Read lunyore ESITA 7 Bible Online

ESITA 7 - lunyore bible

ESITA 7

¹Ma omuruchi halala nende Hamani nibatsia okhulia nende omukhaye Esita

²olwakhabili. Ne olwa bali nibanywetsanga ewaini, omuruchi yareeba Esita khandi, “Nisina esia wenyanga? Mbool'la nase ndakhuhelesia. Ndakhuha kata enusu yesibala sianje.”

³Omukhaye Esita namukalusia, “Nikaba nikakhuyanzisia omwami okhumbelesia akobusabi bwanje, okhusaaya khwanje khuli mbu ibe omwami, osoole obulamu bwanje nende obwa abandu banje.

⁴Amapesa amenji kamal'le okhurungwa khulwe ise nende abandu banje okhwirwa, nokhumululwa. Nikarakhabeye amabi okhuyomba okhukusibwa singa abasumba, ndakhasiling'an'ne butswa ne sindakhakhunyasisie tawe. Nebutswa khuli ahembi okhumululwa nende okhumalwa.”

⁵Ma omuruchi Ahaswero nareeba Esita, “Niwina owenyanga okhukhola ling'ana yili? Ne omundu tsana ali hena?”

⁶Esita nakalusia naboola, “Omusuku wefwe khandi omusandi wefwe nomundu omubi uyo, Hamani!” Hamani nahambwa noburi obukali imbeli womuruchi nende imbeli womukhaye Esita.

⁷Omuruchi nasinjila muburima, narula natsia esioba hamuchitsi. Hamani yamanya mbu omuruchi yali nakhalachile mumwoyokwe mbu yetsa okhumuha esinyasio khulwa akene yaka, kho Hamani yasikala inyuma nasaaya Esita mbu aramwira tawe.

⁸Hamani yali nakwiye hasitanda sia Esita okhumureeba obulekheli olwa omuruchi yakalukha okhurula esioba. Olwo omuruchi yalola akene yako, yahuka ma naboola, “Omundu uyo yenyanga okhwononia omukhaye wanje munzu mwanje nireyekhwo imoni?” Olwa omuruchi yali namalilanga okhuboola yikhwo, abalate bafuunikha obweni bwa Hamani.

⁹Kho mulala khubo owalangwanga Haribona naboola, “Kata khandi okhumeeta khu yaka, Hamani ulombele emisaala hanyumbawe etsiokhusungwakhwo Modekai owahonokosia obulamu bubwo omwami. Emisaala tsana tsili noburambi bwokhutsia ikulu etsimiita amakhumi kabili natsibili.” Omuruchi naboola, “Musunge Hamani khutsio.”

¹⁰Kho Hamani yasungwa khumisaala echia yali nalombeye Modekai, ma lirima liomuruchi nilibombolokha.