Read lunyore ESIRA 10 Bible Online

ESIRA 10 - lunyore bible

ESIRA 10

¹Olwa Esira yali nasaayanga, niyeyamanga, nalakaya niyekhupa hasi imbeli we Hekalu ya Nyasaye, kwaliho omukanda omukali okhusila muno kwabandu ba Isiraeli abasaatsa, nabakhasi, nabaana, kwebunjikha aha yali naali. Nabo khandi balakaya okhusila.

²Ma Shekania omwana wa Yehieli, owesilibwa sia Elamu, yabool'la Esira mbu: “Khwakosia obusubili mu Nyasaye wefwe, khulwo okhuteesia abakhasi betsimbia tsindi; ne kata kabe nikali mbwo Isiraeli esili butswa nobunaayi.

³Kho luno khwesuhe imbeli wa Nyasaye wefwe mbu nakhukhunge abakhasi yabo bosi nende abaana babeebula. Nakhulonde obuchetsiyi bubwo nende obwe yabo abamuritsanga Nyasaye wefwe. Kosi kakholwe singa obwa kali mu Malako.

⁴Sinjila, sichila nomulimo kukwo okhukakhola. Ifwe khuli inyuma uwo, weetinyie, ma okukhole.”

⁵Kho Esira nachaaka omulimokwe khulwokhukhola abemeli babesaalisi, ba Balawi nende aba Baisiraeli bosi okhwesuha mbu nabakhole aka Shekania yali okhuboola.

⁶Ma Esira narula aha yali naali imbeli we Hekalu ya Nyasaye, niyenjila munyumba ya Yehohanani omwana wa Eliashibu, nakonayo, naraliakhwo esiliibwa kata okhunywakhwo amaatsi tawe, okhuba yali niyekhulanga khulwe tsimbi tsie yabo abali nibarul'le mubuhambe.

⁷Bakhupa omunwa musibala sia Yuda siosi nende mwitookho lia Yerusalemu liosi, khubosi abarula mubuhambe mbu baakaane halala mu Yerusalemu.

⁸Omundu wosi naba narakheetsa amatukhu nikasili okhuhwa kataru tawe, okhulondokhana namalako kabemeli nende abasaakhulu bali okhuhaana, emianduchie chiosi chiakhabukulwa, naye omwene yakhakhungwa okhurula mumukanda kwe yabo abarula mubuhambe.

⁹Ma abandu bosi abamenyanga mu Yuda nende mu Benjameni nibabukan'na Yerusalemu amatukhu kataru yako nikasili okhuhwa. Kwali omwesi kwakharano nakhane nikuli amakhumi kabili; abandu bosi nibekhala musikuuri imbeli we Hekalu ya Nyasaye, nibatechela khulwe ling'ana yilio, khandi khulwe ifula eyali inyinji.

¹⁰Esira omwesaalisi naye nasinjila nababool'la mbu, “Mwakhola esikala marwi, nimuteesia abakhasi betsimbia tsindi ma nimumet'ta Isiraeli esikha.

¹¹Kho luno mumweyamile OMWAMI, Nyasaye wabakuka benywe, ma mukhole akamuyanzisia. Mweyahule okhurula khutsimbia abamenyanga musibala siefwe ma mukhunge abakhasi betsimbia tsindi.”

¹²Abandu bosi nibakalusia nibaboola nomwoyo omukali mbu, “Kabe mbwo; okhwola khukhole singa obwa obooye.

¹³Habula abandu nabenji okhusila, ne kano namatukhu akeifula inyinji; sikhunyala okhusinjilanga esioba tawe; kata chino sichili emilimo chielitukhu elala nohomba kabili tawe sichila abenji khu ifwe khwakhol'le tsimbi tsingali mumang'ana yaka.

¹⁴Lekha abemeli befwe basikale Yerusalemu ma bakhole ling'ana yili khulwomukanda kwosi. Ma uyo wosi oba niyateesia omukhasi mubetsimbia tsindi yetse khunyinga eyahuywe, halala nabemeli nabakhalachi belitookho lilie. Munjila yiyi oburima obululu bwa Nyasaye wefwe khulwe ling'ana lino bularula khu ifwe.”

