Read lunyore NEHEMIA 13 Bible Online

NEHEMIA 13 - lunyore bible

NEHEMIA 13

¹Khwitukhu liene yilio abandu basomelwa Amalako ka Musa, ma nibanyoola habundu aha kahandiikwamwo mbu Omuamoni wosi nohomba Omumoabu arakhahuchil'lwakhwo okhusanga nabandu ba Nyasaye tawe.

²Yako kali sichila Abamoabu nende Abaamoni sibahakhwo Abaisiraeli ebiokhulia nohomba amaatsi olwa bali nibarulanga Emisiri tawe. Musilenje yisio barunga Balaamu okhubalaka esilaka munwa, nebutswa Nyasaye wefwe yakalukhania esilaka munwa yisio okhuba ikhabi.

³Ne olwa Baisiraeli bahulila amalako yako nikasomwanga, bakhunga abandu betsinzibulo tsindi bosi okhurula mumukanda kwabwe.

⁴Omwesaalisi Eliashibu owali niyareebwaho okhusinjil'la amabiikhilo ke Hekalu, yali omulina wa Tobia khulwoluhono olurambi.

⁵Yahelesia Tobia esikoti esikali khulwokhurumikhila esiali nisialombwa khulwokhubikhwamwo emisango chiobuswache, nende obwali, nebirumikhilo biomu Hekalu, ebihanwa biokhuhebwa abesaalisi, nende ebitonye biesielikhumi biobuswache, biewaini nende ebiamafura komuseituni ebiahebwa Abalawi, nabembi bomu Hekalu nende abalindi bomu Hekalu.

⁶Ne mumatukhu yako ise sindali nindi Yerusalemu tawe sichila mumuhika kwamakhumi kataru nachibili olwa Aritasasita, yali omuruchi wa Babulonia, ndakalukha khuye okhumumanyia obwamang'ana kali ma olunyuma lwamatukhu mati yambelesia obweyangu

⁷ma ningalukha Yerusalemu. Ndachenya okhunyoola mbu Eliashibu yali niyahuchil'la Tobia, okhurumikhila esikoti silala mu Hekalu.

⁸Ndali okhusinyikha okhusila, ma nifuuba esioba ebindu bia Tobia biosi okhurula musikoti.

⁹Ma nimbana lilako mbu ebikoti tsana bisiiywe ma ebirumikhilo biomu Hekalu, nende obuswache bwemisango nende obwali bikalusibwemwo.

¹⁰Khandi ndanyoola mbu abembi bomu Hekalu nende Abalawi bandi bali nibarula Yerusalemu ma nibakalukha mumikunda chiabwe, sichila abandu sibabahelesianga ebiokhulia ebibahela okhumenyela tawe.

¹¹Kho ndali okhukondokhela abemeli khulwokhubula okhuhendela Ehekalu ya Nyasaye. Ma ndamala ninjelesia Abalawi nende abembi mu Hekalu.

¹²Nilwo olwabandu ba Isiraeli bosi bachiaka okhuleera ebitonye bielikhumi ebiobuswache, nende ebiewaini nebiamafura mumabiikhilo ko mu Hekalu.

¹³Niraho ababiikhi bokhusinjil'la ebikoti biamabiikhilo bano: Shelemia omwesaalisi, Sadoku omusitsa owasomela Amalako nende Pedaya mulala khu Balawi. Hanani omusiani wa Sakuri omwitsukhulu wa Matania niye owali omukhonyel'li wabwe. Ndali okhumanya mbu nyala okhusubila abandu yaba khulwo okhukabul'langa abakholi basiabwe emirungo chiabwe.

¹⁴Nyasaye wanje, yanza unzitsul'le khwing'ana elia khol'le lino, kata orebil'la kosi aka khol'le khu Hekalu yiyo nende akobwekayakayi bwayo tawe.

¹⁵Mumatukhu yako ndalola abandu mu Yuda nibaminanga amaatsi okhurula mumisabibu khwitukhu lie Sabato. Abandi bali nibaninianga emisiko chiobuswache nechiewaini, echiemisabibu, echiamakhuyu nende echiebindu bindi khumikongo chietsipunda tsiabwe khulwokhuchihila Yerusalemu. Ndabakaya balekhe okhukusiakhwo esindu siosi khwitukhu lie Sabato.

