Read lunyore ESITA 5 Bible Online

ESITA 5 - lunyore bible

ESITA 5

¹Khwitukhu lilie eliakhataru okhuhonga okhulia, Esita yebiikha tsingubo tsitsie tsiolukhaye ma natsia nasinjila mukari mweinyumba yomuruchi eli ahembi noluruba. Omuruchi yali nalimwo niyekhaye khuluruba lwobwami nahengele enamuliango.

²Olwa omuruchi yalola omukhaye Esita nasinjiye hamuliango, yamusangal'la okhusila ma namuchinjila ikulu indabusiye yetsahabu. Esita yamala yenjile ma natiila mubutsunzu bweindabusi tsana.

³Omuruchi namureeba, “Nisina esikwiye, omukhaye Esita? Mbool'la esia wenyanga, nase ndakhakhuha kata niwakhenya enusu yesibala sianje.”

⁴Esita nakalusia, “Noba noyanza omwami, ndakhekomba ibe nende Hamani mube abacheni banje mwisabo elia mulombelanga.”

⁵Omuruchi yamala alange Hamani yetse bwangu mbu babe abacheni ba Esita. Kho omuruchi nende Hamani batsia mwisabo elia Esita yabarechekhela.

⁶Olwa bali nibanywetsanga ewaini, omuruchi khandi yabool'la Esita, “Mbool'la esia wenyanga nase ndakhakhuha. Nzia okhukhuhelesia esia wakhareba, kata noba nosaba enusu yesibala sianje.”

⁷Esita nakalusia, “Okhusaaya khwanje nende okhusaba khwanje khuli mbu:

⁸Omuruchi naba niyambalanga ise okhuba matsami, ma nikayanzisianga omuruchi okhumbelesia akobusabi bwanje, ndakhekomba ibe nende Hamani namube abacheni banje khandi mukamba, mwisabo lindi elia namulombele. Olwene yilwo nambool'le omuruchi akanyenyanga.”

⁹Olwa Hamani yarula mwisabo yimwo, yali nobusangali khandi yali omusakulukhu okhusila. Nebutswa yalola Modekai niyekhaye hasilibwa esinjilanga hango homuruchi, ne olwa Modekai aramusinjil'la nohomba kata okhumanyiakhwo oluyali lwosi olwa Hamani yali nabiranga, Hamani yamusinyikhila okhusila.

¹⁰Nebutswa yekhulumamia ma natsia ingowe. Yamala alange abalinabe munzumwe, khandi nalanga omukhasiwe Sereshi okhuba halala n'nabo.

¹¹Yamala nabepachila singa yali omuhinda, obwa yali nabasiani abenji, obwomuruchi yali namuheye indebe ingali muburuchi, khandi obwa yali omundu omukhongo okhuyomba abemeli bandi bosi bomuruchi.

¹²Nameeta okhuboola “Okhuyomba akene yako, omukhaye Esita alombele butswa lisabo khumuruchi nende khu ise sienyene. Ma khandi ukhulanjile khukalukheho mukamba.

¹³Nebutswa yako kosi sikali esindu khu ise tawe, oluhono olwasilola Omuyahudi olangwanga Modekai niyekhaye hasilibwa esinjilanga hango homuruchi.”

¹⁴Omukhasiwe halala nabalinabe nibaboola, “Busina oralomba emisaala tsiokhusungilakhwo abandu tsioburambi obuhela etsimiita amakhumi kabili nachibili? Ma mukamba tsuli norebe omuruchi mbu ahuchil'le Modekai asungwekhwo. Ma nomal'le akene yako otsie mwisabo nosangaye.” Ling'ana yili liayanzisia Hamani ma nalomba emisaala yitsio.