Read lunyore NEHEMIA 6 Bible Online

NEHEMIA 6 - lunyore bible

NEHEMIA 6

¹Sanibalati nende Tobia nende Geshemu, halala nabasuku befwe bandi bosi, bahul'la mbu khumal'le okhwombokha lisisi khandi mbu emiluhu sichisikayekhwomwo tawe, ne kata mbwo khwali nikhusili okhusinjisia ebilibwa mubukono bwabio.

²Kho Sanibalati nende Geshemu bakhupila omunwa mbu, nzie okhwakaana n'nabo mwitaala lindi elili musipaapi sia Ono. Nebutswa bali nibachoomanga okhuusalisia obubi.

³Nase nimbarumila abarumwa okhubabool'la mbu “Ise kholanga omulimo omukali, okwaranyala okhulekha ngongome nzitse y'yo tawe. Sinzia okhulekha omulimo kusinjile khulwokhwitsa ahamuli tawe.”

⁴Baarumila amang'ana kafwana mbwo esiakhane, nase nimbakalusinjia butswa amang'ana amatelwa.

⁵Ma Sanibalati niyarumila omurumikhiliwe olwakharano, nali nebarwa erareywekhwo omuhuri.

⁶Ebarwa tsana yahandikwamwo kano: “Kaboolwanga mubetsimbia, khandi kata Geshemu asangangakhwo mbu ibe nende Abayahudi muloosianga okhukhola indiri, ne niko akachilanga nimwombokha lisisi. Khandi kaboolwanga mbu ibe wenyanga okhuba omuruchi wabwe.

⁷Khandi mbu urechekhele abaroobi okhulandia amang'ana mu Yerusalemu, mbu niwe omuruchi wa Yuda. Siahene omuruchi yeetsa okhuhul'la khumang'ana kano kho ndolanga witse, khuloosie amang'ana halala.”

⁸Nase nimukalusia mbu, “Amang'ana akoboolanga kosi sikali akatooto tawe, habula nakeibe okulukunzanga mumwoyo kukwo omwene.”

⁹Bali nibakhurisianga mbu khulekhe okhutsilil'la nemilimo. Ndamala nisaaya mbu, “Nebutswa luno Nyasaye umeete tsingufu!”

¹⁰Litukhu elala ndatsia munyumba ya Shemaya omusiani wa Delaya omwitsukhulu wa Mehetabeli, oraali onyala okhurula munyumba. Yambool'la mbu, “Ise n'nawe okhwola khutsie okhwebisa halala Habundu Hatsienukhu ahe Muhekalu ma khweyikal'lemwo sichila betsanga okhukhwiira ibe. Ne mubutukhu bwosi okhurula olwaleelo baletsa okhukhwiira.”

¹¹Nase ningalusia mbu, “Ise sindi omundu wokhwilukha nende okhwebisa tawe. Opaalanga mbu ise nyala okhuhonia obulamu bwanje khulwokhwebisa mu Hekalu noho? Sinyala okhukhola mbwo tawe.”

¹²Olwa ndakanil'la khwing'ana yili, ndamanya mbu Nyasaye siyali nal'lomele na Shemaya tawe, nebutswa Tobia nende Sanibalati nibo abali nibamuheye ebihetso khulwo khumbelesia amachetsiyio yaka.

¹³Bamurunga khulwe ling'ana lino, kho yaarisie ma nase khole tsimbi kho babe abanyala okhwononia oluyali lwanje ma banyeke.

¹⁴Ndamala saaye mbu, “Nyasaye wanje, yanza witsul'le aka Tobia nende Sanibalati bakhol'le ma obahe esinyasio. Witsul'le omuroobi wesikhasi Noadia, nende abaroobi bandi bosi, abatemele okhuriisia.”

¹⁵Kho lisisi liahwa mumwesi kwa Eluli, nikuli amakhumi kabili nakharano, ne liabukula oluhono lwamatukhu amakhumi karano nakabili.

¹⁶Ma olwa basuku befwe bosi bahulilakhwo, abetsimbia tsiosi etsili ahembi baria okhusila ma nibakosia olutswoni lwabwe, sichila bamanyilisia mbu emilimo chino chiakholwa khulwobukhonyi bwa Nyasaye wefwe.

¹⁷Munyinga yiyo yosi abemeli ba Bayahudi bahandikan'nanga etsibarwa nende Tobia.

¹⁸Abandu abenji mu Yuda bali khulubeka lwa Tobia sichila yali niyateesia omukhaana wa Sheka owali omwitsukhulu wa Ara Omuyahudi, khandi omwanawe Yehohanani yali niyateesia omukhaana wa Meshulamu omusiani wa Berekia.

¹⁹Abandu bateemanga okhumbool'la khukemilimo emilahi echia Tobia yakhola ne nibamubool'la akandaboolanga. Tobia yatsilil'la okhumandiichila etsibarwa okhuriisia.