munyumba eya yamwombokhela. Yali okhuboola mbu, “Sakhoya okhumenya mwitookho lia Daudi omuruchi wa Isiraeli tawe, sichila habundu hosi ahe Lisanduku lie Indakano lili habetsanga hatsienukhu.”

¹²Solomoni yakhol'la OMWAMI emisango khulusambwa olwa yali niyombokhele imbeli we Hekalu.

¹³Yahaana emisango chiokhusambwa okhulondokhana nende obwa Malako ka Musa kaboolanga khusielitukhu litsienukhu: mbu Etsisabato, Amasabo ko Mwesi Okulabile, nende amasabo kataru kabuli muhika: mbu Lisabo lio Mukaati okuralimwo Amamela, Lisabo lie Lichesa nende Lisabo lia Mahindu.

¹⁴Okhulondokhana namalako aka papawe Daudi yaraho, Solomoni yaloosia emilimo chiabulitukhu echia besaalisi nende Abalawi abakhonyel'langa abesaalisi okhwemba tsinyembo nende okhukhola emilimo chiabwe. Khandi yaloosia abalindi behekalu mumikanda khulwo khuhesia emilimo chiabwe echia bulitukhu mu siesilibwa, okhulondokhana namalako aka Daudi omundu wa Nyasaye yaraho.

¹⁵Amachetsiyio aka Daudi yali niyaha abesaalisi nende Abalawi khuketsinyumba tsiamabiikhilo nende khukamang'ana kandi, kali okhuhesibwa mububambukhu.

¹⁶Munyinga iyio ebindu biosi ebia Solomoni yaloosia okhukholwa biali okhumalwa. Okhurula khukhwombokhwa khwomusinjikwe Hekalu yo MWAMI okhwola okhumalilwa khwayo, emilimo chiosi chiakholwa bulahi.

¹⁷Ma Solomoni natsia Esionigeberi nende Elatsi, amatookho kokhunyanza Inzakhanyu musibala sia Edomu.

¹⁸Omuruchi Hiramu yamurumila etsimeeli hasi wamalako ketsisawoni tsitsie tsiene, khandi etsimeeli tsana tsiasinjil'lwa nabandu abasitsa mukhutsihila. Batsihila khumaatsi halala netsisawoni tsia Solomoni okhwola khusibala sia ofiri ma nibakalukha nibachinjiye Solomoni etsahabu okhuyomba etsikilo etsielefu likhumi natsirano.