Read lunyore NEHEMIA 8 Bible Online

NEHEMIA 8 - lunyore bible

NEHEMIA 8

¹Olwomwesi kwakhane nakhataru kwoola, ne Abaisiraeli bali nibamal'le okhunyoola ahabamenya mumataala kabwe, abandu bosi nibebunjelesia halala mu Yerusalemu musikuuri esiali imbeli we Silibwa sia Maatsi. Babool'la Esira owali omwesaalisi khandi omusitsa owasomela Amalako ako MWAMI yahelesia Abaisiraeli okhubir'ra khu Musa mbu abukule esitapu sia Malako.

²Kho Esira naleera esitapu tsana imbeli womukanda, kwabasaatsa nabakhasi, nende bosi abakhanyala okhuhul'la nende okhumanyilisia. Yako kekhola khwitukhu liokhuranga eliomwesi kwakhane nakhataru.

³Yabasomela Amalako nibali musikuuri tsana esiali imbeli we Silibwa sia Maatsi, okhurula mukamba tsuli okhwola m'basu hakari, ne bosi bahuyie nende okhurechelesia amang'ana kesitapu yisio.

⁴Esira yasinjila khusirandaalo sietsimbao esiabalomba khulwomulimo kwene yikwo. Matitsia, Shema, Anaya, Uria, Hilikia, nende Maaseya, nabo basinjila halala n'naye khumukhono musaatsa; ne Pedaya, Mishaeli, Malikiya, Hashumu, Hashibadana, Sakaria, nende Meshulamu, nabo nibasinjila khumukhono mukhasi.

⁵Olwa Esira yasinjila khusirandaalo yisio esiali hekulu khubandu bosi, bosi bamureela tsimoni. Olwa yafuunula esitapu, abandu bosi basinjila.

⁶Ne Esira niyeetsoomia OMWAMI, Nyasaye omukali. Abandu nibachinga amakhono ikulu ma nibakalusia mbu “Amina, amina.” Bamala nibenamia emirwe, nibekayakaya OMWAMI, nibahunamiye obweni hasi.

⁷Ma abandu nibasinjila habundu wabwe olwa Abalawi bano babenoosia Amalako: Yeshwa, Bani, Sherebia, Yamini, Akubu, Shabetsai, Hodia, Maaseya, Kelita, Asaria, Yosabadi, Hanani, nende Pelaya.

⁸Basoma Amalako ka Nyasaye ma nibakakalula[2] ma nibakenoosia kho abandu babe abanyala okhukamanyilisia.

⁹Olwabandu bahulila amang'ana ka Malako, baria okhusila ma nibarekukha mukhwekhuula. Kho Nehemia owali omukafuna nende Esira, omwesaalisi khandi omusitsa owasomela Amalako halala nende Abalawi abali nibenoosianga Amalako, babool'la abandu bosi mbu “Litukhu lino nelitsienukhu khu MWAMI Nyasaye wenywe.

¹⁰Luno tsie ingo ma mulie lisabo. Musange ebiokhulia bienywe nende ewaini yenywe nende yabo abarali nebindu ebihela. Litukhu lino nelitsienukhu khu MWAMI wefwe, kho murabba nesibeela tawe. Obusangali bwo MWAMI amuhetsanga mulamumeeta tsingufu.”

¹¹Abalawi basiling'ania abandu bosi, nibababool'la mbu barabeelela khwitukhu litsienukhu singa yilio tawe.

¹²Kho abandu bosi batsia ingo ma nibalia nende okhunywa nobusangali ma nibasanga ebiabali n'nabio nende abasiabwe sichila bali nibahuliye amang'ana aka bali okhusomelwa ma nibakamanyilisia.

¹³Khwitukhu elialondakhwo, abemeli bebilibwa biabandu bosi halala nabesaalisi nende Abalawi batsia khu Esira khulwo khusoma nende okhumanyilisia amang'ana kamalako.

¹⁴Banyoola nikahandikwa mu Malako ako MWAMI yahaana okhubir'ra mu Musa mbu abandu bamenye mumahindu mumatukhu ke Lisabo lia Mahindu.

¹⁵Kho bahaana amebaalo kano ma nibakahila okhubir'ra mu Yerusalemu nende mumatookho kandi nomumataala mbu; “Rule mutsie khubikulu ma muleere tsisaka okhurula khumiseituni echiasimikhwa nende echiomubulimo, khandi nende tsisaka tsie mihatasi nende etsiamasindu nokhumisaala chindi mbu khulombe amahindu okhulondokhana nende amebaalo akahandikwa mu Malako.”

¹⁶Kho abandu baleera tsisaka yitsio ma nibalombela amahindu khubilama bietsinyumba tsiabwe, nomumichitsi tsiabwe nomumukitsikwe Hekalu, nende musikuuri siesioba esili ahembi nom'michitsi chiabwe, nom'michitsi tsieinyumba[3] ya Nyasaye, nesilibwa siamaatsi nende esili ahembi nesilibwa sia Efuraimu.

¹⁷Kho abandu bosi abakalukha okhurula mubuhambe balomba amahindu ma nibamenyamwo. Yilu nilwo olwali lwokhuranga amahindu okhulombwa okhurula mumatukhu ka Yoshwa omusiani wa Nuni. Ne bosi besiela ma nibaba nobusangali obukali okhusila.

¹⁸Okhurula khwitukhu liokhuranga okhwola khwitukhu liokhumal'likha, basomanga esitonye mu Malako ka Nyasaye bulitukhu. Balia lisabo khulwa amatukhu kane nakataru ne khwitukhu liamunane bali nende omukho kwokhwebunjikha halala okhulondokhana nende obwa kahandiikwa mu Malako.