¹⁵Abulaho owafukula ling'ana yilio narali Yonatsani omwana wa Asaheli nende Yaseya omwana wa Tikiwa bonyene nibongungwa omukhono nende Abalawi bano: Meshulamu nende Shabetsai.

¹⁶Abarula mubuhambe yabo bahuchil'la obuloosie yibwo, kho Esira omwesaalisi niyela abandu abokhubemeli bebilibwa, buli mulala okhurula musilibwa siabwe, ma nabahandika amera. Khwitukhu eliokhuranga khumwesi kwelikhumi bachiaka okhurunilisia ling'ana tsana,

¹⁷ne mumiesi chitaru echialondakhwo bali nibamal'le okhunyoola abasaatsa bali nibateesia abakhasi okhurula mutsimbia tsindi.

¹⁸Kano niko amera kabasaatsa abali nibateesia abakhasi okhurula mutsimbia tsindai. Abesaalisi okhulondokhana nebilibwa biabwe. Khubesilibwa sia Yoshwa omwana wa Yosadaki nabaana babwe abanyoolekhamwo bali Maaseya, Eliasa, Yaribu, nende Gedalia.

¹⁹Nabo nibahuchiil'la mbu balakhunga abakhasi babwe; ma nibahaana limiiku singa omusango khulwe tsimbi tsiabwe.

²⁰Okhurula mubesilibwa sia Imeri bali Hanani nende Sebadia.

²¹Okhurula mubesilibwa sia Harimu bali Maaseya, Eliya, Shemaya, Yelieli, nende Usia.

²²Okhurula mubesilibwa sia Pashuri, bali Elioenai, Maaseya, Ishimaeli, Netsaneli, Yosabadi, nende Elasa.

²³Okhurula mu Balawi bali, Yosabadi, Shimei, Kelaya (owalangwa eliira lindi mbu Kelita), Petsahia, Yuda, nende Elieseri.

²⁴Okhurula mubembi yali Eliashibu; ne khubalindi bebilibwa bali Shalumu, Telemu na Uri.

²⁵Khandi okhurula mutsimbia tsindi tsia Isiraeli; Abesilibwa sia Paroshi bali Ramia, Isia, Malikiya, Miyamini, Eleasari, Malikiya, nende Benaya.

²⁶Khubesilibwa sia Elamu bali, Matania, Sakaria, Yehieli, Abisi, Yeremotsi, nende Eliya.

²⁷Okhurula khubesilibwa sia Satu bali Elioenai, Eliashibu, Matania, Yeremotsi, Sabadi, nende Asisa.

²⁸Okhurula mbesilibwa sia Bebai bali Yehohanani, Hanania, Sabai, nende Atsilai.

²⁹Okhurula mubesilibwa sia Bani bali Meshulamu, Maluki, Adaya, Yashubu, Sheali, nende Yeremotsi.

³⁰Okhurula mubesilibwa sia Pahatsi Moabu bali, Adima, Kelali, Benaya, Maaseya, Matania, Besaleli, Binui, nende Manase.

³¹Okhurula mubesilibwa sia Harimu bali, Elieseri, Ishiya, Malikiya, Shemaya, Shimeoni,

³²Benjameni, Maluki, nende Shemari.

³³Okhurula mubesilibwa sia Hashumu bali, Matenai, Matata, Sabadi, Elifeleti, Yeremai, Manase, nende Shimei.

³⁴Mubesilibwa sia Bani bali Maadai, Amuramu, Uleli,

³⁵Benaya, Bedaya, Keluhi,

³⁶Wania, Meremotsi, Eliashibu,

³⁷Matania, Matenai, nende Yaasu.

³⁸Mubesilibwa sia Binui bali Shimei,

³⁹Shelemia, Natsani, Adaya,

⁴⁰Makinadebai, Shasai, Sharai,

⁴¹Asareli Shelemia, Shemaria,

⁴²Shalumu, Amaria nende Yosefu.

⁴³Abesilibwa sia Nebo bali Yeyeli, Matitsia, Sabadi, Sebina, Yadai, Yoeli, nende Benaya.

⁴⁴Abasaatsa yabo bosi bali nibateesia abakhasi okhurula mutsimbia tsindi. Babakhunga, halala nabaana babwe.