Read lunyore ESITA 3 Bible Online

ESITA 3 - lunyore bible

ESITA 3

¹Olweinyumakhwo, omuruchi Ahaswero yahelesia Hamani indebe ingali eyokhuba omukhongo wabemeli bosi. Hamani yali omwana wa Hamedatsa owolwibulo lwa Akaki[2].

²Omuruchi yalaka abakhongo bosi abali hasi woburuchibwe basikamile Hamani nibamwinamila khulwo okhumuhelesia oluyali. Bosi bakhola mbwo narali Modekai yenyene.

³Abakhongo bandi bamureeba esiachila naralonda lilako liomuruchi.

⁴Sielitukhu bamuhomba ahuchil'le okhukhola mbwo nebutswa naye siyahuchil'la tawe. Yababool'la, “Ise ndi Omuyahudi, ne sinyala okhwinamila Hamani tawe.” Kho babool'la Hamani amang'ana yaka nibachenyanga nikaba Hamani yakhahuchil'la ifwo ya Modekai.

⁵Hamani yahambwa noburima obukali olwa yamanya mbu Modekai sanyala okhumusikamila nende okhumwinamila tawe,

⁶ne olwa yamanya mbu Modekai no Muyahudi; Hamani yakhalaka mbu siyetsa okhuha Modekai yenyene esinyasio tawe. Yaloosia okhwira Abayahudi bosi abali musibala sia Perisia siosi.

⁷Khumuhika kwelikhumi nakhabili muburuchi bwa Ahaswero mumwesi kwokhuranga okulangwa mbu Nisani, Hamani yalaka mbu imbulu elangwanga Purimu ekhupwe okhunyoola litukhu eliahabwene nende omwesi okwokhwir'ramwo Abayahudi. Litukhu lieimbulu yabukula liali elie likhumi nakhataru khumwesikwe likhumi nakhabili okulangwanga omwesi kwa Adaru.

⁸Kho Hamani nabool'la omuruchi Ahaswero, “Baliho abandu nalebe abasalaana musibala sio siosi khandi banyoolekhanga mutsingongo tsiosi. Abandu yaba balondanga emiima echiabukhan'ne okhurula khuchiabandu bosi. Okhumetakhwo sibalondanga amalako kesibala sisio tawe. Kho sibuli obulahi obahuchil'le tawe.

⁹Nololanga namalahi, ohaane lilako mbu berwe. Nokhola mbwo, khusubisianga mbu nambaane etsahabu eyomba etsikilo 340,000 okhureebwa mwibiikhilo lioburuchi okhukhonyel'la omulimo kwobwemeli.”

¹⁰Omuruchi Ahaswero yahinia ingaka khusitere sisie eyarumikhilwanga singa esimanyilo khumalako kosi akomuruchi, ma nahaana ingaka tsana khu Hamani omwana wa Hamedatsa owolwibulo lwa Akaki owali omusuku wa Bayahudi.

¹¹Omuruchi nabool'la Hamani, “Abandu nende amapesa kabwe bali mumakhono kaako, obakhol'le singa wenyele.”

¹²Kho khwitukhu lielikhumi nakhataru khumwesi kwokhuranga, Hamani yalanga abahandichi bomuruchi halala. Yabasomela lilako liomuruchi mbu likalukhanibwe musiol'lolomo nende mubuhandichi oburumikhilwanga musibala siosi, ma nikarumwa khubami bosi, nabakafuna nende abakhongo bosi. Kahanwa muliira liomuruchi Ahaswero nikarebwakhwo esimanyilo sieingaka yiye omwene.

¹³Abarume bahila etsibarwa yitsi mutsingongo tsiosi nibelukhanga. Etsibarwa tsana tsialimwo obwibaali nende obunyali mbu khwitukhu elala, litukhu lielikhumi nakhataru, khumwesi kwa Adaru, Abayahudi bosi, ababuukha nabasakhulu, abakhasi nabaana berwe. Bamumwe sila tsimbabasi ne emiandu chiabwe chiosi chibukulwe.

¹⁴Amang'ana ketsibarwa yitsio kamanyibwa habulafu mutsingongo tsiosi mbu siomundu yerechekhe olwe litukhu yilio liola.

¹⁵Khulwe lilako liomuruchi, amalako yako kamanyibwa abandu bosi abamenyele Susa, ne abarume bakahila mutsingongo tsiosi. Omuruchi nende Hamani bekhala halala nibanywa ewaini olwabandu mwitookho lia Susa bali m'muboko omukali.