Read lunyore ESIRA 3 Bible Online

ESIRA 3 - lunyore bible

ESIRA 3

¹Olwa omwesi kwakhane nakhataru kwali nikwol'le, abandu ba Isiraeli bosi bali nibamenyele mumataala kabwe. Ma bosi nibabukan'na Yerusalemu.

²Ma Yoshwa omwana wa Yehosadaki halala nabesaalisi basie, nende Serubabeli omwana wa Shealitieli halala nabekho babwe, nibombokha obuhia olusambwa lwa Nyasaye wa Isiraeli kho babe abanyala okhuhaan'nakhwo emisango emisambe, singa obwa kahandiikwa mu Malako ka Musa, omundu wa Nyasaye.

³Bombokha olusambwa habundu halwalinji khale kata nikali bali noburi khubandu bamenya musibala yimwo, ma nibahan'na OMWAMI emisango emisambe khulusambwa yilwo. Bahaana emisango emisambe mukamba tsuli nende mukolooba.

⁴Nibalia Lisabo lia Mahindu, singa obwa kahandiikwa. Bahaana emisango emisambe chiabulitukhu, singa amalako kaboolanga echienyekhanga khwitukhu yilio.

⁵Okhumeetakhwo bahaana emisango emisambe chiakhasotso, nemisango chio Mwesi Omuyia, nokhumatukhu kamasabo ko MWAMI yahuye nende emisango chiosi chiomundu yahaana khulwokhwehaana.

⁶Okhurula khwitukhu liokhuranga eliokhumwesi kwakhane nakhataru, bachiaka okhuhaan'na OMWAMI emisango emisambe, kata nikali mbu omusinji kwe Hekalu yo MWAMI kwali nikusili okhuyabwa.

⁷Kho abandu bahaana amapesa khubombokhi bamachina nende ababaatsi khandi nibahelesia Abasidoni na Abatiro ebiokhulia nebiokhunywa namafura, okhusilaania nemisiita okhurula Lebanoni. Emisiita yichio chialeer'rwa munyanza okhwola Yopa. Yaka kosi kekholekha khulwobukhonyi bwa Kirushi omuruchi wa Perisia.

⁸Muhika kwakhabili khumwesi kwakhabili okhurula olwa boola khu Hekalu ya Nyasaye mu Yerusalemu, Serubabeli omwana wa Shealitieli nende Yeshwa omwana wa Yosadaki bachiaka emilimo, halala nabaana babwe abesaalisi nende Abalawi, nende bosi abali nibarul'le mubuhambe. Olwa bali nibool'le Yerusalemu nibela Abalawi, abali nemihika amakhumi kabili nende okhuyombakhwo okhusinjil'la emilimo chiokhwombokha Ehekalu yo MWAMI obuhia.

⁹Ma Yeshwa, nabaanabe nende abekhobe halala nende Hodawia, nasinjil'la emilimo chie Kadimieli nabaanabe (abesilibwa sia Hodawia) bali okhuhambana okhusinjil'la omulimo kwokhwombookha Ehekalu ya Nyasaye. Bakhonyel'lwa nende Abalawi bolwibulo lwa Henadadi.

¹⁰Ma olwa abombokhi balomba omusinji kwe Hekalu yo MWAMI, abesaalisi basinjila mubukono bwabwe, nibebiikhile tsingubo tsiobwesaalisi, nibali netsitarumbeta mumakhono kabwe, halala nende Abesaalisi besilibwa sia Asafu, nibali nebisilili, khulwokhwitsoomia OMWAMI singa obwa obwibaali bwa Daudi omuruchi wa Isiraeli bwali.

¹¹Nibemba nibetsoomia OMWAMI nokhumukhupila embwo nibaboola mbu: “OMWAMI nomulahi, obuyanzibwe oburalilu khu Isiraeli nobweinziayo.” Abandu bosi nibahanzuukha butinyu nibafumianga OMWAMI, sichila omusinji kwe Hekalu yo MWAMI kwali nikulombelwe.

¹²Nebutswa abenji khubesaalisi nende khubalawi nabemeli bebilibwa, abali nibali abasaakhulu abalola Ehekalu yokhuranga, balakaya amasika amenji kene olwa balola omusinji kwe Hekalu yino nikulombwa; abenji nibahanzuukha khulwobusangali,

¹³okhwola olwabandu baramwa okhwabukhania eliyoka liobusangali nende liyoka liobulakayi bwabandu; okhuba abandu bahanzuukha butinyu, amayoosi nikahulilikhila okhwola ehale.