Read lunyore ESITA 8 Bible Online

ESITA 8 - lunyore bible

ESITA 8

¹Litukhu liene yilio omuruchi Ahaswero yahelesia Omukhaye Esita emianduchiosi echialinji echia Hamani, omusuku wa Bayahudi. Esita yaribul'la omuruchi mbu Modekai yali mufiala nyene, ne okhurula olwene yilwo Modekai yahuchil'lwa okhwinjilanga hango homuruchi.

²Omuruchi yahinia ingaka yiye elikhwo nende esimanyilo (eya yali nanul'le Hamani) ma nachihana khu Modekai. Esita yara emiandu chia Hamani chiosi hasi wobulindi bwa Modekai.

³Ma Esita nal'loma khumuruchi khandi. Yakwa habilenje biomuruchi nalakaya amasika ma namureeba ahinieho amang'ana amabi kosi aka Hamani owolwibulo lwa Akaki yali niyalosia okhwira Abayahudi.

⁴Omuruchi yachingila Esita indabusi ye yetsahabu ikulu ma Esita nasinjila

⁵naboola, “Nikakhakhuyanzisia omwami ma nawe niumendel'langa, khandi nikakhalolekha akahabwene khuibe, yanza ohaane lilako liokhwikal'la amang'ana aka Hamani omwana wa Hamedatsa owolwibulo lwa Akaki yahaana khulwa okhwirwa khwa Bayahudi musibala sisio siosi.

⁶Ndakhefwila mbwena nikakhaba esibi yisi siakhakwila abandu banje, ne abekho banje nibaba nibeer'rwa?”

⁷Omuruchi Ahaswero nabool'la Esita nende Omuyahudi Modekai, “Lole, mal'le okhusunga Hamani khulwo busiemani bubwe khu Bayahudi, khandi mbelesisie Esita emiandu chichie.

⁸Nebutswa lilako elihan'nwe muliira nomuruchi ma elireywekhwo esimanyilo siomuruchi silinyala okhukalukhanibwa tawe. Inywe munyala okhuhandichila Abayahudi kosi aka mwenyanga ne munyala okhukahandika muliira lianje ma mukarekhwo esimanyilo sianje.”

⁹Yaka kekhola khwitukhu liamakhumi kabili nakataru khumwesi kwakhataru okulangwanga omwesi kwa Sifani. Modekai yalanga abahandichi bomuruchi nababool'la aka bahandichila Abayahudi nende abakafuna, nende abemeli nende abakhongo betsingongo emia ndala namakhumi kabili natsine natsitaru okhurula India okhwola Etsiopia. Etsibarwa tsana tsiahandikwa khusiolukongo mul'lolomo lwalwo nende mubuhandiichi bwalwo, khandi khu Bayahudi mul'lolomo lwabwe nende mubuhandichi bwabwe.

¹⁰Modekai yahandika etsibarwa yitsio muliira liomuruchi nareyekhwo esimanyilo siomuruchi. Tsiahilwa nende abarume abanina khutsisululi etsielukhanga bwangu etsiarula hango homuruchi.

¹¹Etsibarwa yitsio tsienoosia mbu omuruchi yahelesia Abayahudi obunyali mu sielitookho okhwebunjikha halala khulwa okhwesoola abene nibakhaserwa nabandu abali nebilasan'nwe okhurula mulwibulo lwosi lwosi mutsingongo tsiosi, nabo babalwane, nibabeera bosi halala nabakhasi babwe, nende abaana babwe. Babeere bosi okhwola khumundu wokhumalilikha ma bayaake emiandu chiabwe.

¹²Lilako yilio lienyekha likholwe musibala sia Perisia siosi khwitukhu eliali niliarechekhelwa okhwira Abayahudi. Nalio liali litukhu lielikhumi nakhataru khumwesi kwelikhumi nakhabili okulangwanga omwesi kwa Adaru.

¹³Liabisibwa singa lilako ma nilimanyibwa abandu bosi mutsingongo tsiosi, kho Abayahudi babe abanyala okhulwana abasuku babwe olwe litukhu liene yilio liba ndiol'le.

¹⁴Olwo omuruchi yali nabalachile, abarume banina khutsisululi tsiomuruchi nibachilusia tsimbilo tsingali. Khandi lilako tsana liamanyibwa abandu bosi mwitookho likali lia Susa.

¹⁵Modekai yarula hango homuruchi niyebikhile tsingubo tsiolwami tsindafu nende etsiabuluu. Khandi yebiikha ekanzo isembe nende olusimbi lwetsahabu olung'inang'inu. Ma emihanda mwitookho lia Susa chietsula namayoosi kobusangali nende liyoka liesikhu.

¹⁶Abayahudi bali nende obusangali, nokhuhotselekha. Betsula nobuyanzi nende obulechi.

¹⁷Musielitookho mutsingongo tsiosi ahelilako liomuruchi liasomwa, Abayahudi bali nobuhuluukhi nende obusangali. Abandu abenji bekhola Abayahudi sichila bali nibariye Abayahudi.