Read lunyore NEHEMIA 12 Bible Online

NEHEMIA 12 - lunyore bible

NEHEMIA 12

¹Kano niko amera kabesaalisi nende Abalawi abali okhuchelela okhurula mubuhambe nibali halala nende Serubabeli omusiani wa Shealitieli khandi nende Yoshwa Omwesaalisi Omukhongo: Seraya, Yeremia, Esira;

²Amaria, Maluki, Hatushi;

³Shekania, Rehumu, Meremotsi;

⁴Ido, Ginetsohi, Abiya;

⁵Miyamini, Maadia, Biliga;

⁶Shemaya Yoyaribu, Yedaya;

⁷Salu, Amoki, Hilikia, Yedaya. Bano nibo abali abemeli babesaalisi basiabwe mumatukhu ka Yoshwa.

⁸Abalawi balondakhwo bano nibo abali okhwemel'la tsinyembo tsiokhukhupila OMWAMI embwo: Yeshwa, Binui, Kadimieli, Sherebia, Yuda, na Matania.

⁹Abalondakhwo bano nabo bembanga nibongulana nende Balawi: Bakibukia, Uno nende Abalawi basiabwe.

¹⁰Yoshwa yeebula Yoyakimu, Yoyakimu niyebula Eliashibu, Eliashibu niyebula Yoyada,

¹¹Yoyada niyebula Yonatsani, Yonatsani niyebula Yadua.

¹²Mumatukhu ka Yoyakimu yali Omwesaalisi Omukhongo, abemeli bebilibwa biabesaalisi mbabano: owesilibwa sia Seraya yali Meraya; owesilibwa sia Yeremia, yali Hanania;

¹³owesilibwa sia Esira yali Meshulamu, owesilibwa sia Amaria, yali Yehohanani,

¹⁴owesilibwa sia Malukhi yali Yonatsani, owesilibwa sia Shebania yali Yosefu,

¹⁵owesilibwa sia Harimu yali Adina, owesilibwa sia Merayotsi, yali Helikai,

¹⁶owesilibwa sia Ido, yali Sakaria, owesilibwa sia Ginetsoni, yali Meshulamu,

¹⁷owesilibwa sia Abiya yali Sikiri, nende owesilibwa sia Miniamini, ne owesilibwa sia Moadia, yali Pilitai

¹⁸owesilibwa sia Biliga, yali Shamua, owesilibwa sia Shemaya, yali Yehonatsani,

¹⁹owesilibwa sia Yoraribu yali Matenai, owesilibwa sia Yedaya yali Usi;

²⁰owesilibwa sia Salai, yali Kalai, owesilibwa sia Amoki yali Eberi,

²¹owesilibwa sia Hilikia, yali Hashabia ne owesilibwa sia Yedaya, yali Netsaneli.

²²Amera kabemeli betsinyumba tsia Balawi nende etsiabesaalisi kali okhuhandikwa olwa Eliashibu, Yoyada, Yohanani nende Yadua bali Abesaalisi Abakhongo. Amera kano kali okhumalwa okhuhandikwa olwa Dario yali omuruchi wa Perisia.

²³Kata mbwo amera kabemeli betsinyumba tsia Balawi kali okhuhandikwa musitapu siamang'ana kabaruchi okhwola mumatukhu ka Yohanani omwitsukhulu wa Eliashibu.

²⁴Nibali hasi hobwemeli bwa Hashabia, Sherebia, Yeshwa, Binui nende Kadimieli, Abalawi bakabulwa mumikanda. Emikanda chibili buli khunyinga betsomingia Nyasaye nibongulana nende okhumukhupila embwo, okhulondokhana nende amalako akahanwa nende Daudi, omundu wa Nyasaye.

²⁵Matania na Bakibukia, Obadia, Meshulamu, Talimoni, nende Akubu, bali abalindi abalindanga amabiikhilo akomubilibwa bie Hekalu.

²⁶Abandu yabo bamenya mumatukhu ka Yoyakimu omusiani wa Yeshwa omwitsukhulu wa Yosadaki nende mumatukhu ka Nehemia yali omukafuna nende mumatukhu ka Esira owali omwesaalisi khandi omusitsa owasomela Amalako.

²⁷Olwamasisi kelitookho lia Yerusalemu kasaayilwa, Abalawi baleerwa okhurula hosi ahabali nibamenyanga okhusanga mumukho yikwo khulwokhwemba tsinyembo tsiokhukhupa embwo, nende okhwembela mubisilili, namatungu, nobukhana.

²⁸Abembi bomutsinyumba tsia Balawi bebunjikha halala okhurula mutsisoma etsiabali nibamenyamwo etsili ahembi Yerusalemu, nende okhurula mumataala akali ahembi Netofa

²⁹nende okhurula mu Betsi Giligali, nokhurula mumbeka tsia Geba nende Asimawetsi.

