Read lunyore NEHEMIA 1 Bible Online

NEHEMIA 1 - lunyore bible

NEHEMIA 1

¹Kano namang'ana aka Nehemia omusiani wa Hakalia yali okhukhola. Khumwesi kwa Kiselewi, mumuhika kwamakhumi kabili muburuchi bwa Aritasasita ise ndali nindi mwitookho lia Susa.

²Hanani, mulala khubaana befwe, yeetsa niyoola aha ndali naali halala nende abandu bandi okhurula Yuda. Ndabareeba amang'ana ka Bayahudi abali nibasikala ingo, yabo abarahilwa mubuhambe Babulonia nende amang'ana ka Yerusalemu.

³Bambool'la mbu omukanda kwabandu abasikala abarahilwa mubuhambe Babulonia, bali mubutinyu khandi sibaali noluyali tawe. Khandi bambool'la mbu lisisi eliabotokhana Yerusalemu liali niliakwa ne ebilibwa biali nibiasambwa nomul'lo.

⁴Olwa ndahul'la amang'ana yako ndekhala hasi nindakaya. Ndekhuula khulwamatukhu amenji khandi nimonga okhulia. Ndasaaya khu Nyasaye womwikulu,

⁵nimboola mbu, “E OMWAMI, Nyasaye womwikulu. Ibe oli omukhongo ne khusinjilanga imbeliwo nikhuli noburi. Ibe ohesianga Indakano yiyo mubusubilwa khuyabo abakhuyanzanga nibalonda amalako kaako.

⁶OMWAMI umengekhwo ma, ohulile okhusaaya khwanje, ise omurumikhiliwo, olwa saayanga om'basu nobutukhu, khulwa abarumikhilibo abandu ba Isiraeli. Ndeyamanga mbu ifwe Abaisiraeli khwakhola tsimbi imbeliwo, Ise nende abakuka banje khwakhola tsimbi.

⁷Khwakhola obubi imbeliwo nikhuralonda amang'ana aka wakhulaka okhukhola. Sikhulondanga amalako akawakhuhelesia okhubir'ra mumurumikhiliwo Musa tawe.

⁸Khusaayanga witsul'le aka wali okhubool'la Musa mbu, ‘Inywe abandu ba Isiraeli nimuba nimurabba abasubilwa khu ise, ndakhamusalanie mumahanga kandi.

⁹Nebutswa nimuba nimwakhakalukha khu ise ma mulonde amalako kanje ndakhamukalusie habundu ahandali okhwela inywe okhundekayakayilaho kata nikali mbu mwasalanibwa okhwola khusihesi siesibala.’

¹⁰“OMWAMI, bano nabarumikhilibo khandi nabandubo. Wali okhubanunula nobunyalibwo obukhongo, nende tsingufu tsitsio.

¹¹E OMWAMI, luno ohulile amasaaya kanje nende amasaayo kabarumikhili baabo bandi bosi abakhuhelesianga oluyali. Okhole litukhu lino okhuba elietsikhabi khu ise khandi ohelesie omuruchi omwoyo kwokhumbeela tsimbabasi.” Mumatukhu yako ndalinji omuhengelesi wewaini yomuruchi.