Read lunyore NEHEMIA 3 Bible Online

NEHEMIA 3 - lunyore bible

NEHEMIA 3

¹Lisisi lielitookho liombokhwa singa mbu: Eliashibu Omwesaalisi Omukhongo halala nabesaalisi basie, batsia okhwombokha obuhia Esilibwa sia Makondi; nibasisaayila ma nibasinjisia ebilibwa mubukono bwabio. Basaayila lisisi okhwola khu Munaalakwe Mia, nende khu Munaala kwa Hananeli.

²Abandu ba Yeriko bombokha lisisi elialondakhwo. Sakuri omusiani wa Imiri naye niyombokha lisisi elialondakhwo.

³Abesilibwa sia Hasena bombokha Esilibwa sie Tsisuche. Basinjisia etsifuremu nende ebilibwa mubukono bwabio khandi nibaramwo etsipata tsiabio, nende emikal'lo chiabio.

⁴Meremotsi omusiani wa Uria omwitsukhulu wa Hakosi yombokha lisisi elialondakhwo. Meshulamu omusiani wa Berekia omwitsukhulu wa Meshesabeli yombokha lisisi elialondakhwo. Sadoku omusiani wa Baana yombokha lisisi elialondakhwo.

⁵Abandu ba Tekoa bombokha lisisi elialondakhwo, nebutswa abandu boluyali mwitaala yimwo basuula okhukhola emilimo chiamakhono echiabasinjil'li babwe babahelesia okhukhola.

⁶Yoyada omusiani wa Pasea, nende Meshulamu omusiani wa Besodeya, bombokha Esilibwa Esikhulu. Basinjisia etsifuremu nende ebilibwa mubukono bwabio ma nibaramwo etsipata tsiabio, nende emikal'lo chiabio.

⁷Melatia okhurula Gibeoni, nende Yadoni okhurula Meronotsi, nabandu ba Gibeoni nende Misipa, bombokha lisisi elilondakhwo okhwola hango homukafuna wolusoma lwemasaba womuchela kwa Efurate.

⁸Usieli omusiani wa Harihaya, omuruli wetsahabu, yombokha lisisi elilondakhwo. Hanania, omulombi wemisaala chiesuswa yombokha lisisi elilondakhwo okhwola ahelisisi Libambukhu lili.

⁹Refaya omusiani wa Huri, owarukanga enusu yolusoma lwa Yerusalemu, yombokha lisisi elilondakhwo.

¹⁰Yedaya omusiani wa Harumafu yombokha lisisi elilondakhwo elili ahembi neinyumbaye. Ne Hatushi omusiani wa Hasabineya yombokha lisisi elilondakhwo.

¹¹Malikiya omusiani wa Hiramu nende Hasubu omusiani wa Pahatsi Moabu bombokha lisisi elilondakhwo, nende Omunara kwa Mahika.

¹²Shalumu omusiani wa Haloheshi, owarukanga enusu yolusoma lwa Yerusalemu, yombokha lisisi elilondakhwo. (Abakhaanabe bamukhonya okhwombokha.)

¹³Hanuni nende abandu bamenyanga mwitookho lia Sanoa bombokha Esilibwa sio Mwibanda. Basinjisia ebilibwa mubukono bwabio ma nibaramwo etsipata tsiabio nende emikal'lo chiabio, ma nibombokha lisisi obuhia elioburambi obuhela etsimiita etsimia tsine namakhumi kane khwola khu Silibwa sia Masingo.

¹⁴Malikiya omusiani wa Rekabu owarukanga olusoma lwa Betsi Hakeremu yombokha obuhia esilibwa sia Masingo. Yasinjisia ebilibwa mubukono bwabio ma naramwo etsipata tsiabio, nende emikal'lo chiabio.

¹⁵Shalumu omusiani wa Kolihose, owarunganga olusoma lwa Misipa yombokha obuhia Esilibwa esili Hasitaho. Yasiombokha ma nasisimba, nasisinjisia mubukono bwasio naramwo etsipata tsiasio, nende emikal'lo chiasio. Yombokha lisisi hetubango lia Shela nende oluhinga ahembi nende omukunda kwomuruchi, okhwola khubiniinilo ebiikhanga okhurula mwitookho lia Daudi.