³⁰Abesaalisi nende Abalawi bakhola omulukha kwokhwesiiya abene, nende okhusiiya abandu, nebilibwa nende amasisi kelitookho.

³¹Ma nininia abemeli ba Yuda khwisisi ikulu, ma nimbara okhwemel'la emikanda emikali chibili chiokhubotokhana litookho nibakhupanga embwo khu Nyasaye. Omukanda kwokhuranga kwachenda nikutsia khumukhono musaatsa nikuhengele ena Silibwa sia Masingo.

³²Hoshaya yachenda inyuma wabembi ne enusu yabemeli ba Yuda nibamulondanga emukongo,

³³nibali halala nende Asaria, Esira, Meshulamu,

³⁴Yuda, Benjameni, Shemaya, na Yeremia,

³⁵khandi nende abesaalisi bandi nibali nende etsitulumbete. Khandi bali nende Sakaria omusiani wa Yonatsani omwitsukhulu wa Shemaya. Abakukabe bandi bali Matania, Mikaya, Sakuri, owesilibwa sia Asafu.

³⁶Sakaria yalondwa nabandu bandi abesilibwa siabwe mbu, Shemaya, Asareli Milalai, Gilalai, Maai, Netsaneli, Yuda nende Hanani, ne bosi bali nibachingile obukhana singa obwa Daudi, omundu wa Nyasaye yakhupanga. Esira omusitsa owali niyasomela amalako yemel'la omukanda yiku.

³⁷Hasilibwa sie Sitaho batsilil'la hambeli nibanin'na khubinin'no binjilanga mwitookho lia Daudi, ma nibabir'ra khunyumba yomuruchi Daudi ma nibakalukha khwisisi eliali hasilibwa siamaatsi esili ebukwe welitookho.

³⁸Omukanda kundi okweyabo abakhupa embwo nibatsia khumukhono mukhasi, nibachendanga khwisisi ikulu nase nimbalonda, nende enusu yabandu bomukanda tsana. Khwachenda nikhubir'ra khu Munaala kwe Lichiko okhwola ahelisisi lili libambukhu,

³⁹ne okhurula habwene yaho, khwabir'ra khu Silibwa sia Efuraimu, nende khusilibwa sia Yeshana, nokhu Silibwa sie Tsisuche, nokhumunaara kwa Hananeli, nende khumunaarakwe mia ndala, okhwola khu Silibwa sia Makondi. Khwamal'la obuchendi bwefwe ahembi nesilibwa esinjilanga mu Hekalu.

⁴⁰Kho emikanda chibili yichio echie yabo abakhupilanga Nyasaye embwo chiabukula obukono bwachio mu Hekalu. Okhumeeta khubemeli abali halala n'nase,

⁴¹omukanda kwanje kwalimwo abesaalisi abakhupanga etsitulumbete bano: Eliakimu, Maaseya, Miniamini, Mikaya, Elioenai, Sakaria, nende Hanania;

⁴²ne abali nibabalondanga inyuma bali Maaseya, Shemaya, Eliasa, Usi, Yehohanani, Malikiya, Elamu, nende Eseri. Abembi abemel'lwa nende Yeseralia bemba nomwoyo omukali.

⁴³Emisango eminji chiahanwa khwitukhu yilio, ne abandu basangala okhusila sichila Nyasaye yali nabayanzisisie okhusila. Abakhasi nende abaana bosi basangala halala n'nabo, ma liyoka liobusangali bwabwe mu Yerusalemu liahul'likha okhwola ehale.

⁴⁴Khwitukhu yilio abandu bareebwaho okhusinjil'la ebikoti biamabiikhilo ahebihanwa bie Hekalu biabiikhwanga. Ebihanwa yibio bialimwo ebitonye biesielikhumi, ebirongola biobuswache nende amatunde akaranga okhwenga buli muhika. Abandu tsana nibo abasololanga okhurula mumikunda chili ahembi namatookho ebihanwa biabesaalisi nende Abalawi singa obwa Malako kaboolanga. Abandu ba Yuda bosi bayanzisibwa nende obukholi bwabesaalisi nende Abalawi,

⁴⁵sichila bakhola omulukha kwokhusiiya nende emilukha chindi singa obwa Nyasaye yali nalakile. Abembi bomu Hekalu nende abalindi be Hekalu bakhola emilimo chiabwe okhulondokhana na Malako akarebwaho nomuruchi Daudi halala nomusianiwe Solomoni.

⁴⁶Okhurula mumatukhu komuruchi Daudi nende akomwembi Asafu, abembi bembanga tsinyembo tsiokhwitsoomia Nyasaye nokhumukhupila embwo.

⁴⁷Ne mumatukhu ka Serubabeli nende mumatukhu ka Nehemia, Abaisiraeli bosi bahaananga ebihanwa biokhukhonya abembi bomu Hekalu nende abalindi bomu Hekalu. Abandu bahaananga emisango emichienukhu khu Balawi ne Abalawi nabo bahaananga omukabwa okwalakwa khubesaalisi.