Read lunyore ESIRA 8 Bible Online

ESIRA 8 - lunyore bible

ESIRA 8

¹Bano nibo abeemeli bebilibwa, khandi buno nibwo obulondokhani bwetsinzibulo etsie yabo abakalukha okhurula mubuhambe Babulonia nende Esira, mumatukhu koburuchi bwa Aritasasita.

²Khubesilibwa sia Fenihasi yali Gerishomu; khubesilibwa sia Itsamari, yali Danieli; khubesilibwa sia Daudi, yali Hatushi

³owokhulwibulo lwa Shekania; khubesilibwa sia Paroshi, yali Sakaria, ne halala n'naye, baliho abes'saatsa emia ndala namakhumi karano abahandikwa amera,

⁴khubesilibwa sia Pahatsi Moabu, yali Eliehoenai omwana wa Serahaya ne halala n'naye, baliho abes'saatsa etsimia tsibili.

⁵Khubesilibwa sa Satu yali Shekania omwana wa Yahasieli, ne halala n'naye, baliho abes'saatsa tsimia tsibili.

⁶Khubesilibwa sia Adini yali Ebedi omwana wa Yonatsani ne halala n'naye, abes'saatsa amakhumi karano.

⁷Khubesilibwa sia Elamu, yali Yeshaya omwana wa Atsalia; ne halala n'naye, baliho abes'saatsa amakhumi kane na kataru.

⁸Khubesilibwa sia Shefatia, yali Sebadia omwana wa Mikaeli, ne halala n'naye, baliho abes'saatsa amakhumi munane.

⁹Khubesilibwa sia Yoabu, yali Obadia omwana wa Yehieli, ne halala n'naye, baliho abes'saatsa tsimia tsibili likhumi namunane.

¹⁰Khubesilibwa sia Bani, yali Shelomitsi omwana wa Yosifia; ne halala n'naye, baliho abes'saatsa emia ndala namakhumi kasasaba.

¹¹Khubesilibwa sia Behai, yali Sakaria omwana wa Bebai ne halala n'naye, baliho abes'saatsa amakhumi kabili namunane.

¹²Khubesilibwa sia Asikadi, yali Yohanani omwana wa Hakatani, ne halala n'naye, baliho abes'saatsa emia nende likhumi.

¹³Khubesilibwa sia Adonikamu, bali Elifeleti, Yeweli, nende Shemaya, ne halala n'nabo, baliho abes'saatsa amakhumi kasasaba.

¹⁴Ne abesilibwa sia Bigiwai, bali Utsai nende Sabudi, ne halala n'nabo, baliho abes'saatsa amakhumi kane nakataru.

¹⁵Ndabunjelesia abandu bosi halala hamuchela okubir'ranga khwitaala lia Ahawa ma nikhukhupaho ekambi khulwamatukhu kataru. Olwa ndakoola mubandu nende mubesaalisi bulahi, sindanyoola mubo omundu wosi khubolwibulo lwa Lawi tawe.

¹⁶Ma nirumana okhulanga abemeli bano. Eliasa, na Arieli, Shemaya, Elinatsani, Yaribu, Elinatsani, Natsani, Sakaria nende Meshulamu nende abebaali babili mbu; Yoyaribu nende Elinatsani.

¹⁷Ma nimbaruma khu Ido, omwemeli wabandu bamenyanga Kasifa, nimbabool'la bareebe Ido nabasie abali abarumikhili bomuhekalu, mbu bakhuleer're abandu bokhurumikhila Nyasaye wefwe mu Hekalu.

¹⁸Ne khulwo obukhonyi bwa Nyasaye wefwe bakhuleer'ra Sherebia, omundu omuchesi, Omulawi okhurula musilibwa sia Mahili halala nabasiani babwe nende abaanabe, bali likhumi namunane.

¹⁹Khandi bakhurumila Hashabia halala nende Yeshaya okhurula musilibwa sia Merari, halala nabekho babwe, amakhumi kabili.

²⁰Okhumeetakhwo baruma abakholi bomuhekalu, etsimia tsibili namakhumi kabili, aba Daudi nende abemelibe bali nibela khulwo okhukhonyel'la Abalawi, ne bosi bahandiikwa amera.

