Read lunyore NEHEMIA 9 Bible Online

NEHEMIA 9 - lunyore bible

NEHEMIA 9

¹Khwitukhu liamakhumi kabili nakhane eliomwesi kwene yikwo, Abaisiraeli bosi bebunjikha halala nibahonga okhulia khandi nibebiikha tsingubo tsiamakunia, khandi nibepuula olukuukhi khulwokhumanyia mbu babeleye khulwe tsimbi tsiabwe.

²Abolwibulo lwa Isiraeli bali nibeyahuye okhurula khutsimbia tsindi tsiosi. Bamala nibasinjila nibeyama tsimbi tsiabwe nende etsiabakuka babwe.

³Basomelwa Amalako ka Nyasaye khulwetsisaa tsitaru tsinondokhani, ne khulwe tsisaa tsindi tsitaru, beyama tsimbi tsiabwe ma nibamwekayakaya OMWAMI Nyasaye wabwe.

⁴Ma abandu bano nibasinjila khumusinji kwa Balawi okwali nikuliho: Yoshwa, Bani, Kadimieli, Shebania, Buni, Sherebia, Bani, nende Kenani. Basaaya nomwoyo omukali khu MWAMI Nyasaye wabwe.

⁵Ma Abalawi bano mbu: Yoshwa, Kadimieli, Bani, Hashabuneya, Sherebia, Hodia, Shebania, nende Petsahia, nibaboola mbu, “Sinjile, mumwitsoomie OMWAMI Nyasaye wenywe, mumwitsoomie khulwe inziayo! Abandu bosi betsoomie eliiralie likhongo kata nikali mbu obwitsoomi bwabandu sibuli obukali tawe.”

⁶Ma abandu ba Isiraeli nibasaaya mbu: “Ibe wenyene niwe OMWAMI, Walomba liloba nende inyanza nende biosi ebilimwo. Emikanda chiamahe kokhweikulu chikhwekayakayanga.

⁷Ibe OMWAMI, niwe Nyasaye owahula Aburamu, ma nomuhinia Uri elili mu Babulonia, nomukulikha eliira mbu Aburahamu.

⁸Wamunyoola nali omusubilwa imbeliwo, ma nolomba indakano n'naye. Wamusubisia mbu wakhamuhelesie esibala sia Kanaani, esibala sia Bahiti, Abaamori, Abaperisi, Abagirigashi nende Abayebusi, esiabetsukhulube bakhamenye mwo. Wahesia indakanoyo sichila obetsanga omusubilwa.

⁹“Wali okhulola singa abakuka befwe bakhupibwa esibi musibala sie Misiri; wahul'la okhulakaya khwabwe nibali khu Nyanza Inzakhanyu.

¹⁰Wamanyia ebilolelo biokhuchenyia imbeli womuruchi we Misiri khandi imbeli wabemeli baabe halala nabandu bomusibala sisie, sichila wamanya singa basandia abandu baabo. Wanyoola oluyali olwene yilwo, olwosili n'nalwo okhwola luno.

¹¹Walomba injila okhubir'ra munyanza, ma nobemel'la okhubir'ra khwiloba eliomu. Yabo ababalondel'la bahilwa namaatsi akatsia olutungu, singa lichina lieyinikhanga munyanza yebikubuli.

¹²M'mbasu wabemel'la nelilumbesi, ne mubutukhu wakhosia injila yabwe nomul'lo.

¹³Wekha okhurula mwikulu hasikulu sia Sinai; nol'loma khubandu baabo, ma nobahelesia amalako amalahi nende amebaalo amalahi.

¹⁴Wabechesia okhukhola Esabato yiyo okhuba inzienukhu ma okhubir'ra mumurumikhili uwo Musa wabahelesia amalako kaako.

¹⁵“Olwa bali neinzala wabahelesia ebiokhulia okhurula mwikulu khandi nobahelesia amaatsi okhurula mulwanda olwa bali nobuluho. Wababool'la benjile ma babukule liloba elia wali okhubasubisia.

¹⁶Nebutswa abakuka befwe bamala nibaba abeloli khandi abesikala marwi, ma nibasuula okhulonda amalako.

¹⁷Basuula okhuhulila, nibebil'la kosi akawabakhol'la; nibebil'la akamangalimwa kawakhola. Mubweloli bwabwe beela omwemeli owokhubakalusia Emisiri mubuhambe. Nebutswa ibe oli Nyasaye wetsimbabasi; oli owesirenda khandi owetsimbabasi, orahambwanga nelirima bwangu. Waitsula nobuyanzi oburalilu, sionyala okhubebil'la tawe.

¹⁸Balomba esiniini sifwana esimoosi esichulukhi, ne nibaboola mbu nisio esiabemel'la okhurula Emisiri! Kho bakhunyeka okhuhela mbwena, ibe OMWAMI!

¹⁹Nebutswa ibe siwabebala musitsiimi tawe, sichila tsimbabasi tsitsio netsingali. Siwahiniaho lilumbesi nohomba omul'lo tawe. Yibio biamanyia injila om'basu nobutukhu.

