Read lunyore ESITA 6 Bible Online

ESITA 6 - lunyore bible

ESITA 6

¹Obutukhu bwene yibwo tsindoolo sitsiayitsa m'moni mwomuruchi tawe, kho yalaka mbu aleer'rwe ebitapu ebiahandikwamwo amang'ana akoburuchi ma asomelwe.

²Esitonye esia yasomelwa sialimwo nende amang'ana akal'lomanga khu Modekai singa yali naribuye obusiemani bwokhwira omuruchi — obusiemani obwali nibulombelwe nende Bigitsana nende Tereshi, abakhongo babili abalindanga inyumba yomuruchi.

³Omuruchi nareeba, “Niluyali sina olwa Modekai yanyoola khandi nimukabwa sina okwa yahebwa khulwa akene yaka?” Abarumikhili baabe nibamukalusia, “Sibulaho esia yakhol'lwa.”

⁴Omuruchi nareeba, “Niwina khubakhongo banje oli munzu yoburuchi yino?” Yaho Hamani yali niyakhenjilanga munyumba yomuruchi esaa yene yiyo. Yali niyetsele okhureeba omuruchi ahuchil'le Modekai asungwe khumisaala echia yali narechekhele.

⁵Kho abarumikhili nibabool'la omuruchi, “Hamani ali hano yenyanga akhulole.” Omuruchi naboola, “Mubool'le yenjile mukari.”

⁶Kho Hamani yenjila ma omuruchi namubool'la, “Aliho omundu nalebe owanyenyanga okhuhelesia oluyali, ndakhamukhol'la sina?” Hamani niyereeba omwene, “Niwina owomuruchi yakhahelesia oluyali narali ise?”

⁷Ma Hamani nabool'la omuruchi, “Khumundu owomuruchi ayanzanga okhuhelesia oluyali,

⁸Lekha tsingubo tsiobwami tsilerwe etsie ibe omwami wachendelakhwo, khandi esululi eye ibe omwami waninakhwo, esiayilwe olusimbi lwesiami khumurwe kwayo.

⁹Ma obukule mulala khubakhulundu baabo boluyali olweikulu okhubiikha omundu uyo tsingubo, ma amuchesie hakari welitookho nanin'ne khusululi. Ne omukhulundu woluyali uyo achendenje nabool'la abandu, ‘Lole obwomuruchi ahaananga omukabwa khumundu wosi owayanzanga okhuhelesia oluyali!’ ”

¹⁰Ma omuruchi nabool'la Hamani, “Tsia bwangu olere tsingubo nende esululi ma ohaane oluyali yilu khu Muyahudi olangwanga Modekai. Okhole kosi khuye singa obooye. Witsa okhumunyoola niyekhaye hasilibwa esinjilanga hango homuruchi.”

¹¹Kho Hamani naleera tsingubo nende esululi nabikha Modekai tsingubo. Modekai naniina khusululi ne Hamani namuchesia hakari welitookho nabool'langa abandu, “Lole obwomuruchi ahaananga omukabwa khumundu owayanzanga okhuhelesia oluyali!”

¹²Modekai yamala akalukhe hasilibwa esinjilanga hango homuruchi olwa Hamani naye yatsia ingo maribiri nafumile m'moni mumwe khulwe es'simba murwe.

¹³Yabool'la omukhasiwe nende abalinabe bosi kosi akali nikekhol'le khuye. Ma omukhasiwe nende abalinabe abachesi nibamubool'la, “Uchiachile okhukosia obunyali bubwo okhutsia khu Modekai. Ye no Muyahudi nawe sionyala okhumuyomba tawe. Mubwatooto ye nakhuleke.”

¹⁴Olwa bali nibasil'lomanga, abalate behango homuruchi boola, ne nibabukula Hamani bwangu okhumuhila mwisabo elia Esita yali narechekhele.