²¹Nindi hamuchela kwa Ahawa, ndahaana amalako mbu fwesi khuhonge okhulia khandi khwetuutuyie imbeli wa Nyasaye, ma khumureebe akaasie oluchendo lwefwe lube ol'lahi, khandi akhusoole ifwe halala nende abaana befwe, nemianduchiefwe chiosi.

²²Ndali okhusimba omurwe okhusaba omuruchi omukanda kwabasikari ne yabo abokhuchenda khusululi mbu bakhusoole okhurula khubasuku abali khunjila; sichila khwali nikhumubooleye mbu, Nyasaye akhonyanga omundu wosi osubilanga muye, nebutswa abihil'lwanga nahaana esinyasio khuyabo abamukhupanga omukongo.

²³Kho khwahonga okhulia nikhusaaya Nyasaye wefwe mbu akhusoole, naye yakalusia amasaayo kefwe.

²⁴Ma ninzahula abandu likhumi nababili abokhubemeli babesaalisi, halala nende Sherebia, nende Hashabia nende abaana babwe likhumi.

²⁵Ma ninjela efetsa, netsahabu, nende ebimanulwa, biomuruchi, nabachetsiyibe nende abemelibe halala nende ebia Baisiraeli bosi abali nibaliho, bali nibahaan'ne khulwokhurumikhilwa mu Hekalu ya Nyasaye ma nimbihaana khubesaalisi.

²⁶Ndachela etsitani amakhumi kabili natsibili tsiefetsa, netsikilo amakhumi kane nakataru tsiebimanulwa biefetsa emia ndala, netsikilo etsielefu tsitaru netsimia tsine tsietsahabu,

²⁷etsindaabo tsietsahabu tsitaru netsimia tsine tsietsahabu, amakhumi kabili, etsiahela etsikilo munane netsiguramu tsine, halala netsindaabo tsiomukasa okwarutwa tsibili etsiobukusi obuhelana nende tsindaabo tsietsahabu, nimbihaana mumakhono kabwe.

²⁸Ndababool'la mbu “Inywe muli abatsienukhubo MWAMI Nyasaye wabakuka benywe, khandi nimbwo ebimanulwa biefetsa netsahabu, ebialeerwa khuye singa omusango kwobwehaani bili ebitsienukhu.

²⁹Mubetsenje meeso nimubilinda okhwola olwa mwakhoole Yerusalemu. Ebwene iyo mubikoti biabesaalisi mwakhabichele ma mubihaana khubemeli babesaalisi nende abalawi Baisiraeli mu Yerusalemu.”

³⁰Kho abesaalisi nende Abalawi babukula efetsa netsahabu, nende ebimanulwa okhubihila Yerusalemu, mu Hekalu ya Nyasaye wabwe.

³¹Khwarula hamuchela kwa Ahawa khwitukhu lielikhumi nakhabili mumwesi kwokhuranga, okhutsia Yerusalemu. Nyasaye wefwe yali halala n'nefwe ma nakhusoola okhurula khubasuku befwe nende khu yabo abakhwekonekhela olwa khwali khuluchendo.

³²Olwakhwoola Yerusalemu khwahulukhilaho khulwamatukhu kataru.

³³Ma khwitukhu liakhane, khwatsia mu Hekalu ya Nyasaye nikhuchela obusiro bwefetsa nende etsahabu nende obwe bimanulwa ma nikhubira mumakhono komwesaalisi Meremotsi, omusiani wa Uria. Yali nali nende Eliasa omusiani wa Fenihasi nende Abalawi babili mbu Yosabadi omusiani wa Yeshwa, nende Noadia omusiani wa Binui.

³⁴Ebindu biosi biabalwa nende okhuchelwa obusiro, ma nibeerebwa mubuhandike olwene ilwo.

³⁵Mumatukhu yako bosi abakalukha okhurula mubuhambe bahaan'na Nyasaye wa Isiraeli emisango emisambe. Bahaana etsichulukhi likhumi nachibili khulwa Isiraeli yosi, namamiiku amakhumi karano nakane nakasasaba, ebimeme biamakondi amakhumi kane nakataru nakane nakataru, netsikhole likhumi natsibili khulwomusango kwetsimbi. Yibio biosi biahaanwa khu MWAMI singa omusango omusambe.

³⁶Khandi nibabukula etsibarwa tsiomuruchi yali nabaheye nibahelesia abakafuna nende abemeli besibala esili emasaba womuchela kwa Efurate, abamala nibahaana obukhonyi khubo nende khu Hekalu ya Nyasaye.