²⁰Khulwo bulahi bubwo wababool'la akabakhoyele okhukhola; wabalisia amana khandi nobahelesia amaatsi kokhunywa.

²¹Emihika amakhumi kane tsiabali musitsiimi, wabahelesia ebiabatakhanga biosi. Tsingubo tsiabwe sitsiarandukhakhwo tawe, kata ebilenje biabwe sibiasimbakhwo tawe.

²²“Wachila nibaleka amahanga nende Abaami bako abali ahembi n'nabo. Baleka esibala sia Heshiboni esirukungwa nende Sihoni, khandi nibaleka lihanga lia Bashani ahomuruchi Ogu yamihanga.

²³Wabahelesia abaana abenji singa tsinyininyini etsili khwikulu, ma nolekha nibaleka nende okhubukula liloba eliawali niwasubisia okhuhelesia abakuka babwe.

²⁴Bali okhuleka esibala sia Kanaani, ibe wali okhuleka abandu abamenya musibala yimwo. Wahelesia abandu baabo obunyali okhukhola kosi akabakhenya khubandu ba Kanaani nende abaruchi babwe.

²⁵Abandu baabo bali okhufumila amatookho akasirwa, namaloba amanolu netsinyumba etsietsulamwo obuhinda, namayabo kamaatsi, nemikunda chiemiseituni, nemisaala chiamatunde nende emikunda chiemisabibu. Balia biosi ebiabenya ma nibakhomela; bali okhusangal'la ebindu biosi ebiawabahelesia.

²⁶“Nebutswa abandu baabo bakhukhol'la induli, khandi nibasula okhuhulila amalakoko; bakhupa omukongo Amalako kaako. Nibera abaroobi bosi ababachetsiyanga, abababol'langa bakalukhe khuibe. Bakhunyeka buli khase,

²⁷kho walekha abasuku babwe nibabaleka nende okhubaruka. Olwa bali mumanyakhano bakhulakayila nibenyanga obukhonyi, ne nawe wabakalusia noli mwikulu. Khulwe tsimbabasi tsitsio tsingali wabarumila abemeli abali okhubasoola khubasuku babwe.

²⁸Olwa banyoolanga omulembe, bakholanga tsimbi khandi, khandi walekhanga abasuku okhubaleka. Ne olwa beyamanga ma bakhureebe okhubahonia, noli mwikulu wahul'la, ne buli lwosi, wabasoolanga khulwe tsimbabasitsio tsingali.

²⁹Wabachetsiyia balonde obwibaali bubwo, ne khulwobweloli bwabwe bafukula amalako kaako kata nikali okhulonda Amalako kaako niyo injila yokhunyoola obulamu. Khulwo khubula okhufunikha nende omurwe mukali basuula okhukhuhulila.

³⁰Buli muhika watsilil'la okhubachetsiyia mukhwefwila. Wara amang'ana kaako mubaroobi okhubabool'la, nebutswa abandu baabo bekala amarwi, kho nolekha nibalekwa nende abetsinzibulo tsindi.

³¹Ne sichila tsimbabasitsio netsingali, siwabebil'la nohomba okhubamulula tawe. Ibe oli Nyasaye wesirenda khandi owetsimbabasi.

³²“E Nyasaye, Nyasaye wefwe, oli omukhongo okhusila! Oli owokhurisia okhukali, khandi oli owetsingufu tsinyinji! Ibe oli omusubilwa khulwo khulinda indakano yamasubisio kaako. Okhurula khunyanga yabaruchi ba Asiria bakhusandia, okhwola kata luno, khwasal'la khulwo luhono! Abaruchi befwe, abemeli befwe, abesaalisi befwe nende abaroobi, abakuka befwe nende abandu befwe bakhupa esibi. Witsul'le omunyakhano kwakhwanyoola!

³³Ibe ukhol'le habwene khulwo okhukhuhelesia esinyasio; ibe obetsanga omusubilwa, kata nikali ifwe khwayona.

³⁴Abakuka befwe, abaruchi befwe, abemeli befwe nende abesaalisi befwe, sibalinda Amalako kaako tawe. Sibahulila amalako kaako nende obwibaali bubwo tawe.

³⁵Khulwetsikhabi tsitsio, abaruchi bamiha abandubo, olwa bamenya musibala esibambukhu khandi esinolu esiawabahelesia; nebutswa sibalekha tsimbi tsiabwe ma bakhurumikhile ibe tawe.

³⁶Ne luno ifwe khuli abasumba musibala esia wakhuhelesia, esibala esinolu yisi esikhuhelesianga ebiokhulia.

³⁷Biosi ebiamanga musibala bitsitsanga khumuruchi owa wakhuhelesia akhuruke sichila khwali okhukhola tsimbi imbeliwo. Bakholanga kosi aka benyele khu ifwe nende khumiruko chiefwe ma kho khuli musibi esikali.”

³⁸Khulwamang'ana akamal'le okhwekholekha, ifwe abandu ba Isiraeli khulombanga Indakano iralilu, nikhuchihandika halala, ne abemeli befwe, Abalawi nende abesaalisi befwe, nibarakhwo emihuli chiabwe.