Read lunyore NEHEMIA 2 Bible Online

NEHEMIA 2 - lunyore bible

NEHEMIA 2

¹Litukhu elala, emiesi chine nichihwe, mumuhika kwamakhumi kabili muburuchi bwa Aritasasita, olwe waini yali neler'rwe imbeli womuruchi ndachibukula ma nimuhelesia. Ne omuruchi siyali niyandolakhwo nindi omubelelu tawe.

²Kho yamala niyareeba mbu, “Busina ohenganga omubelelu? Sioli omulwaye tawe; kho yako kamanyianga mbu oli nesibeela.” Ndatekela okhusila

³ma ningalusia mbu, “Ibe omuruchi, ohindile inziayo! Ndakhabula mbwena okhubeela olwe litookho eliabakuka banje bayabilwamwo lili butswa likunda ne ebilibwa bialio nibiasambwa nomul'lo?”

⁴Ma omuruchi niyareeba mbu, “Kho nisina esiawenyanga khu ise?” Ndasaaya khu Nyasaye womwikulu,

⁵ma nimbool'la omuruchi mbu, “Omuruchi, noba noyanza, khandi noba niumengakhwo oluboni, yanza umbuchil'le nzie musibala sia Yuda, mwitookho liabakuka banje bayabilwamwo, kho mbe onyala okhuliombokha obuhia.”

⁶Omuruchi nali nende omukhayewe owali niyekhaye ahembi n'naye, yahuchil'la aka ndali okhumureeba. Yali okhuureeba oluchendo lwanje nalubukula luhono sina khandi nilina olwa nyala okhuchelela; nase nimubool'la kosi obwa kali.

⁷Khandi ndamureeba mbu nayanza, mbebwe etsibarwa etsisaia khubakafuna bolusoma oluli emasaba womuchela kwa Efurate nitsibalakanga mbu bambuchil'le mbire okhwola olwa ndakhoole Yuda.

⁸Khandi ndareeba ebarwa eyokhutsia khu Asafu omusinjil'li womutsuru kwomuruchi, mbu yambelesie emisaala chiokhulombela ebilibwa bielisisi eliasinga Ehekalu nende ebielisisi lielitookho halala nende ebilibwa bieinyumba eya namenyemwo. Omuruchi yakhol'la kosi aka ndali okhumureeba sichila Nyasaye yali halala n'nase.

⁹Kho ndatsia ma ninzola khubakafuna abali mulusoma oluli emasaba womuchela kwa Efurate, ma nimbahelesia etsibarwa tsiomuruchi. Ne omuruchi yali niyambelesisie abakhongo belihe nende abasikari abachendelanga khutsisululi okhutsia n'nabo.

¹⁰Nebutswa olwa Sanibalati Omuhoroni, nende Omurumikhili Tobia, Omuamoni, bahulila mbu, omundu witsile okhukhol'la abandu ba Isiraeli amalahi, bali okhusinyikha okhusila.

¹¹Kho ndoola Yerusalemu, ma nimbayo amatukhu kataru.

¹²Ma nimbuukha butukhu, ise halala nabandu bandi batututu. Sindaali nimbooleyekhwo omundu wosi amang'ana ka Nyasaye yali niyamanyisie okhukhol'la Yerusalemu tawe. Sikhwalikhwo nepunda yindi yosi nerali eyandali ninin'nekhwo yonyene tawe.

¹³Ndarula butukhu nimbir'ra mu Silibwa sio Mwibanda, okhutsia Khwiyabo lie Bibwe, khandi okhutsia khusilibwa Siamasingo. Olwa ndali nimbiranga, ndalambuula amasisi akali nikakwa nende ebilibwa biako ebiali nibiasambwa nomul'lo.

¹⁴Ma ninzilil'la okhwola khu Silibwa esili Hasitaho nende khwitubango lio Muruchi nebutswa sibwaliho obweyangu bwepunda eyandali ninin'nekhwo okhubir'raho tawe.

¹⁵Kho ndarula mubutukhu ma nimbir'ra ahembi ne libanda lia Kidironi ninambuula lisisi. Ma nisukhana okhukalukha khunjila yandali niruliyekhwo ma ningalukha mwitookho okhubir'ra mu Silibwa sio Mwibanda.

¹⁶Ne abemeli sibamanyakhwo owandatsia, kata akandakhola tawe. Ndali nisili okhubool'lakhwo Abayahudi basianje esindu siosi tawe. Kata sindali nimbooleyekhwo abesaalisi, nohomba abemeli, nohomba Abaami, kata abandi bosi abakhakhola emilimo tawe.

¹⁷Nebutswa ndamala nimbabool'la mbu, “Mulolanga amatinyu akakhulimwo, singa Yerusalemu liakwa likunda, ne ebilibwa bialio biasambwa nomul'lo! Chende khwombokhe obuhia amasisi ka Yerusalemu, ma khwehiniekhwo es'simba murwe.”

¹⁸Ne ndali nimbabooleye obwa Nyasaye yali niyakholeye amalahi nende amang'ana ako muruchi yali niyambooleye. Nabo nibakalusia mbu, “Chende khuchiake okhwombokha obuhia.” Ma niberechekha okhuchiaka emilimo.

¹⁹Nebutswa olwa Sanibalati, Omuhoroni nende omurumikhili Tobia Omuamoni nende Geshemu Omuarabu bahulila akakhwali nikhuloosianga okhukhola bakhutsekhel'la nibakhuchaya, nibaboola mbu, “Nisindu sina esiamukholanga yisi? Mwenya okhukhol'la omuruchi indiri?”

²⁰Nase ningalusia nimbabool'la mbu “Nyasaye womwikulu alakhuhelesia obulechi mumilimo chiefwe. Khuli abarumikhilibe ne khulachiaka okhwombokha. Nebutswa inywe mubulakhwo omukabwa kwosi kata obunyali nohomba esitsusio siosi mu Yerusalemu tawe.”