Read lunyore OKHURULA 13 Bible Online

OKHURULA 13 - lunyore bible

OKHURULA 13

¹OMWAMI yabool'la Musa mbu,

²“Ohaane khu ise siesindu esisaatsa esikulanda, okhuba siomusiani mwikulanda mu Isiraeli nowanje khandi siomuruko kwes'saatsa okwa mbeli nokwanje.”

³Musa nabool'la abandu, “Mwitsul'le litukhu lino; litukhu eliamuruliyekhwo Emisiri, hamwabeyenje abasumba. Lino nelitukhu lio MWAMI yamuhinia Emisiri narumikhilanga obunyali bubwe obukhongo. Omukaati okulimwo amamela kuralibwa tawe.

⁴Murulanga Emisiri khwitukhu lino khumwesi kwokhuranga, omwesi kwa Abibu.

⁵OMWAMI yesuhila abakuka benywe okhubahelesia esibala sia Abakanaani, Abahiti, Abaamori, Abahiwi, nende Abayebusi. Olwa namwosie musibala siobuhinda nende ebiamo ebinji, okhwola mwitsul'le lisabo yili khumwesi kwokhuranga buli muhika.

⁶Khulwa amatukhu kane nakataru okhwola mulitsenje omukaati okuralimwo amamela ne khwitukhu liakhane nakhataru mubetsenje nende lisabo liokhuhelesia OMWAMI oluyali.

⁷Khulwamatukhu kane nakataru muraliakhwo omukaati okutekhelwe nende amamela tawe; amamela kosi nohomba omukaati okulimwo amamela kurabbakhwo musibala sienywe tawe.

⁸Olwe lisabo liba nilichiakanga, mwinoosie abasiani benywe mbu mukholanga yaka kosi khulwo khwitsul'la ako MWAMI yamukhol'la olwa mwarula Emisiri.

⁹Lisabo yili liakhabe esitsusio khu inywe singa esindu sibohelwe khumukhono kukwo nohomba khubweni bubwo mbu witsul'lenje okhuribula lilako lio MWAMI. Okhuba OMWAMI yamuhinia Emisiri nobunyali bubwe obukhongo.

¹⁰Mwitsusie lisabo yili khunyinga yalio buli muhika.

¹¹“OMWAMI namuleere musibala sia Abakanaani, esiayesuha okhumuha inywe nende abakuka benywe. Olwa alisihaana khu inywe,

¹²okhwola muhaane siesiikulanda es'saatsa khu MWAMI. Siesikula nda es'saatsa siemiruko chienywe nesio MWAMI,

¹³nebutswa siesiikulanda esiepunda osisilaanie nende esimeme sielikondi. Ne norenya okhusilaania osifunake likosi. Khandi mununule siomusiani wambeli mubasiani benywe.

¹⁴Mumatukhu ketsanga, olwomusianiwo alikhureeba esifune sielisabo yili, olimukalusia mbu, ‘OMWAMI yarumikhila obunyali obukhongo okhukhuhinia Emisiri ahakhwalinji abasumba.

¹⁵Olwomuruchi we Emisiri yatinyia omwoyo kukwe ma nasuula okhulakhuula khutsie, OMWAMI yeera siesiikulanda es'saatsa, khumiruko nende khubandu musibala sie Misiri. Niko akachilanga nikhuhaana omusango kwa buli esikulanda es'saatsa siabuli muruko khu MWAMI, nebutswa khununulanga abasiani befwe bambeli.

¹⁶Lisabo yili nalibetsenje esitsusio khwinywe, singa esindu esibohelwe khumakhono kefwe nohomba khubweni bwefwe. Liakhakhwitsusie singa OMWAMI yakhuhinia musibala sie Misiri narumikhilanga obunyali bubwe obukhongo.’ ”

¹⁷Olwomuruchi we Misiri yalakhuula abandu ba Isiraeli okhutsia, Nyasaye siyabahil'la khunjila ehengele khunyanza okhutsia Filisiti tawe, kata olwa yali inyimbichiti. Nyasaye yaboola mbu, “Sinyenya abandu basukhanie amakani kabwe ma bukalukhe, Emisiri olwa bakhalola mbu kabahel'le okhwola balwane tawe.”

¹⁸Musilenje yisio yabahil'la khunjila yokhubotokhana okhubir'ra musitsiimi nehengele khunyanza Inzakhanyu. Abaisiraeli bali niberechekheye lihe nebilasan'nwe biabwe.

¹⁹Musa yabukula amakumba ka Yosefu natsian'nako singa obwa Yosefu yabool'la Abaisiraeli besuhe olwa yaboola mbu, “Olwa Nyasaye yakhamuhinie Emisiri, mulabukule amakumba kanje mulatsie n'nako okhurula hano.”

²⁰Abaisiraeli barula Sukotsi ma nibakhoma ekambi yabwe Etsumi khundulo khwesitsiimi.

²¹M'basu, OMWAMI yabemel'langa narumikhilanga esilo yelilumbesi okhubamanyia injila, ne mubutukhu yabemel'langa narumikhilanga esiilo yomul'lo okhubakhosisia obulafu kho babe abanyala okhuchenda om'basu nobutukhu.

²²Esiilo yelilumbesi yalinji imbeli wabandu khunyinga yom'basu, ne esiilo yomul'lo yalinji imbeli wabwe khunyinga yobutukhu.