Read lunyore ESITA 4 Bible Online

ESITA 4 - lunyore bible

ESITA 4

¹Olwa Modekai yamanya kosi akali nikalosibubwe, yarandula tsingubotsie musibeela niyebiikha tsingubo tsiamatasi, niyebakha likokhe mumurwekwe ma nabotokhana mwitookho nakhupanga etsikhwisi butinyu.

²Yoola butswa khusilibwa siomuruchi, sichila omundu owebikhile amatasi siyahuchil'lwanga okhwinjila mumuchitsi kwomuruchi tawe.

³Mutsingongo tsiosi ahelilako liomuruchi liali nilihil'lwe, khwaliho nokhwekhuula okhukali mu Bayahudi. Bahonga okhulia, nibalakaya nende okhuronyia amasika. Abenji mubo bebiikha amatasi khandi nibakona mwikokhe.

⁴Olwa abarumikhili ba Esita abakhaana nende abalatebe bamubool'la aka Modekai yali nakholanga, Esita yanyakhana mumwoyo kukwe okhusila. Yahaana tsingubo tsihil'lwe Modekai yebiikhe musilenje siamatasi. Nebutswa Modekai siyatsibukula tawe.

⁵Esita yamala alange Hatachi, mulala khubalate behango homuruchi owa omuruchi yakhola okhuba omukholi wa Esita. Yamuruma atsie khu Modekai amubool'le esiekholekhanga nende esifune siasio.

⁶Hatachi yatsia khu Modekai mwitookho hakari hasilibwa sie hango homuruchi.

⁷Modekai yamubool'la kosi akali nikekhol'le khuye nende amapesa aka Hamani yali nasubisisie omuruchi okhuhaana mwibiikhilo lioburuchi, olwa Abayahudi bosi baba nibeer'rwe.

⁸Yahelesia Hatachi amalako akali mbuhandiche akahanwa Susa nikahaananga obunyali mbu Abayahudi bamululwe. Modekai yamubool'la ahil'le Esita namwinoosianga obwa amang'ana kafwana, na namureeba atsie okhumuhombela khumuruchi nokhumureeba abele abandu ba Esita tsimbabasi.

⁹Hatachi yakhola mbwo,

¹⁰ne Esita namubool'la akalukhe okhubool'la Modekai,

¹¹“Omundu wosi omusaatsa nohomba omukhasi naba niyenjila munyumba yomuruchi mukari nalola omuruchi ne naralanjilwe tawe, omundu uyo okhwola yerwe. Yilio nilio lilako, ne abandu bosi, okhurula khubachetsiyi bomuruchi okhwola khubandu abali mutsingongo bamanya nimbwo kali. Nebutswa eliho injila ndala yonyene eya khunyala okhwebatsilakhwo mbu omuruchi naba nachingila omundu indabusi ye eyetsahabu, kho omundu uyo siyakherwa tawe. Nebutswa kuhweye omwesi omulamba okhurula omuruchi niyananga.”

¹²Olwa Modekai yanyoola amang'ana ka Esita,

¹³yamurumila lichetsiyio lino mbu: “Orapaala mbu oli khuyandahii okhuyomba Abayahudi bandi sichila oli hango homuruchi tawe.

¹⁴Nosiling'ana munyinga singa yino, obukhonyi buletsela Abayahudi okhurula mwikulu nabo balahonibwa. Nebutswa ibe olafwa ne olwibulo lwapapawo lulatiba. Ne niwina omanyile, haundi wakhol'lwe omukhaye womuruchi khusifune singa yisi!”

¹⁵Esita narumila Modekai likalusio yili:

¹⁶“Tsia obunjelesie halala Abayahudi bosi abali mu Susa. Muhonge okhulia ma musaayile ise. Muraliakhwo kata okhunywakhwo esindu siosi khulwa amatukhu kataru nobutukhu tawe. Abarumikhili banje abakhaana halala n'nase nakhukhole mbwo. Inyuma we yako nanzie khumuruchi, kata nikali lilako silimbuchil'langa tawe. Nikakhaba mbu ndakhafwa khulwa okhukakhola, nafwe.”

¹⁷Ma Modekai natsia ma nakhola kosi aka Esita yali namubooleye.