Read lunyore ESITA 1 Bible Online

ESITA 1 - lunyore bible

ESITA 1

¹Omuruchi Ahaswero, yali okhuruka khutsingongo etsiyomba emia ndala nende amakhumi kabili natsine natsitaru okhurula India okhwola Etsiopia[1],

²nali khuluruba lwoburuchi bwe mu Susa litookho likali lia Perisia.

³Mumuhika kwakhataru kwokhwamiha khukhwe, Ahaswero yahaana lisabo likali okhulisia abakhongo bomuburuchi nende abarumikhili bosi. Abakhongo bamahe ka Perisia nende abamahe ka Media halala nende abakafuna nabemeli betsingongo nabo khandi bali mwisabo yilio.

⁴Khulwe emiesi chisasaba omuruchi yali namanyianga abachenibe obuhinda bwehango hahe, nende obubambukhu bwobunyali bwaho nende olukoosi lwobwami bubwe.

⁵Ma omuruchi nalisia lisabo khubandu bosi abamenyanga Susa litookho likali liesibalasie, khubakhongo nende abatu. Lisabo yilio liamala amatukhu kane nakataru mumuchitsi okuli hango hahe.

⁶Hamuchitsi tsana hasiahwa netsikatani tsiepamba indafu nende eyabuluu, ne tsiali nitsielel'le khumikoye tsieingubo isembe nende indafu. Emikoye tsana tsiali nitsisungilwe khutsingaka tsiefetsa etsiali nitsielel'le khutsisiilo tsiamachina amanyinanyinu. Khandi ebitanda bietsahabu nende ebiefetsa biali nibireywe mubwelu bwamachina amanyinanyinu namakhanyu, nende akamayayi ma nende akabuluu.

⁷Ebinywelel'la biatahilwa mubikombe biefetsa, ne siesikombe siali nobukondo bwasio obwabukhan'ne khusikombe sindi. Ne Ahaswero yahaana ewaini yesiami mubwinji.

⁸Abandu sibalemibwa ewaini tawe sichila omuruchi yali nalachile abakholi behangohe mbu bakhol'le buli mundu singa obwa yenyele.

⁹Olwene yilwo, Omukhaye Vashiti naye yahaana lisabo likali munyumba yomuruchi khubakhasi.

¹⁰Khwitukhu liakhane nakhataru, omuruchi Ahaswero yali nanywetsanga ne niyehul'langa bulahi, yalanga abasinjil'li behangohe bane nabataru abali abakhalabanibe omwene. Nabo bali, Mehumani, Bisitsa, Haribona, Bigitsa, Abagatsa, Setsari nende Kakasi.

¹¹Omuruchi yabalaka okhuleera Omukhaye Vashiti imbeli womuruchi niyebikhile olukwisa lwobukhaye. Omukhaye Vashiti yali owelikondo lilahi, kho omuruchi yenya yemanyie khubandu nende khubakhongo singa obwa omukhayewe yali owelikondo liokhuyanzisia.

¹²Olwa abasinjil'li yabo babool'la Omukhaye Vashiti akomuruchi yali nabarumile, Vashiti yasuula okhutsia. Yaka kakhola omuruchi okhusinyikha ma naba noburima obwinji.

¹³Yalinji ifwo yomuruchi okhurunilisia okhurula khubandu abachesi amang'ana kamalako nende obuloosie bwamang'ana. Kho yalanga abachetsiyi abokhumanyilisia akakhoyele okhukholwa.

¹⁴Abandu abali ahembi khuye aba yakhatsiyekhwo khwing'ana yili bali, Karishena, Shetihari, Adimatsia, Tarishishi, Meresi, Marisena nende Memukani. Yabo bali abakhongo bane nabataru okhurula Perisia nende Media, ne bali nomulimo omukali musibala sia Ahaswero yamihanga.

¹⁵Ma omuruchi naboola, “Ise omuruchi Ahaswero ndali okhuruma abasinjil'li banje khumukhaye Vashiti nelilako ne salikhol'le tawe! Nisina esielilako liboolanga akhol'lwe?”

¹⁶Kho Memukani naboola imbeli womuruchi nende imbeli wabakhongo, “Ne sikali Omukhaye Vashiti akholeye omuruchi yenyene obusiamu yibu tawe; nebutswa khandi khubakhongo bosi abali mutsingongo tsiomuruchi Ahaswero yamihanga tsiosi - kata nende khubasaatsa bosi.

¹⁷Okhuba olwe esikhole esiomukhaye Vashiti akhol'le sino nasimanyikhe khubakhasi bosi habulafu, nabachayenje abasaatsa babwe nibaboola, ‘Omuruchi Ahaswero yalaka Omukhaye Vashiti aleerwe khuye, nebutswa siyatsia tawe.’

¹⁸Olwa abakhaye babakhongo ba Perisia nende aba Media nabahulile khukokhukhola khwa Vashiti yikhu, nababool'lenje abasaatsa babwe akene yako eliuba ndirayela. Abakhasi habundu hosi sinababetsenje noluyali khubasaatsa babwe tawe, ne abasaatsa nabo nababe noburima obwinji khubakhasi babwe.

¹⁹Niliba niliakhakhuyanzisia ibe omuruchi, kho ohinie lilako lihandikwe mumalako ka Baperisia nende Abamedia, eliranyala khukalukhanibwakhwo tawe, mbu Vashiti arakhetsakhwo khandi imbeli womuruchi Ahaswero tawe; ma ohaane obukono bwa Vashiti khumukhaye undi oli omulahi okhumuyomba.

²⁰Olwe lilako lilio liakhamanyikha musibala sioburuchi bubwo, abakhasi bosi nabahaanenje oluyali khubasaatsa babwe, kata nibali abatakha nohomba abahinda.”

²¹Amang'ana kobuchetsiyi yaka kayanzisia omuruchi nende abakhongo yabo, ma omuruchi nakhola singa Memukani yali nabooye.

²²Yaruma etsibarwa khutsingongo tsioburuchibwe tsiosi, khusiolukongo mubuhandichi bwalwo, khusiabandu mululolomo lwabwe mbu siomusaatsa abe omukhongo munyumba yiye, ne al'lome nobunyali bwosi.