¹⁶Nehemia omusiani wa Asibuki owarukanga enusu yolusoma lwa Betsisuri, yombokha lisisi elilondakhwo okhwola habundu ahesilindwa sia Daudi siali, nende okhwola hetubango, khandi okhwola ahabasikari bamenyanga.

¹⁷Abalawi bano bombokha amasisi kalondakhwo: Rehumu omusiani wa Bani yombokha lisisi elilondakhwo. Hasabia owarukanga enusu yolusoma lwa Keila yombokha lisisi elilondakhwo khulwolusomalwe.

¹⁸Bawai omusiani wa Henadadi, owarukanga enusu yolusoma lwa Keila, yombokha lisisi elilondakhwo.

¹⁹Eseri omusiani wa Yeshwa, owarukanga Misipa, yombokha lisisi elilondakhwo elili imbeli weinyumba yebilasan'no, okhwola ahelisisi likotol'langa.

²⁰Baruki omusiani wa Sabai yombokha lisisi elilondakhwo okhwola khumuliango kweinyumba ya Eliashibu Omwesaalisi Omukhongo.

²¹Meremotsi omusiani wa Uria omwitsukhulu wa Hakosi yombokha lisisi elilondakhwo, okhurula khumuliango kweinyumba ya Eliashibu okhwola khundulo khweinyumba tsana.

²²Abesaalisi bano bombokha amasisi kalondakhwo: Abesaalisi okhurula ahembi Yerusalemu bombokha lisisi elilondakhwo.

²³Benjameni nende Hashubu bombokha lisisi elilondakhwo elili ahembi netsinyumba tsiabwe. Asaria omusiani wa Maaseya omwitsukhulu wa Anania yombokha lisisi elilondakhwo elili ahembi nende inyumbaye.

²⁴Binui omusiani wa Hanadadi yombokha lisisi elilondakhwo, okhurula khunyumba ya Asaria okhwola khukona yelisisi.

²⁵Palali omusiani wa Usai yombokha lisisi elihengananga nende ekona yelisisi nende, omunaara okutsobel'langa ikulu weinyumba yomuruchi, okuli ahembi nomuchitsi kwabalindi. Ne Pedaya omusiani wa Paroshi

²⁶nende abarumikhili bomu Hekalu abamenya Khusikulu sia Ofeli, bombokha lisisi elialondakhwo okhwola habundu hali khulubeka lwebukwe ahembi nende Esilibwa sia Matsi nende Omunara kwabalindi be Hekalu.

²⁷Abandu ba Tekoa bombokha lisisi elilondakhwo; yili liali lisisi liabwe liakhabili okhwombokha okhurula habundu ahahengana nende Omunara kwa Balindi be Hekalu okhwola khwisisi elili ahembi Ofeli.

²⁸Omukanda kwa Abesaalisi bombokha lisisi elilondakhwo nibahengele esinyolu okhurula khu Silibwa sie Tsisululi, buli mundu niyombokhanga imbeli weinyumbaye.

²⁹Sadoku omusiani wa Imeri yombokha lisisi elialondakhwo elili imbeli weinyumbaye. Shemaya omusiani wa Shekania, omulindi we Esilibwa sie Bukwe, yombokha lisisi elialondakhwo.

³⁰Hanania omusiani wa Shelemia nende Hanuni omusiani wa Salafu wakhasasaba bombokha lisisi elilondakhwo eliali lisisi liabwe eliakhabili okhwombokha. Meshulamu omusiani wa Berekia yombokha lisisi elilondakhwo eliali imbeli weinyumbaye.

³¹Malikiya, omuruli wetsahabu, yombokha lisisi elialondakhwo okhwola khunyumba eyarumikhilwanga nabakholi bomuhekalu nende abobukhala, eyali ahembi nende Esilibwa sia Balindi esili ahembi nesikoti esili ikulu wekono yelisisi hakari wesinyolu nende ebukwe.

³²Abaruli betsahabu nende abobukhala bombokha lisisi liokhumal'likha okhurula musikoti esili mukona okhwola mu Silibwa sia Makondi.