Read lunyore ESITA 9 Bible Online

ESITA 9 - lunyore bible

ESITA 9

¹Litukhu lielikhumi nakhataru khumwesi kwelikhumi nakhabili okulangwanga omwesi kwa Adaru liola, olwe lilako liomuruchi lienya lihesibwe, litukhu eliabasuku ba Bayahudi banaayanga okhubeera. Nebutswa musilenje isio Abayahudi babaleka.

²Habundu hosi aha Bayahudi bamenyanga musielitookho musibala sia Perisia, Abayahudi berechekha okhuseera omundu wosi owakhenya okhubasalisia. Abandu siahabundu hosi baria Abayahudi ne abulaho owakhabenjiliye.

³Abakhongo betsingongo bosi, nabakafuna, nabemeli nende abarume bomuruchi bakhonyel'la Abayahudi sichila bosi bali nibariye Modekai.

⁴Kali nikamanyikhile musibala siosi esia Perisia mbu Modekai yali omundu owobunyali hango homuruchi khandi yali nametekhanga okhuba nobunyali obwinji.

⁵Kho Abayahudi bakhakhol'le kosi aka benyele khubasuku babwe. Babaremaka netsinganga tsiabwe, ma nibabera.

⁶Mwitookho likhongo lia Susa, Abayahudi bera abandu etsimia tsirano.

⁷Khandi bera Parashandatsa, Dalafoni, Asipatsa,

⁸Poratsa, Adalia, Haridatsa,

⁹Pamasitsa, Arisai, Aridai nende Vaisatsa.

¹⁰Yabo nabasiani likhumi ba Hamani owali omusiani wa Hamedatsa omusuku wa Baisiraeli. Nebutswa Abayahudi sibabukula emiandu chiabwe tawe.

¹¹Litukhu liene yilio, amabalo kabandu aberwa mu Susa kamanyibwa omuruchi.

¹²Ma omuruchi nabool'la omukhaye Esita, “Mu Susa mwonyene, Abayahudi ber're abandu etsimia tsirano abasiani ba Hamani likhumi nibalimwo. Kho bakhaba banga aber'rwe mutsingongo tsindi! Luno nisina esia wenyanga mbu khuhelesie? Umbool'le nase ndakhakhuhelesia.”

¹³Esita nakalusia, “Nikakhakhuyanzisia Omwami, olekhe Abayahudi abali mu Susa bakhole khandi mbwo mukamba aka baali okhuhuchil'lwa okhukhola olwaleelo. Khandi olake emibili chiabasiani ba Hamani chisungwe khumisaala.”

¹⁴Omuruchi yalaka mbu yaka kakholwe, ne lilako yilio liahanwa mu Susa emibili chiabasiani ba Hamani chiabakalwa habulafu.

¹⁵Khwitukhu lielikhumi na khane, Abayahudi ba Susa bebunjikha halala khandi, ma nibeera abandu bandi etsimia tsitaru mwitookho. Nebutswa khandi sibabukula emiandu chiabwe tawe.

¹⁶Abayahudi mutsingongo tsindi betsa halala mbu besoole. Banyoola okhuhuluukha okhurula khubasuku babwe olwa bera abandu etsielefu amakhumi kane nakataru natsirano abali nibabalila amakhasi. Nebutswa sibabukula emiandu chiabwe tawe.

¹⁷Yili liali litukhu lielikhumi nakhataru khumwesi kwa Adaru. Khwitukhu elialondakhwo litukhu lielikhumi na khane, sikhwali ho nobwiri bundi tawe. Ne balikhola litukhu lielisabo nende eliobusangali.

¹⁸Abayahudi ba Susa bakhola litukhu lielikhumi nakharano okhuba litukhu liokhuhuluukha sichila bali nibeer're abasuku babwe khwitukhu lielikhumi nakhataru nende elielikhumi nakhane ma nibalekha okhwira khwitukhu lielikhumi na kharano.

¹⁹Nisio esichilanga Abayahudi abamenyele mumataala amati babukulanga litukhu lielikhumi nakhane khumwesi kwa Adaru okhuba litukhu liokhuhuluukha nende eliokhusangala. Liali litukhu liokwelesania ebihanwa biebiokhulia nende abasiabwe.

²⁰Modekai yahandika amang'ana yaka hasi ma naruma etsibarwa khu Bayahudi bosi abali ahembi nende ehale musibala sia Perisia siosi.

²¹Yababool'la betsul'lenje litukhu lielikhumi nakhane, nende elielikhumi nakharano khumwesi kwa Adaru buli muhika singa litukhu liokhuhuluukha.

²²Yaka kali amatukhu aka Abayahudi bali nibamaliyemwo abasuku babwe. Ne omwesi kwa Adaru kwali omwesi okwali nikukalukhanibubwe okhurula musibeela nende esihenda mwoyo nikukwa omwesi kwobusangali nende obusakulukhi bwomwoyo. Babool'lwa betsul'lenje amatukhu yako khulwo okhulomba amasabo nende emikho, nibahelesania ebihanwa biebiokhulia abene khubene nende kata khubatakha.

²³Kho Abayahudi balonda lilako lia Modekai ne lisabo yilio ndiba eliokhukholwa buli muhika.

²⁴Hamani omwana wa Hamedatsa owolwibulo lwa Akaki omusuku wa Bayahudi yali niyakhupa imbulu (nohomba “Purimu” singa imbulu tsana yalangwa) okhunyoola litukhu liokhwira Abayahudi bosi. Yali naloosisie okhubamala bosi pe.

²⁵Nebutswa olwa Esita yatsia khumuruchi, omuruchi yamala ahaane lilako mubuhandike mbu amang'ana ka Hamani yali naloosisie okhwira Abayahudi, kamukalukhane omwene. Ye nende abasianibe basungwa khumisaala echia yali narechekhele.

²⁶Nisio esiachila amasabo yako nikalanga Purimu khulwe ebarwa ya Modekai yali nahandichile khandi khulwa kosi akali nikekhol'le khubo.

²⁷Abayahudi balilomba okhuba lilako khubo abene nende khutsinzibulo tsiabwe khandi khumundu wosi owakhakwa Omuyahudi, mbu munyinga eyahuchil'lwa buli muhika, amatukhu kabili yaka naketsul'lwenje okhulondokhana namalako aka Modekai yabahelesia.

²⁸Kabisibwa mbu siesilibwa sia Bayahudi mutsinzibulo etsiamatukhu aketsanga mutsingongo tsiosi nende mumatookho kosi, betsul'lenje nibakhola amasabo amatukhu ka Purimu amatukhu kosi aketsanga.

²⁹Kho Omukhaye Esita, omukhaana wa Abihaili halala nende Modekai Omuyahudi bahaana obunyali mubuhandike nibakobokhelanga ebarwa eya Modekai yahandika khumang'ana ka Purimu.

³⁰Ebarwa iyio yahandiichilwa Abayahudi bosi abali mutsingongo emia ndala namakhumi kabili natsine natsitaru musibala sia Perisia siosi. Ne yabekombela omulembe nende obulakhuule.

³¹Ebarwa tsana yebaal'la Abayahudi nende tsinzibulo tsiabwe okhwitsul'la amatukhu ka Purimu munyinga yako, singa obwa bali nibalondanga amalako kokhuhonga okhulia nende amatukhu kokhwekhula. Yaka kalakwa nende Omukhaye Esita halala nende Modekai.

³²Lilako lia Esita, okhutinyilisia amalako ka Purimu liahandiikwa hasi musitapu esifumba.