Read lunyore NEHEMIA 11 Bible Online

NEHEMIA 11 - lunyore bible

NEHEMIA 11

¹Abemeli bamenyanga Yerusalemu, ne abandi bosi bakhupilwa imbulu, okhwahula inyumba ndala okhurula mubuli tsinyumba likhumi okhutsia okhumenya mwitookho litsienukhu lia Yerusalemu, ne abetsinyumba tsindi tsirano natsine nibatsia okhumenya mumatookho kandi nomumataala.

²Abandu nibabasaayila tsikhabi yabo bosi abehaana okhumenya Yerusalemu.

³Mumataala kandi nomumatookho Abaisiraeli nabesaalisi, na Balawi, nabakholi bomu Hekalu nende abolwibulo lwabakholi ba Solomoni bamenya mumikunda chiabwe abene. Akalondakhwo kano namera kabemeli bolusoma lwa Yuda abamenyanga Yerusalemu:

⁴Khubolwibulo lwa Yuda bali: Atsaya omusiani wa Usia omwitsukhulu wa Sakaria. Abakukabe bandi bali: Amaria, Shefatia, Mahalaleli, abolwibulo lwa Peresi omusiani wa Yuda.

⁵Maaseya omusiani wa Baruki omwitsukhulu wa Kolihose. Abakukabe bandi bali Hasaya, Adaya, Yoyaribu Sakaria, obolwibulo lwa Shela omusiani wa Yuda.

⁶Khubolwibulo lwa Peresi bosi abamenya Yerusalemu bali abandu etsimia tsine namakhumi kasasaba namunane, aboluyali.

⁷Khubolwibulo lwa Benjameni nabo bali: Salu omusiani wa Meshulamu omwitsukhulu wa Yoeli. Abakukabe bandi bali: Pedaya, Kolaya, Maaseya, Itsieli, nende Yeshaya.

⁸Salulala nende abekhobe Gabai nende Salai, bali etsimia tsirano natsine amakhumi kabili namunane.

⁹Yoeli omusiani wa Sikiri niye owali omwemeli wabwe, ne Yuda omusiani wa Hasenua yali owakhabili mubukhongo bwomwitaala.

¹⁰Khubesaalisi bali: Yedaya omusiani wa Yoyaribu nende Yakini.

¹¹Seraya omusiani wa Hilikia omwitsukhulu wa Meshulamu. Abakukabe bandi bali: Sadoku, Merayotsi, nende Ahitubu, owali Omwesaalisi Omukhongo.

¹²Bosi halala abesilibwa yisi abakholanga emilimo mu Hekalu bali etsimia munane amakhumi kabili nababili. Oundi yali Adaya omusiani wa Yerohamu omwitsukhulu wa Pelalia, Abakukabe bandi bali Amusi, Sakaria, Pashuri, nende Malikiya.

¹³Bosi halala abesilibwa yisi abali abemeli betsinyumba bali etsimia tsibili amakhumi kane nababili. Nende Amashisai omusiani wa Asareli omwitsukhulu wa Ahisai. Abakukabe bandi bali: Meshilemotsi nende Imeri.

¹⁴Baliho abandu emia ndala namakhumi kabili namunane, abali abasikari beifuma. Omwemeli wabwe yali Sabudieli omusiani wa Hagedolimu.

¹⁵Khu Balawi bali: Shemaya omusiani wa Hashubu omwitsukhulu wa Asirikamu. Abakukabe bandi bali Hashabia nende Buni.

¹⁶Shabetsai nende Yosabadi, abokhubemeli ba Balawi abasinjil'la emilimo esioba we Hekalu.

¹⁷Matania omusiani wa Mika omwitsukhulu wa Sabudi owolwibulo lwa Asafu. Yemel'la Abembi bomu Hekalu okhwemba tsinyembo tsiokhusaaya nibakhupa embwo nende Bakibukia omukhonyel'li wa Matania; halala nende Abuda omusiani wa Shamua omwitsukhulu wa Galali owolwibulo lwa Yedutsuni.

¹⁸Abalawi bosi abamenya mwitookho litsienukhu lia Yerusalemu bali etsimia tsibili namakhumi munane nabane.

¹⁹Abalindi be Hekalu bali Akubu, Talimoni, nende abekho babwe, ne bosi bali emia ndala amakhumi kane nakataru nababili.

²⁰Abaisiraeli bandi bosi nabesaalisi, nende Abalawi abasikala bamenya mumikunda chiabwe abene mumatookho kandi nomumataala kandi ka Yuda.

²¹Abakholi bomu Hekalu bamenya khusikulu sia Ofeli esili mu Yerusalemu ne bakhola emilimo nibasinjiliywe na Siha nende Gishipa.

²²Omusinjil'li wa Balawi abamenyanga Yerusalemu yali Usi omusiani wa Bani omwitsukhulu wa Hashabia. Abakukabe bandi bali Matania nende Mika, ne yali owesilibwa sia Asafu, esilibwa esiemel'langa obwembi mubwekayakayi bwomu Hekalu.

²³Lialiho lilako eliarula khumuruchi eliamanyianga nilina olwa buli esilibwa sinyala okhwemel'la obwembi bwomu Hekalu bwabulitukhu.

²⁴Patsahia omusiani wa Meshesabeli, owesilibwa sia Sera mulwibulo lwa Yuda yali omukobokheli wabandu ba Isiraeli khumuruchi wa Perisia.

²⁵Obwinji bwabandu bamenyanga mumataala akali ahembi nemikunda chiabwe. Yabo abali abokhulwibulo lwa Yuda bamenya mumatookho ka Kiriatsi Arabba, Diboni, Yekabeeli nomumataala akali ahembi n'nako.

²⁶Khandi bamenya mu Yeshwa, mu Molada, Betsipeleti,

²⁷nende mu Hasari Shuali, nende mu Berisheba nomumataala akali ahembi n'nalio.

²⁸Bamenya mwitookho lia Sikilaki, Mekona, nomumataala akali ahembi n'nako,

²⁹nende mu Eni Rimoni, mu Sora, mu Yarimutsi;

³⁰mu Sanoa, mu Adulamu, nomumataala akali ahembi n'nako. Khandi bamenya mu Lakishi nomumikunda echili ahembi n'nalio, nende Aseka nomumataala akali ahembi n'naho. Yako nokhuboola mbu abandu ba Yuda bamenya mulusoma oluli hakari wa Berisheba khulubeka lwenandete nende Mwibanda lia Hinomu elili esinyolu.

³¹Abandu bolwibulo lwa Benjameni bamenya mu Betseli nomumataala akali ahembi n'nako,

³²nende mu Anatsotsi, mu Nobu, mu Anania,

³³mu Hasori, mu Rama, mu Gitaimu,

³⁴mu Hadidi, mu Seboimu, mu Nebalati,

³⁵mu Losi, nende mu Ono, nende mwibanda lia bafundi.

³⁶Abalala khu Balawi abamenyanga mulusoma lwa Yuda, barebwa okhumenya halala nabandu ba Benjameni.