Read lunyore ESIRA 5 Bible Online

ESIRA 5 - lunyore bible

ESIRA 5

¹Mumatukhu yako omuroobi Hagai nende omuroobi Sakaria omwana wa Ido, bali khuroobela Abayahudi bali mu Yuda nende Yerusalemu, muliira lia Nyasaye wa Isiraeli.

²Ne olwa Serubabeli omwana wa Shealitieli nende Yeshwa omwana Yehosadaki bahul'la amang'ana koburoobi yibwo, bachiaka okhwombokha Ehekalu ya Nyasaye eli Yerusalemu. Abaroobi ba Nyasaye babili yabo bali halala n'nabo nibabakhonya.

³Ne munyinga yene iyo Tatenai, omukafuna wolusoma oluli emasaba womuchela kwa Efurate halala nende Shetsari Bosenai nende abasiabwe, betsa Yerusalemu nibabareeba mbu “Niwina owamuhelesia omunwa okhwombokha Ehekalu yino nokhumal'lisia obwombokhi buno?”

⁴Khandi nibabareeba mbu “Amera kabandu abakhonyanga obwombokhi buno nibena?”

⁵Nebutswa Nyasaye yali nahenganga abemeli ba Bayahudi, ne abemeli ba abandu ba Perisia yabo sibakholakhwo esindu siosi tawe, okhwola olwa bakhaba nibahandichiye omuruchi Dario ebarwa, ma nibanyooye likalusio.

⁶Yino niyo ebarwa eya Tatenai, omukafuna wolusoma oluli emasaba womuchela kwa Efurate halala nende Shetsari nende Bosenai, nabakafuna basie, bahandichila omuruchi Dario:

⁷“Khumuruchi Dario, omulembe kube khwiwe.

⁸“Ibe omuruchi okwana okhumanya mbu khwatsiiye mulusoma lwa Yuda, khu Hekalu ya Nyasaye omukhongo. Khwanyooye mbu Ehekalu iyio yombokhelwanga amachina amakali, ne emisaala nichialwa mumasisi. Emilimo yichio chitsitsachil'langa nesinani, khandi chikholwanga bulahi.

⁹“Kho khwamal'le nikhureeba abemeli babandu mbu, ‘Niwina owamuhelesia omunwa okhwombokha Ehekalu yino, nende okhumalilisia omwombokho kuno?’

¹⁰Khandi nikhubareeba amera kabwe, kho khube abanyala okhukhumanyia, abemeli abasinjiliye omulimo tsana.

¹¹“Nabo bakhukalusia nibaboola mbu, ‘Khuli abarumikhili ba Nyasaye womwikulu nende esibala ne, khwombokhanga Ehekalu yino eyombokhwa ma nimalilwa emihika eminji echiabira nomuruchi omukhongo wa Isiraeli.

¹²Ne sichila abakuka befwe bali okhuchema Nyasaye weikulu okhusila lirima, yabahaana m'mukhono kwa Nebukadinesa omuruchi wa Babulonia, omuruchi wolwibulo lwa Bakalidayo. Niye owasambula Ehekalu yino, nahila abandu mubuhambe Babulonia.

¹³Ne mumuhika kwokhuranga kwa Kirushi omuruchi wa Babulonia omuruchi Kirushi yahaana omunwa mbu Ehekalu ya Nyasaye yino yombokhwe.

¹⁴Yakalusia ebimanulwa bietsahabu nebiefetsa ebiomu Hekalu ya Nyasaye, ebia Nebukadinesa yahiinia mu Hekalu eli Yerusalemu nabira mu Hekalu ya Babulonia. Omuruchi Kirushi yabihiinia mu Hekalu ya Babulonia nabihaana khumundu owalangwa mbu Shesibasa, owa yali niyemekha abe omukafuna wa Yuda.

¹⁵Yamubool'la mbu abibukule ma abikalusie mu Hekalu eli Yerusalemu ma yombokhe Ehekalu ya Nyasaye obuhia habundu hayalinji khale.

¹⁶Ma Shesibasa niyetsa nalomba omusinji kwe Hekalu ya Nyasaye eli Yerusalemu; ne okhurula khumatukhu yako okhwola olwaleelo, yombokhwanga, ne esili okhuhwa.’

¹⁷“Kho luno, ibe omuruchi noba noyanza, lekha abandu barunilisie mwibiikhilo liebitapu biomuruchi elili Babulonia, banyoole nikali omuruchi Kirushi yahaana omunwa Ehekalu ya Nyasaye eli Yerusalemu yombokhwe nohomba tawe; ma okhumanyia inganakani yiyo khwing'ana lino.”