Read lunyore ESIRA 9 Bible Online

ESIRA 9 - lunyore bible

ESIRA 9

¹Olwa amang'ana yaka kosi kali nikahweeye, abemeli balala banzitsila nibaboola mbu, abandu ba Isiraeli nibalimwo abesaalisi nende Abalawi sibayeyahula khutsimbia etsili ahembi n'nabo nende tsifwo tsiabwe tsimbi singa etsia Abakanaani, Abahiti, Abaperisi, Abayebusi Abaamori, Abamoabu, Abaamisiri, nende Abaamoni tawe.

²Abasaatsa Abayahudi bateesia abakhaana betsimbia yitsio ma kho abandu abatsienukhu bamala nibatsokana nende abetsimbia tsiesifwabwi. Abemeli nende abakhongo nibo abokhuranga okhukhola amabi yako.

³Ne olwa ndahul'la ling'ana yilio, ndarandula tsingubo tsianje nimaanyula liswi lianje netsindefu, ninzikhala ma ning'ang'ala butswa.

⁴Ma yabo bosi abatechela khulwa amang'ana ka Nyasaye wa Isiraeli, yali nabooye khulwobubi yibwo bebunjikha ahandali. Nase ninzikhala nindi musibeela okhwola khusaa yokhuhaana omusango kwamukolooba.

⁵Olwe esaa yokhuhaana omusango kwamukolooba yoola, ndasinjila nirula handali ninzikhaye, musibeela nisiebikhile tsingubo tsianje etsiali nitsirandukhile, nisikama khulwokhusaaya ma ninjinga amakhono kanje khu MWAMI Nyasaye wanje.

⁶Ndambool'la mbu, “E Nyasaye wanje, ndi netsisoni khandi simbile omurwe okhukhuchingul'la tsimoni tsianje ibe, Nyasaye wanje, sichila tsimbi tsiefwe tsirambihile okhuyomba emirwe chiefwe, khandi tsiolanga mwikulu.

⁷Okhurula m'matukhu kabakuka befwe, okhwola olwaleelo tsimbi tsiefwe netsinyinji, ne khulwe tsimbi tsiefwe, ifwe halala nabaruchi befwe nabesaalisi befwe, khuhaanungwa mumakhono kabaruchi beb'bala bindi khandi khwirwanga nikhuyaakwa, nikhuhilwa mubuhambe singa ababohe. Khandi khwasimbibwa omurwe omukali singa obwa kali naleelo.

⁸Luno khulweinyinga ndititi butswa, OMWAMI Nyasaye wefwe, wabeye okhukhumanyia tsimbabasi ma nolekha abalala khu ifwe okhuhonokokha okhurula mubuhambe ma nikhwitsa okhumenya mumulembe habundu hatsienukhu hano. Wakhuhiinisie mubuhambe ma nokhuhelesia obulamu obuhia.

⁹Khwali abasumba, nebutswa ibe Nyasaye wefwe siwakhulekhele mubuhambe tawe. Wachil'le abaruchi ba Perisia okhukhukhol'la amalahi ma nibahuchil'la khutsilil'le okhuhelesie obulamu obuhia khulwo okhumenya nende okhwombokha Ehekalu yiyo obuhia eyali niyakwa ma khandi khunyoole omulembe mu Yuda nende Yerusalemu.

¹⁰“Ne luno E Nyasaye wefwe, inyuma we yako kosi, khuboole mbwena? Khubul'le okhulonda amalakoko,

¹¹akawakhulaka okhubir'ra mubarumikhili baabo abaroobi. Bakhubool'la mbu, esibala esia nakhumenyemwo, nesibala esiafwabibwa netsimbi sichila abandu abamenyamwo bakhol'langamwo amang'ana kes'sinyo khulwe ifwo yabwe imbi khandi akesifwabwi habundu hosi.

¹²Bakhubool'la mbu khurabbakhakhwo abakhaana befwe khubasiani babwe, nohomba abasiani befwe barateesia abakhaana babwe tawe. Kata khurabbakhonya okhuhindihala nohomba okhunyoola amalahi nikali khwakhenya okhusangal'la esibala ma khusilaamile abaana befwe tawe.

¹³Ne kano kosi kakhukwila khulwa ebikhole biefwe ebibi, nende esikha siefwe esikali; nebutswa ibe Nyasaye wefwe ukhuheye esinyasio esitititi okhuyomba tsimbi tsiefwe tsiakhwakhola khandi ulekhele abalala khu ifwe okhuba mwoyo.

¹⁴Kho nefwe khwakhafunaka mbwena amalakoko khandi khulwoteesania nabetsimbia etsikholanga akes'sinyo kano? Nikhukhola mbwo ibe wakhakhuhambila lirima ma okhumulule fwesi pe, sila omundu wosi okhusikalakhwo tawe.

¹⁵E OMWAMI Nyasaye wa Isiraeli, ibe oli omukhalachi wa habwene, nebutswa wakhulekha khube mwoyo. Khweyamanga obubi bwefwe khuibe; sikhuli abanyala okhusinjila imbeliwo tawe.”