¹⁶Abandu balala bali nibamenyanga mwitookho lia Tiro, ne baleeranga tsisuche nende emianduchietsimbila tsinyinji, nibakusisia abandu befwe mu Yerusalemu khwitukhu lie Sabato.

¹⁷Kho ndakondokhela abemeli ba Yuda, nimbabool'la mbu, “Lole amabi kamukholanga! Mufwabianga litukhu lie Sabato.

¹⁸Yaka niko akachila Nyasaye naleera esinyasio khubakuka benywe olwa yalekha litookho lino nilimumwa. Nenywe mumeetanga okhuleer'ra Isiraeli lirima okhurula khu Nyasaye olwa mufwabianga litukhu lie Sabato.”

¹⁹Kho ndahaana lilako mbu ebilibwa bielitookho bikalwe olweliuba lichiakanga okhuyeela olwe litukhu lie Sabato lichiakanga, ne biikulwe olwe litukhu lie Sabato libetsanga nilihweye. Ndali okhuraho balala khubandu banje khulwo okhulola mbu emisiko sichinjisibubwekhwo mwitookho khwitukhu lie Sabato tawe.

²⁰L'lala nohomba khabili abakhala abakusianga ebindu bietsimbila tsiosi bakona esioba welisisi lia Yerusalemu obutukhu bwomuchirano.

²¹Ndabalul'la nimbabool'la mbu, “Esifune sibulaho esichilanga nimulinda hasioba yaho okhwola mukamba tsuli. Nimuba nimukhola mbwo khandi narumikhile tsingufu okhumuhiniaho.” Okhurula khunyinga iyo sibamala nibakalukhakhwoho khandi tawe.

²²Ndalaka Abalawi besiiye, ma batsie okhulinda ebilibwa, khulwokhulola mbu litukhu lie sabato nelitsienukhu. Nyasaye wanje, yanza unzitsul'le khwing'ana eliakhol'le lino liosi ma umbonie khulwobuyanzibwo obwinji.

²³Khandi mumatukhu yako ndanyoola mbu Abayahudi abenji bali nibateesia abakhasi okhurula Ashitoti, Amoni, nende Moabu.

²⁴Enusu yabaana babwe bal'lomanga ol'lolomo lwa Ashitoti, nohomba olundi lwosi ne sibamanya okhul'loma oluyahudi tawe.

²⁵Ndakondokhela abasaatsa yabo nimbalaka esilaka munwa, nimbakhupa ma nimbakhwesa liswi khumirwe chiabwe. Ndabatsuba okhwesuha muliira lia Nyasaye mbu khandi sibakhatesaniekhwo nabandu betsinzibulo tsindi bo abene nohomba abaana babwe tawe.

²⁶Ndaboola mbu, “Abakhasi betsinzibulo tsindi nibo abachila Solomoni nakhola tsimbi. Niye omundu owali omukhongo okhuyomba abaruchi bebibala bindi. Nyasaye yamuyanza ma namwemekha okhwamiha Isiraeli yosi, nebutswa ye, yenjila mukhukhola tsimbi.

²⁷Kho mbula khwalonde esilolelo sienywe ma khubule okhulonda amalako ka Nyasaye wefwe khulwokhuteesia abakhasi betsimbia tsindi noho?”

²⁸Yehoyada yali omusiani wa Eliashibu Omwesaalisi Omukhongo, ne mulala khubasianibe yateesia omukhaana wa Sanibalati okhurula mwitaala lia Omuhoroni, khulwako ndakhunga Yehoyada okhurula Yerusalemu.

²⁹E Nyasaye, witsul'le obwabandu yabo bafwabia omulimo kwobwesaalisi halala neindakanoyo eyawalomba na Balawi nende Abesaalisi.

³⁰Ndali okhusiiya abandu okhurula khumang'ana kosi akabetsimbia tsindi; ndalomba amalako kokhurumikhilwa nabesaalisi nende Abalawi kho buli mulala abe onyala okhumanya omulimokwe.

³¹Ndaloosia tsikhwi tsiokhurumikhilwa khulwo okhusamba emisango tsileerwenga khunyinga indahi, khandi ndaloosia mbu abandu baleerenge emisango chiabwe chiebirongole biobuswache nende amatunde kokhuranga okhwenga mumukunda. Witsul'le yaka kosi, E Nyasaye, ma unaamile ikhabi khulwako.