Read lunyore OKHURULA 1 Bible Online

OKHURULA 1 - lunyore bible

OKHURULA 1

¹Kano namera kabaana ba Yakobo abali okhutsia n'naye Emisiri. Siamulala nende abeinzu yiye bali,

²Rubeni, Simioni, Lawi, Yuda,

³Isakari, Sabuloni, Benjameni,

⁴Dani, Nafutali, Gadi nende Asheri.

⁵Ne abandu bosi abolwibulo lwa Yakobo bali abandu amakhumi kane nakataru.

⁶Ma olunyuma, Yosefu, nabaana babwe nende olwibulo yilwo nibafwa,

⁷nebutswa abetsukhulu babwe Abaisiraeli bebulana okhusila ma nibenjiha, nibaba abetsingufu khandi nibasilana musibala sie Misiri.

⁸Kho omuruchi omucheni oraali niyamanyakhwo Yosefu nachaaka okhwamiha Emisiri.

⁹Kho yabool'la abandu baabe mbu, “Abaisiraeli yaba nabenji okhusila khandi bakhuyombel'langa netsingufu.

¹⁰Lihe niliakhabaho, bakhetsukhila nibabukila abasuku befwe khulwa okhukhulwana ma bamihe esibala siefwe. Okhwola khurune injila yokhubekal'la balekhe okhwinjila.”

¹¹Kho Abaisiraeli babara hasi wabasinjil'li bokhubahachia okhukhola emilimo emisiro khulwo okhubasandia. Abaisiraeli bombokhela omuruchi uyo amataala kokhubiikhamwo ebindu akalangwanga Pitsomu nende Ramase.

¹²Nebutswa oluhono lwa Abaamisiri basandinjia Abaisiraeli, nilwo olwa nabo bameetekhanga okhwinjiha nende okhulanda musibala yimwo. Ma Abaamisiri nibatang'a khulwa Baisiraeli.

¹³Kho bahachia abandu ba Isiraeli okhukhola emilimo emitinyu sila tsimbabasi,

¹⁴nibara obulamu bwabwe mubutinyu khulwo khukhola emilimo emitinyu mukhusienya litoyi nende okhulonga amatifwali nende emilimo chindi chiosi echiomumukunda. Mumilimo chiabwe chiosi Abaamisiri babahachia okhutiya butinyu sila tsimbabasi.

¹⁵Kho omuruchi we Misiri nal'loma khu Shifira nende Pua abakhasi babili abakhonyel'langa abakhasi Baheburania okhwibula.

¹⁶Nababool'la mbu, “Olwa mwibusianga abakhasi Baheburania namwire omwana naba nali omusiani, nebutswa nali omukhaana muramwira tawe.”

¹⁷Nebutswa abakhasi bokhwibusia yabo bali abaria Nyasaye, kho sibakhola akomuruchi yababool'la tawe; musilenje yisio sibayira abasiani tawe.

¹⁸Kho omuruchi yalanga abakhasi yabo nabareeba mbu, “Mukholanga mbwo busina? Esichilanga nimureera abasiani nisina?”

¹⁹Abakhasi yabo nibakalusia mbu, “Abakhasi Abaheburania sibali singa abakhasi Bamisiri tawe. Bebulanga munjila indoro, ne abaana babwe bebulwanga kata mulala khu ifwe nasili okhwolaho.”

²⁰Ne sichila abakhasi abebusianga yabo bali nibaria Nyasaye, yabakhol'la aketsimbabasi ma nabahelesia tsinyumba tsiabwe abene. Ne Abaisiraeli bameetekha okhwinjiha ma nibaba abetsingufu.

²²Ma olwokhumal'likha omuruchi yamala nahaana lilako khubandube bosi: “Mubukule omwana omusiani wosi Omuheburania owibuywe mumufuube mumuchela kwa Naili, nebutswa mureera abaana abakhaana tawe.”