Read lunyore ESIRA 6 Bible Online

ESIRA 6 - lunyore bible

ESIRA 6

¹Kho Omuruchi Dario, yahaana omunwa mbu abandu barunilisie amang'ana yaka mubitapu bioburuchi ebili mu Babulonia.

²Nebutswa esitapu sianyoolekha mwitookho lia Ekibatana, elili mulusoma lwa Media; nasio siali nisiahandiikwamwo amang'ana kano mbu:

³“Mumuhika kwokhuranga kwoburuchi bwa Kirushi, omuruchi yahaana lilako mbu Ehekalu eli mu Yerusalemu yombokhwe obuhia singa habundu hokhuhan'na emisango, khandi hokhusambilaho emisango. Oburambi bwayo bube etsimiita amakhumi kabili nachine natsitaru, khandi obuchiikha bwayo bube etsimiita amakhumi kabili nachine nachitaru.

⁴Amasisi kayo kombokhelwemwo amachina amakali etsilaini tsitaru, ne emisaala elaini ndala chiombokhwe ikulu wamachina tsana. Emirungo chiosi echienyekha chirulenje mwibiikhilo liomuruchi.

⁵Khandi ebimanulwa bietsahabu nebiefetsa bie Hekalu ya Nyasaye, ebia Nebukadinesa yahiinia mu Hekalu Yerusalemu nabira Babulonia, bikalusibwe nibihilwa khandi mu Hekalu eli Yerusalemu, buli sindu habundu hasio mubukono bwa sialombelwa.”

⁶Kho Dario yahaana likalusio lino mbu: “Khu Tatenai omukafuna wolusoma oluli emasaba womuchela kwa Efurate, nende khu Shetsari Bosenai, halala nabasienywe abali emasaba womuchela kwa Efurate. “Mube ehale okhurula khu Hekalu.

⁷Murenjil'la emilimo chiokhwombokha Ehekalu ya Nyasaye yiyo tawe. Mulekhe omukafuna wa Bayahudi nabemeli ba Bayahudi bombokhe Ehekalu ya Nyasaye obuhia habundu hayalinji khale.

⁸Khandi luno ndakanga mbu mubakhonyel'lenje okhwombokha obuhia Ehekalu iyio. Oburumikhi bwabwe bwosi naburungwenje okhurula khumiandu chiomuruchi, echirulanga khubusuru obuhinibwanga mubandu abali emasaba womuchela kwa Efurate kho omulimo kulekhe okhusinjisibwa.

⁹Bulitukhu sila okhuchweya namuhelesienjia abesaalisi mu Yerusalemu biosi ebia bakhenya. Namubahelesienje etsichulukhi echisikhula nebimeme biamakondi khulwokhusambwa singa emisango emisambe chia Nyasaye welikulu, nohomba ingano, echumbi, ewaini, namafura komuseituni.

¹⁰Yaka kakholwenge kho babe abanyala okhuhaana emisango echihuchil'lwanga khu Nyasaye welikulu nibasaayila ise tsikhabi nende abaana banje.

¹¹Khandi mbaananga lilako mbu omundu wosi naba naralonda lilako lino, omukuulo kutsomolwe okhurula khunyumbaye kubatswe emurwe wakwo ma kufumirwe okhubir'ra m'mubili mumwe putu. Inyumbaye nayo ekholwe esifuumi siamakokha khulwe ling'ana yilio.

¹²Ne Nyasaye mwene uyo owali okhwela Yerusalemu singa habundu hokhwekayakayilwa amulule omuruchi wosi nohomba lihanga liosi eliteemanga okhusuula okhulonda lilako yili nende okhumuma Ehekalu ya Nyasaye eli Yerusalemu. Ise Dario mal'le okhulaka. Okhwola lilondwe nesinani.”

¹³Kho Tatenai omukafuna wolusoma oluli emasaba womuchela kwa Efurate, nende Shetsari Bosenai nabasiabwe bosi, bakhola amang'ana kosi akomuruchi Dario yali nabalachile.

¹⁴Abemeli ba Bayahudi nabo nibatsitsachil'la okhwombokha khulwa okhutsubwa khwabaroobi Hagai nende Sakaria omwana wa Ido. Bamala okhwombokha Ehekalu singa bali nibalakwa nende Nyasaye wa Isiraeli nende Kirushi, Dario nende Aritasasita abaruchi ba Perisia.

¹⁵Ma Ehekalu tsana yali okhuhwa khwitukhu liakhataru eliomwesi kwa Adari mumuhika kwakhasasaba kwoburuchi bwa Dario omuruchi wa Perisia.

¹⁶Ma abandu ba Isiraeli, abesaalisi, Abalawi nabandi bosi abarula mubuhambe, bali okhusangal'la okhuhanwa khwe Ehekalu khu Nyasaye.

¹⁷Khulwo khusaayila Ehekalu ya Nyasaye y'yo bakhola omusango khulwo khuhaana etsichulukhi emia ndala, namamiiku etsimia tsibili, nebimeme biamakondi etsimia tsine, nende etsikhole likhumi nachibili singa omusango kwetsimbi khulwa Isiraeli yosi, buli ekhole ndala khubuli olwibulo lwa Isiraeli.

¹⁸Khandi nibarechekha abesaalisi nende Abalawi mubukono bwabwe khulwokhukhola emilimo mu Hekalu eli Yerusalemu singa obwa kahandiikwa musitapu sia Musa.

¹⁹Yabo abakalukha okhurula mubuhambe yibwo balia Epasaka khwitukhu lielikhumi nakhane liomumwesi kwokhuranga khumuhika okwalondakhwo.

²⁰Abesaalisi bosi nende Abalawi bosi bali nibesiiyile ma nibaba abasiiyikhu bosi. Abalawi beera emiruko khulwo omusango kwe Pasaka khulwabo bosi abakalukha okhurula mubuhambe, nende khulwa abesaalisi, khandi khulwabwe abene.

²¹Emisango chie Pasaka chialibwa nabandu ba Isiraeli nabo abali ba Isiraeli bosi abali nibacheleye okhurula mubuhambe, nende bosi abali nibeyonga n'nabo, abali nibalekhana nobwekayakayi bwabanasibala abamenyanga musibala, ma abali nibetsele okhwekayakaya OMWAMI, Nyasaye wa Isiraeli.

²²Khulwa amatukhu kane nakataru besangasia Mwisabo lio Mukaati Kuralimwo amamela. Bali nobusangali obwinji sichila OMWAMI yali nachil'le omuruchi wa Asiria okhuba omulahi khubo ma nabakhonya omulimo kwokhwombookha obuhia Ehekalu ya Nyasaye wa Isiraeli.