Read lunyore ESIRA 4 Bible Online

ESIRA 4 - lunyore bible

ESIRA 4

¹Ne olwa abasuku ba Yuda na Benjameni bahul'la singa obwe yabo abarula mubuhambe bali nibombokhelanga OMWAMI Nyasaye wa Isiraeli Ehekalu,

²batsia khu Serubabeli nabemeli bebilibwa, nibabool'la mbu “Lekhe khumukhonye okhwombokha Ehekalu sichila khwekayakayanga Nyasaye mulala singa owe inywe mwekayakayanga, khandi khuhaananga emisango khuye okhurula m'matukhu ka Esari Hadoni omuruchi wa Asiria, owakhuleera hano.”

³Nebutswa Serubabeli nende Yeshwa, nabandi bosi abokhubemeli bebilibwa bia Isiraeli, babakalusia nibaboola: “Sikhwenya obukhonyi bwenywe, khulwo khwombokhela Nyasaye wefwe Ehekalu tawe, nebutswa ifwe abene fwenyene khulombokhela OMWAMI, Nyasaye wa Isiraeli, singa omuruchi Kirushi, omuruchi wa Perisia yakhulaka.”

⁴Kho abandu besibala yisio bafwisia abandu ba Yuda emioyo, nibabarisia okhwombokha.

⁵Khandi bahetsa abemeli boburuchi bwa Perisia mbu babafukule, kho balekhe okhwombokha. Batsilil'la okhukhola mbwo mumatukhu kosi aka Kirushi yali omuruchi wa Perisia, kata okhwola mumatukhu aka Dario yali omuruchi wa Perisia.

⁶Ma muburuchi bwa Ahaswero, mukhuchaaka khwokhurukakhwe, abasuku babandu abamenyanga mu Yuda nende Yerusalemu bahandika amang'ana kokhubenjil'la.

⁷Khandi mumatukhu koburuchi bwa Aritasasita, Bishilamu, Mitsiredatsi, Tabeeli nabasiabwe bandi bamuhandiichila Aritasasita omuruchi wa Perisia ebarwa. Ebarwa tsana yahandiikwa mul'limi lwa Aramu ma nekalulwa olweba nesomwanga.

⁸Rehumu omukafuna nende Shimishai omuhandichi wolusoma, bahandichila Aritasasita ebarwa yokhufukula Yerusalemu singa mbu:

⁹“Okhurula khu Rehumu omukafuna, nende khu Shimishai omuhandichi wolusoma, nende okhurula basiabwe bandi abali abakhalachi bemise, khandi okhurula khubemeli bandi abarula Areki, Babulonia, nende Susa esibala sia Elamu halala

¹⁰nabamahanga kandi aka Ashurubanipali omukhongo wolukoosi yaatisia ma nabara mwitookho lia Samaria nende habundu hosi mulusoma oluli emasaba womuchela kwa Efurate.”

¹¹Kano niko amang'ana kokhubarwa eya bahandika nibayila: “Khumuruchi Aritasasita: Ifwe abarumikhilibo abandu okhurula emasaba womuchela khukhurumilanga amasiesi.

¹²“Khwakhekomba omanye mbu Abayahudi ababeye okhwitsa hano okhurula mutsisomatsio tsindi tsioburuchibwo, bamal'le okhutsia Yerusalemu ne luno bombokhanga obuhia litookho liibi khandi elieinduli l'la. Bachiaka okhwombokha amasisi ne nababe nibakamalilanga bwangu.

¹³Omuruchi, okwan'ne okhumanya mbu litookho lino niliba niliombokhwa obuhia ne amasisi kalio nikamalilwa, abandu nabalekhe okhurunga obusuru, nohomba kata omurungo kundi kwosi ne amapesa komuruchi anyoolanga kalatitiha okhusila.

¹⁴Ne luno, sichila ifwe khunywetsanga khuchumbi[2] yomunzu yomuruchi, sikhwakhekomba khulole omuruchi nafwolwa tawe, niko akachil'le nikhulola nobulahi khukhumanyie;

¹⁵Kho olake amang'ana karunilisibwe musitapu siamang'ana kabakukabo. Nokhola mbwo alakanyoola musitapu siamang'ana tsana nomanya singa obwe litookho lino lili elieinduli, khandi okhurula khale elileer'ranga omuruchi nende abemeli betsingongotsie amatinyu. Bandu balio babetsanga abatinyu okhubaruka. Niko akachila litookho lino nilimululwa.

¹⁶Khulwe yako khumanyile mbu litookho lino niliba niliakhamalwa okhwombokhwa, ma amasisi kalio nikamalwa okhwombokhwa, ibe omuruchi sinobe onyala okhuhamiha khulusoma oluli emasaba womuchela kwa Efurate tawe.”

¹⁷Ma omuruchi nabarumila likalusio lino; “Khu Rehumu, omukafuna, nende Shimishai omuhandichi wolusoma nabasienywe bandi abamenyanga Samaria nende tsisoma tsindi etsili emasaba womuchela kwa Efurate, nyoole emilembe.

¹⁸“Ebarwa eya mwakhuleer'ra ndasomelwa khandi yakalulwa bulahi.

¹⁹Nase ndahaana omunwa mbu amang'ana yako, karunilisibwe ma nikanyoolekha mbu okhurula mumatukhu ka khale Yerusalemu liakholanga indiri khubaruchi nende okhubafukula khandi liayitsulamwo abandu beinduli abokhuleera amanyakhano.

²⁰Khandi Yerusalemu lialimwo abaruchi betsingufu, abarukanga mulusoma lwosi oluli emasaba womuchela kwa Efurate nibahebungwa obusuru, nemirungo chindi.

²¹Khulwe yako mubahelesie lilako nimusinjisia abandu yabo okhwombokha litookho yilio okhwola olwa ndakhahaane lilako lindi.

²²Mukhole akene yaka bwangu, kho amang'ana amabi kalekhe khwekhola khu ise.”

²³Ma olwa ebarwa yomuruchi Aritasasita yasomelwa Rehumu omukafuna, Shimishai omuhandichi, nabasiabwe, batsia bwangu Yerusalemu khu Bayahudi, ma nibabahakia balekhe okhwombokha litookho.

²⁴Emilimo chie Hekalu ya Nyasaye eli Yerusalemu chiali nichiasinjisibwa ma chiasinjila mbwo okhwola khumuhika kwakhabili kwoburuchi bwa Dario, omuruchi wa Perisia.