Read lunyore OKHURULA 11 Bible Online

OKHURULA 11 - lunyore bible

OKHURULA 11

¹Ma OMWAMI nabool'la Musa mbu, “Nzia okhuhaana esinyasio sindi silala sionyene khumuruchi we Misiri halala nabandu baabe. Inyuma wasio yetsa okhumulakhuula mutsie. Akatooto kali mbu yetsa okhumukhungania inywe mwesi okhurula hano.

²Luno l'loma nabandu ba Isiraeli obabool'le bosi bareebe abarende babwe babahelesie efetsa nende etsahabu.”

³OMWAMI yakhola Abaamisiri okhuha Abaisiraeli oluyali. Akatooto kali mbu abemeli ba Bamisiri nende Abaamisiri bosi bamulola singa omundu woluyali olukali.

⁴Ma Musa nabool'la omuruchi mbu, “OMWAMI aboolanga mbu, ‘Ahembi mubutukhu hakari nambir're mu Misiri,

⁵ne siomusiani wosi omwikulanda mu Bamisiri nafwe, okhurula khumusiani womuruchi owalaamilwa oburuchi, okhwola khumusiani womusumba mukhasi osetsanga obuswache. Ebimoosi biambeli bietsing'ombe nabio khandi nabifwe.

⁶Nakhubeho nokhwekhuula okhukali musibala sie Misiri siosi okhusili okhubakhwoho khandi okhurakhabekhwoho.

⁷Nebutswa kata imbwa yonyene sinesamilekhwo Omuisiraeli wosi nohomba emiruko chia Baisiraeli tawe. Nilwo olwa nomanye mbu Ise, OMWAMI ndalomba olwakho hakari wa Bamisiri nende Abaisiraeli.’ ”

⁸Musa yamalila naboola mbu, “Abemeli baabo bosi nabeetse khu ise ma nabaasikamile ne nabamombe mbukule abandu banje ma nzie n'nabo. Inyuma we yako narule ma nanzie.” Ma Musa narula khumuruchi nali nelileko likali.

⁹OMWAMI nabool'la Musa, “Omuruchi yetsa okhutsilil'la okhubula okhukhuhul'la kho mbe onyala okhukhola akamangalimwa amenji musibala sie Misiri.”

¹⁰Musa nende Haruni bakhola akamangalimwa yaka kosi imbeli womuruchi nebutswa OMWAMI yatinyia omwoyokwe ne siyalakhuula Abaisiraeli okhurula musibala sisie tawe.