Read lunyore NEHEMIA 5 Bible Online

NEHEMIA 5 - lunyore bible

NEHEMIA 5

¹Olunyumakhwo, abasaatsa nabakhasi babwe bachaaka okhwekaana Abayahudi basiabwe.

²Abalala khubo baboolanga mbu, “Ifwe khuli nabaana abenji; khwakhenya obuswache obwinji khulitsenje kho khube mwoyo.”

³Abandi nabo baboolanga mbu, “Kakhuhachianga okhusinga emikunda chiefwe nende emikunda chiemisabibu, netsinyumba tsiefwe, kho khunyoole obuswache obuhela khulwo khukhwikal'la okhuba neinzala.”

⁴Khandi abandi nabo baboolanga mbu, “Kakhuhachianga okhukopa amapesa kho khurunge obusuru bwomuruchi khumikunda chiemisabibu nende khumikunda chindi.

⁵Ifwe khuli abolwibulo l'lala nende Abayahudi basiefwe. Abaana abakhwebula nabalahi singa abaana babwe. Nebutswa ifwe khukholanga abaana befwe okhuba abasumba. Abalala khubakhaana befwe bakusibwa singa abasumba. Khubula eliakhunyala sichila abandu bandi babukula emikunda chiefwe chiemisabibu nende emikunda chindi chiosi.”

⁶Nase olwandahulila okhwekaana khwabwe, ndali nelirima okhusila

⁷ma nikhalaka mbu okhwola omwene kholekhwo esindu. Ndamala nifukula abemeli nende Abaami nimbabool'la mbu, “Mukhupianga Abayahudi basienywe esibi!” Ndamala ninanga abandu bosi halala, khulwokhukol'losia ling'ana yili,

⁸nimboola mbu, “Singa obwa kanyalikhile khu ifwe, khwabeye nikhununulanga Abayahudi basiefwe abali okhwekusia abene khubetsimbia. Ne luno inywe muhakianga abekho benywe okhwekusia abene khubandu babwe!” Abemeli yabo nabo nibabuna tsi, nibarabba neling'ana liosi eliababoola tawe.

⁹Nimeeta okhuboola mbu, “Akamukholanga yaka sikali habwene tawe! Mukwana okhulonda amalako ka Nyasaye, ma mukhole amalahi kho mube abaranyala okhulekha abasuku befwe okhukhunyeka.

¹⁰Nebutswa ise nabaana befwe nabalina banje nende abakholi banje khuhuchiliye abandu bakope amapesa nobuswache khu ifwe. Luno chende khulekhe amang'ana kano akokhwenya okhurungwa.

¹¹Yanze mubalekhele amakobi kamubabanzanga akamapesa, obuswache nohomba akewaini nende akamafura komuseituni. Ma mubakalusisie bwangu emikunda chiabwe chiemisabibu, nende echiemiseituni namafura kabwe, halala netsinyumba tsiabwe.”

¹²Abemeli nibakalusia mbu, “Khulakhola singa obooye. Khulabakalusisia emiandu chiabwe ne sikhulabanza amakobi kefwe tawe.” Ninanga abesaalisi, ma nimbool'la abemeli besuhile imbeli wabwe mbu balakhola singa obwa besuhile.

¹³Khandi nimbukula omukoye kweingubo yandali nimbohele mus'sienje ma ningusungusa nimboola mbu, “Nimbwo Nyasaye alasungusa buli siamulala khwinywe owakhafunaka esiesuho yisi.” Khandi nimboola mbu, “Nyasaye alamunuula tsinyumba tsienywe nende buli esindu siosi esiamuli n'nasio ma amulekhe sila esindu.” Abandu bosi abaliho nibaboola mbu, “Amina” ma nibamwitsoomia OMWAMI. Abemeli bahesia akesiesuho siabwe.

¹⁴Khulwemihika likhumi nachibili, echiandali omukafuna wa Yuda okhurula khumuhika kwamakhumi kabili kwoburuchi bwa Aritasasita, okhwola khumuhika kwamakhumi kataru nachibili, abekho banje nohomba ise omwene sikhwaliakhwo ebiokhulia ebikabul'lwanga abakafuna tawe.

¹⁵Abakafuna abaranjil'la imbeli wanje balinji omusiko khubandu, ne bareebanga okhurungwa etsisilingi amakhumi kane khwitukhu tsiokhukula ebiokhulia nende ewaini. Kata abarumikhili babwe basandia abandu okhusila. Nebutswa ise sindakholakhwo mbwo tawe, sichila ndahelesia Nyasaye oluyali.

¹⁶Ndara tsingufu tsianje tsiosi mukhwombokha lisisi ne sindabukulakhwo emianduchiosi tawe. Buli omundu wosi owakhol'langa ise emilimo yakhonya omulimo kwokhwombookha lisisi.

¹⁷Buli khase ndalisianga khumesa yanje Abayahudi emia ndala namakhumi karano halala nende abemeli babwe nende abandu bandi abetsanga okhurula mumahanga kali ahembi.

¹⁸Sielitukhu elala ndasinzanga echulukhi ndala amakondi akanera kasasaba, nende tsingokho tsinyinji ne buli inyuma wamatukhu likhumi, ndabahelesianga ewaini indoro. Ne kata mbwo, sindalaka mbu mbeebwe ebiokhulia ebiakabul'lwanga omukafuna tawe, sichila ndali okhumanya omunyakhano kwobusiro bwabandu.

¹⁹Nyasaye wanje, yanza witsul'le kosi akandakholeye abandu bano, ma unaamile tsikhabi.