Read lunyore ESIRA 1 Bible Online

ESIRA 1 - lunyore bible

ESIRA 1

¹Mumuhika kwokhuranga olwa Kirushi yali omuruchi wa Perisia, OMWAMI yahesia ling'ana elia yali niyaboola okhubir'ra mumuroobi Yeremia. Yachila omuruchi Kirushi, okhuhaana lilako lino nende okhuliruma mubuhandike mbu lisomwe habundu hosi musibala, ahoburuchibwe bwoolanga:

²“Kano niko aka Kirushi omuruchi wa Perisia alakanga. OMWAMI Nyasaye wo Mwikulu yabeye okhunyemekha ise okhuba omuruchi wesibala siosi. Khandi yabeye okhumbelesia omulimo kwokhumwombokhela Ehekalu mu Yerusalemu, litookho elili mu Yuda.

³OMWAMI abe n'nenywe mwesi abali abandu baabe. Omundu wosi Omuisiraeli oli mwinywe, atikulukhe atsie Yerusalemu okhwombokha Ehekalu yo MWAMI Nyasaye wa Isiraeli owekayakayilwanga Yerusalemu.

⁴Ne omundu wosi khubandu bosi abali mubuhambe, naba niyakhenya obukhonyi khulwokhukalukha Yerusalemu abamenyanibe bamukhonye nefetsa, nende etsahabu, nemiandu nemiruko, halala nende ebihanwa ebia bayanza okhuhaana khu Hekalu ya Nyasaye eli Yerusalemu.”

⁵Ma abemeli bebilibwa bia Yuda na Benjameni nibarula, nabesaalisi nende Abalawi nende abandi bosi aba Nyasaye yali natubuuye emioyo chiabwe okhutsie okhwombokha Ehekalu yo MWAMI eli Yerusalemu.

⁶Ne abarende babwe bosi nibabakhonya nebimanulwa biefetsa, netsahabu, nemiandu, nemiruko, chiokhukinga emisiko, nebindu biolukoosi, halala nende yibio ebia bayanza okhuhaana mu Hekalu.

⁷Khandi omuruchi Kirushi nahiinia ebimanulwa bie Hekalu yo MWAMI, ebia Nebukadinesa yali niyaleera okhurula Yerusalemu nabira mu Hekalu ya banyasayebe.

⁸Ebiene yibio biosi Kirushi omuruchi wa Perusia yabihiinia nabihaana m'mukhono kwa Mitsiredatsi om'biikhi wemianduchio muruchi, owabibasisia Shesibasa, Omuhandichi wa Yuda.

⁹Biosi halala biali tsindaabo amakhumi kataru tsietsahabu, tsindaabo elefu ndala tsiefetsa, etsipeseni tsiomul'lo amakhumi kabili natsine natsirano;

¹⁰etsipeseni tsietsahabu amakhumi kataru, etsipeseni tsiefetsa etsielefu tsibili tsimia tsine nende likhumi; nebimanulwa bindi elefu ndala.

¹¹Ebimanulwa biosi bietsahabu nebiefetsa biali etsielefu tsirano netsimia tsine. Yibio biosi Shesibasa Yarula n'nabio, olwa abali nibatisibwa barula Babulonia nibatsia Yerusalemu.