Read lunyore ESIRA 7 Bible Online

ESIRA 7 - lunyore bible

ESIRA 7

¹Inyuma wemihika eminji, mumatukhu ka Aritasasita yali omuruchi wa Perisia, khwaliho nomundu owalanga Esira. Esira tsana yali omwana wa Seraya, ne Seraya yali omwana wa Asaria, ne Asaria yali omwana wa Hilikia,

²ne Hilikia yali omwana wa Shalumu, ne Shalumu yali omwana wa Sadoku, ne Sadoku yali omwana wa Ahitubu

³ne Ahitubu yali omwana wa Amaria ne Amaria yali omwana wa Asaria, ne Asaria yali omwana wa Merayotsi,

⁴ne Merayotsi yali omwana wa Serahaya, ne Serahaya yali omwana wa Buki,

⁵ne Buki yali omwana wa Abishua, ne Abishua yali omwana wa Fenihasi, ne Fenihasi yali omwana wa Eleasari omwana wa Haruni Omwesaalisi Omukhongo.

⁶Esira mwene uyo yatikulukha okhurula Babulonia; yali omuhandichi omusitsa mumang'ana kamalako ka Musa, aka OMWAMI, Nyasaye wa Isiraeli yali niyahaana; ne omuruchi yahuchil'la kosi aka yamusaba, sichila tsikhabi tsio MWAMI Nyasaye tsiali n'naye.

⁷Khandi Abaisiraeli bandi abarula n'naye halala bali abesaalisi, Abalawi, Abembi, abalindi bebilibwa, nende abakholi abomuhekalu; niboola Yerusalemu mumuhika kwakhane nakhataru kwoburuchi bwa Aritasasita;

⁸Esira yoola Yerusalemu mumwesi kwakharano mumuhika kwakhane nakhataru yikwo.

⁹Yachiaka oluchendo lwokhurula Babulonia khwitukhu liokhuranga mumwesi kwokhuranga ma khwitukhu liokhuranga khumwesi kwakharano niyoola Yerusalemu, sichila obukhonyi bwa Nyasaye uwe bwali khuye.

¹⁰Esira yali niyarakhwo omwoyo okhusoma amalako ko MWAMI nokhukakhola, nende okhukebaala khu Baisiraeli bosi singa kalakwa nende okhukhalakwa.

¹¹Yino niyo ebarwa eyomuruchi Aritasasita yahelesia Esira omwesaalisi khandi omuhandichi, owali niyamanya amang'ana kamalako nende amebaalo ko MWAMI yali niyahelesia Isiraeli:

¹²“Ebarwa okhurula khu Aritasasita omuruchi wabaruchi; yoole khu Esira omwesaalisi, khandi omuhandichi wamalako ka Nyasaye welikulu.

¹³“Ise ndakanga mbu bosi abali Abaisiraeli nabesaalisi babwe, na Abalawi, abali muburuchi bwanje, abakhenya khulwokhuyanza khwabwe abene okhutsia Yerusalemu, batsie halala n'nawe.

¹⁴Nawe, ise halala nabachetsiyi banje bane nabataru, khukhurumanga mbu otsie okhurunilisia mu Yuda na Yerusalemu, nikali amalako ka Nyasaye uwo yakhureela m'mukhono kalondwanga bulahi.

¹⁵Otsie nende efetsa netsahabu ebie ise omuruchi nende abachetsiyi banje khuyanzanga okhuha Nyasaye wa Isiraeli, owe Hekaluye eli Yerusalemu.

¹⁶Khandi obukule efetsa netsahabu yosi eya alanyoola mulusoma lwosi olwa Babulonia, halala nebihanwa ebiabandu ba Isiraeli nende abesaalisi babwe bali okhuhaana khulwe Ehekalu ya Nyasaye wabwe eli Yerusalemu.

¹⁷“Orumikhile amapesa kano bulahi ma okule etsichulukhi, namamiiku, nende ebimeme biamakondi, halala nemisango chiabio chiobuswache nemisango chiewaini, ma mubihan'ne khulusambwa lwe Ehekalu ya Nyasaye wenywe eli Yerusalemu.

¹⁸Ne yako kosi akakholekha amalahi khuibe nabandu basio, munyala okhurumikhila efetsa netsahabu eyakhaba nesikala, okhulondokhana nobulalilo bwa Nyasaye wenywe.

¹⁹Ne ebindu biosi ebia waheebwa khulwokhutiyila mu Hekalu ya Nyasayewo, obihaane imbeli wa Nyasaye wa Yerusalemu.

²⁰Kata nende ebindu bindi biosi ebiakhenyekha mu Hekalu ya Nyasaye wenywe, ebia wakhaba nokhoyela okhuhaana, obibukule okhurula khumiandu chielibikhilo liomuruchi.

²¹“Luno ise, omuruchi Aritasasita, ndakanga ababiikhi bosi abali emasaba womuchela kwa Efurate mbu bahaane esindu siosi esia Esira omwesaalisi, khandi omuhandichi wa Amalako ka Nyasaye welikulu, yakhareeba.

²²Bahaane okhwola khutsikilo etsielefu tsitaru netsimia tsine etsiefetsa, etsikilo etsielefu likhumi etsieingano, etsiliita etsielefu tsibili etsiewaini, etsiliita etsielefu tsibili tsiamafura komuseituni nende echumbi inyinji singa yakhenyekha.

²³Liosi liosi elia Nyasaye welikulu alaka, likholwe habwene khulwe Hekalu ya Nyasaye welikulu; ma oteme olole mbu Nyasaye sialikhwo noburima khu ise nohomba khuyabo abakharuke inyuma wanje tawe.

²⁴Nomusilo okhurunjia abesaalisi, na Balawi, nabembi, nabalindi bebilibwa, nabakholi bomuhekalu, kata nende abakholi bandi be Ehekalu ya Nyasaye yino, obusuru, nohomba omurungo kundi kwosi.

²⁵“Nawe Esira, khulwobuchesi obwa Nyasayewo yakhuhelesia, weele abakaluli, nabakhalachi abalayaasinjia abandu bosi abali emasaba womuchela kwa Efurate, yabo bosi abamenyelanga amalako ka Nyasayewo. Okhwola wibaale amalako yako khumundu wosi orakamanya.

²⁶Ne omundu wosi oralonda amalako ka Nyasayewo nende amalako kanje ise omuruchi, okhwola aheebwe esinyasio esihela; anyala okhwirwa, nohomba okhwatisibwa, nohomba okhupeeywa emiandu nohomba okhubohwa.”

²⁷Esira yaboola mbu “OMWAMI Nyasaye wabakuka befwe yeetsoomibwe, khulwokhura ling'ana lilahi yilio mumwoyo kwomuruchi okhuhaana oluyali khu Hekalu yo MWAMI eli Yerusalemu munjila singa yiyi.

²⁸Khulwesirenda sia Nyasaye, mal'le okhunyoola amalahi imbeli womuruchi, nabachetsiyibe nabesiina, nende imbeli wabemeli bobunyali bwomuruchi. OMWAMI, Nyasaye wanje yali okhumbelesia ikholo nyomu, ma uchil'le mbunjelesisie abemeli abenji abebilibwa bia Isiraeli mbu khurule khutsie n'nabo.”