Read lunyore ESITA 2 Bible Online

ESITA 2 - lunyore bible

ESITA 2

¹Olweinyuma, nyinga lileko liomuruchi Ahaswero liali nilibombolokhele, yetsul'langa aka Vashiti yali niyakhol'le nende akali nikakhalachilwe khuye.

²Kho nilwo olwa abakhongo bomuruchi abamutendanga bamubool'la, “Ohuchil'le abakhaana ababuukha abobukondo obulahi bakhabilwe omuruchi.

³Nawe onyala okhwela abakhongo mutsingongo tsioburuchi bubwo tsiosi ma obalake baleere abakhaana ababuukha abobukondo munyumba omwabakhasi bomuruchi babiikhwanga mwo hano Susa litookho likali ma obare mubulindi bwa Hegai omusinjil'li wabakhasi ma banyoole obutendi obwo khubakhola abobukondo obulahi.

⁴Ne obukule omukhaana okhuyanzisia okhusila abe omukhaye musilenje sia Vashiti.” Yaka kayanzisia omuruchi, ma nakhola mbwo.

⁵Olwene yilwo yaliho Omuyahudi, owalangwanga Modekai owamenyanga Susa. Yali omwana wa Yairi omwitsukhulu wa Shimei, owesilibwa sia Kishi ma owolwibulo lwa Benjameni.

⁶Olwa omuruchi Nebukadinesa wa Babulonia yahila Yehoyakini omuruchi wa Yuda mubuhambe okhurula Yerusalemu, halala nende ababohe bandi, Modekai yali mulala khubo.

⁷Yali nende mufiala nyene owalangwa Esita ne eliiralie mu Luheburania yalangwanga Hadasa; yali omukhaana welikondo lilahi khandi omuhelanu. Olwa abebulibe bali okhufwa, Modekai yali niyamubukula ma niyamukhusia singa omukhaana uwe mwene.

⁸Kho olwa okhulaka khwomuruchi nende oburibuli bwe bwamanyikha, ma abakhaana abenji bali nibalerwanga Susa mubulindi bwa Hegai, Esita yali mulala khubo. Khandi naye yahilwa munyumba yabakhaana bomuruchi nareebwa hasi wa Hegai owali omulindi weinyumba yabakhasi.

⁹Esita yayanzisia Hegai ma Hegai namuhelesia oluyali olukali. Ne bwangu yamuhelesia ebiokhwebakhil'la bibie nende esitonye esichomekhe siebiokhulia. Yamuhelesia habundu halahi munyumba yabakhasi bomuruchi, ma namuha abakhaana bane nabataru abali nibel'lwe khulwo obulahi bwabwe okhurula hango homuruchi mbu bamutende.

¹⁰Esita siyaribulakhwo khumundu wosi mbu no Muyahudi tawe sichila Modekai yali niyamukaya.

¹¹Sielitukhu Modekai yabotokhananga hamuchitsi kwomuruchi niyenyanga okhumanya obwa Esita ali khandi singa obwa nakabe khuye.

¹²Okhweng'onia khwabakhasi okhwa buli khase khwabukulanga omuhika mulala; emiesi chisasaba okhwebakha amafura kamanemane, emiesi chindi chisasaba okhwebakha amafura kesuswa. Ma inyuma weyako, namal'le okhukhola yako, buli mukhana yahilwanga khumuruchi Ahaswero inyingaye niyol'le.

¹³Olwa yarulanga munyumba yabakhasi okhutsia khumuruchi, yebiikhanga siosi siosi esia yalinji nareebele.

¹⁴Yatsitsanga khumuruchi khubwile, ne omukamba okwalondangakhwo yahilwanga munyumba yabakhasi yindi hasi wobulindi bwa Shaashigasi, omusinjil'li owahenganga abakhasi ababiikhanga omuruchi. Omukhaana tsana siyakhakalukhile khumuruchi khandi tawe fwana omuruchi namuyanzile okhusila ma arumane alangwe khuliira lilie.

¹⁵Inyinga ya Esita okhutsia khumuruchi yoola. Ne Esita tsana yali omukhaana wa Abihaili ne yali mufiala nyene Modekai owali niyamubukula singa omukhaana uwe. Esita yayanzisia abandu bosi abamulolakhwo. Ne olwa inyinga yiye yoola, yebiikha butswa ebia Hegai omuhenji weinyumba yabakhasi yamulaka.

¹⁶Kho Esita yahilwa khumuruchi Ahaswero munzu yoburuchi omwesi kwelikhumi okulangwanga omwesi kwa Tebetsi khumuhika kwakhane nakhataru muburuchi bwa Ahaswero.

¹⁷Omuruchi yayanza Esita okhuyomba abakhaana bandi bosi, ma Esita nanyoola olulahi nende oluyali mutsimoni tsiomuruchi okhuyomba abandi bosi. Kho omuruchi yamubikhakhwo olukwisa lwobukhaye ma namukhola Omukhaye musilenje sia Vashiti.

¹⁸Ma omuruchi nalomba lisabo khulwa Esita, nalanga abakhongo nende Abaami bosi. Nalaka mbu abandu banyoole abuhuluukhi musibala sisie siosi ma khandi nahaana ebihanwa ebinji ebiomuruchi akhoya okhuhaana.

¹⁹Olwa abakhaana bebunjikha olwakhabili, Modekai yali niyaheywe omulimo kwobulindi musilibwa siomuruchi.

²⁰Esita naye siyaali niyabuulakhwo mbu no Muyahudi tawe sichila Modekai yali niyamukaya okhubool'lakhwo omundu wosi, naye yali niyamuhulila mwing'ana yili singa obwa yali niyamuhulila olwa yali nasili omukhaana muti mubulindi bubwe.

²¹Olwa Modekai yali nakholanga omulimo kukwe kwobulindi hango homuruchi, Bigitsana nende Tereshi, abakhongo babili abehango homuruchi abalindanga emiliango echienjilanga munyumba mwomuruchi mukari, bahamba Ahaswero obusuku ma nibaruna okhumwira.

²²Modekai yakamanya ma nabool'la omukhaye Esita owamala nabool'la omuruchi aka Modekai yali nahuliye.

²³Ling'ana yili liarunilisibwa ma nilinyoolekha okhuba eliatooto kho abandu babili yabo basungwa khumusaala. Omuruchi yalaka mbu amang'ana yaka kahandiikwe mubitapu bioburuchi bwesibala sie.