Read lunyore 2 AKETSINYINGA 9 Bible Online

2 AKETSINYINGA 9 - lunyore bible

2 AKETSINYINGA 9

¹Omuruchi mukhasi wa Sheba yahulila ake ifuma yomuruchi Solomoni, ma nalomba oluchendo okhutsia Yerusalemu okhumuteema namareebo amatinyu. Khandi yatsia nende omukanda omukali kwabalindi baabe, nende tsingamia nitsichingile ebihunyanga bulahi, ebimili nende etsahabu inyinji. Olwomuruchi mukhasi uyo nende Solomoni babukaana, yareeba Solomoni amareebo kosi aka yapaalakhwo.

²Solomoni yakakalusia kosi; silialiho eliali litinyu khuye okhwinoosia tawe.

³Omuruchi mukhasi uyo yahul'la akobuchesi bwa Solomoni ma nalola hango homuruchi aha yali niyombokhele.

⁴Yalola ebiokhulia ebialerwa khumesa ya Solomoni, tsinyumba tsiabemelibe, obuloosie bwabakholi behango hahe nende tsingubo etsia bebiikha, netsingubo tsiabatendibe khumasabo, nende emisango etsia yahaana mu Hekalu. Yako kamumala tsingufu ma nahuka okhusila.

⁵Yamala abool'le Solomoni mbu, “Aka ndahul'la musibala sianje khuibe nende obuchesi bubwo nakatooto!

⁶Sindali okhusubila olwa ndakabool'lwa tawe okhwola olwa nzitsile omwene ma ngalutsi omwene. Aka ndahuliye sikali kata enusu yobuchesi bubwo tawe. Ibe oli nobuchesi okhuyomba obwabandu baboolanga.

⁷Mako obwa bali abanakhabi abandu yabo abakhurumikhilanga, ababetsanga n'nawe khasotso nibanyoola ikhabi yokhuhulila amang'anako akobuchesi!

⁸OMWAMI Nyasayewo yetsoomibwe! Umanyisie obwa ali nobusangali khuibe khulwo okhukhukhola omuruchi, okhwamiha muliira lilie. Khulwa mbu ye wayanza abandube Abaisiraeli ne yenyanga okhubalinda inziayo, yakhwemekhele ibe okhuba omuruchi wabwe, kho obe onyala okhuralisia amalako nende obulunji.”

⁹Yamala ahelesie omuruchi Solomoni ebihanwa ebia yali nachingile. Nabio biali etsahabu okhuyomba etsikilo etsielefu tsine nende ebihunyanga obulahi ebinji halala nende ebimili. Ebihunyanga obulahi ebiaseebwa bulahi bisili okhubakhwoho ebiyomba ebiomuruchi mukhasi wa Sheba yahelesia Solomoni.

¹⁰Abandu bomuruchi Hiramu nende abomuruchi Solomoni baleera etsahabu okhurula Ofiri, khandi baleera amachina kobukusi obutinyu ekebimili nende tsimbao tsiomuferesi.

¹¹Solomoni yarumikhila tsimbao okhulomba ebiniinilo bie Hekalu nende ebiahango homuruchi nende okhulombakhwo amatungu nende obukhana khulwa abembi. Ebindu singa yibio sibiali nibialolekhakhwo musibala sia Yuda tawe.

¹²Omuruchi Solomoni yahelesia omuruchi mukhasi wa Sheba biosi ebia yamusaba. Yibi biali okhumeeta khubindu ebia yamuha okhusilaania nebihanwa ebia yamuleer'ra. Ma omuruchi mukhasi uyo nende abalindibe bakalukha musibala sia Sheba.

¹³Buli muhika omuruchi Solomoni yanyoolanga etsikilo etsielefu amakhumi kabili natsitaru etsietsahabu,

¹⁴okhumeeta khubusuru obwarungungwa nabakhala nende abokhusilania amapesa. Abaruchi ba Arabia nende abakafuna betsisoma tsia Isiraeli nabo khandi bamuleer'ranga efetsa nende etsahabu.

¹⁵Solomoni yalomba ebikhumba ebikali tsimia tsibili, ne buli silala siahomelwakhwo etsahabu eyaruutwa enyala okhuhela ahembi etsikilo tsine natsitaru.

¹⁶Khandi yalomba tsimbili tsimia tsitaru, ne buli ndala yahomelwakhwo etsahabu eyaruutwa enyala okhuhela ahembi etsikilo tsitaru. Yalaka mbu tsiosi tsirebwe munyumba ingali eyo M'mutsuru kwa Lebanoni.

¹⁷Khandi omuruchi yalaka mbu oluruba olukali lulombwe khumeno Keinzofu ma noluhomakhwo etsahabu inzele.

¹⁸Bialiho ebiniinilo bisasaba ebiokhulwolakhwo, khandi khwaliho nesirebe nisihamban'ne n'nalwo, nisihomelwe nende etsahabu. Oluruba tsana lwali namakhono khutsimbeka tsiombi ne esifwanani siesimba siasinjisibwa khutsimbeka tsana.

¹⁹Ebifwanani bietsisimba likhumi nabibili biali khubiniinilo, buli esifwanani silala khubuli olubeka lwesininilo. Oluruba singa yilu silwali nilwalikhwoho mu bwami bwesibala siosi tawe.

²⁰Ebikombe biomuruchi Solomoni biosi bialombwa khutsahabu, ne ebindu biokhulilwakhwo munyumba ingali ya Lebanoni bialombwa khutsahabu inzele. Efetsa siyabalwa okhuba matsami mumatukhu ka Solomoni tawe.

²¹Solomoni yali netsimeeli tsinyinji etsiachendanga khunyanza nende etsimeeli tsiomuruchi Hiramu. Buli inyuma wemihika chitaru etsimeeli yitsi tsiakalukhanga nitsileera etsahabu, efetsa, ameno keinzofu, tsinguche nende amakhondo.

²²Omuruchi Solomoni yali omuhinda khandi omuchesi okhusila okhuyombakhwo omuruchi undi wosi musibala siosi.

²³Abaruchi bosi betsanga okhumureeba amang'ana kobuchesi, nibenyanga okhuhul'la obuchesi obwa Nyasaye yali namuheye.

²⁴Simulala khubo yaleer'ranga Solomoni ebihanwa mbu ebimili biefetsa nende ebietsahabu, etsikanzo, ebilasan'nwe, ebihunyanga obulahi, etsisululi nende tsinyumbu. Yaka katsilil'langa buli muhika.

²⁵Omuruchi khandi yali netsinyumba etsielefu tsine tsiokhubiikhamwo amakaari ketsisululi ne yali nende etsisululi tsiokhwilukhilakhwo etsielefu likhumi natsibili. Tsindala khutsio yatsibiikha Yerusalemu ne etsindi yatsibiikha mumatookho akabukhan'ne.

²⁶Yali omuruchi wetsingufu okhuyomba abandi okhurula khumuchela kwa Efurate okhwola Filisiti nende khulwakho lwe Misiri.

²⁷Mumatukhu koburuchi bubwe, efetsa yali ing'ayu mu Yerusalemu singa amachina, ne emisaala chiemisiita chiali eminji singa emisaala chiemikhuyu khubikulu bia Yuda.

²⁸Solomoni yakula etsisululi okhurula Emisiri nende mubibala bindi.

²⁹Akobulamu bwa Solomoni kandi kosi okhurula mukhuchaaka okhwola mukhumalila kahandiikwa musitapu siamang'ana kobulamu bwomuroobi Natsani, muburoobi bwa Ahija wa Shilo nende mumabisulo komuroobi Ido, akal'lomanga khandi khukobulamu bwa Yeroboamu wa Isiraeli.

³⁰Solomoni yamiha Isiraeli yosi nali Yerusalemu khuluhono oluhela emihika okhuyomba amakhumi kane.

³¹Yafwa ma nayabilwa mwitookho lia Daudi, ne omusianiwe Rehoboamu yabukula obukonobwe singa omuruchi.