Read lunyore OKHURULA 15 Bible Online

OKHURULA 15 - lunyore bible

OKHURULA 15

¹Ma Musa halala nende Abaisiraeli nibembela OMWAMI olwembo luno! “Namwembele OMWAMI, Sichila ye unyooye obulechi bwoluyali. Ufuubile etsisululi nende yabo abachilusianga munyanza.

²OMWAMI niye Omusooli wanje omukufu; niye owali okhusoola. Ye ni Nyasaye wanje, nase namufumie, ni Nyasaye wa papa wanje, ne nanyembe khukobukhongo bubwe.

³OMWAMI niye mwene mahe; OMWAMI nilio eliira lilie.

⁴“Yafuuba abasikari be Misiri nende amakaari kabwe munyanza; abasikari babwe abalahi berwa namaatsi mu Nyanza Inzakhanyu.

⁵Inyanza eyatsia olutungu yabafunikha, beyinikha mulutungu singa lichina.

⁶“OMWAMI, omukhono kukwo omusaatsa kuli netsingu tsiokhurisia; kufunakanga omusiku mubitonye.

⁷Mutsingufu tsiobukhongo bubwo, olekanga abasuku baabo; lirima lilio liatukhanga ma libasamba singa omukhuutsi.

⁸Wafuura khunyanza ma amaatsi nikekuula ikulu, kasinjila ikulu silunji singa lisisi; olutungu lwehasi heinyanza lwoma singa lichina.

⁹Omusuku yaboola mbu, ‘Nambalondel'le ma nambatiile; nangabukhanie emiandu chiabwe ma nambukule esianyenyanga; nanjomole olukanga lwanje ma nambukule biosi ebia bali n'nabio!’

¹⁰Nebutswa wahuutsa butswa omuya l'lala OMWAMI, ma Abaamisiri nibeer'rwa namaatsi; behinikha singa esibia mumaatsi amakali.

¹¹“OMWAMI, niwina khubanyasaye olikhwo singa ibe? Niwina owakhafwana n'nawe, owokhuchenyia mubutsienukhu? Niwina owakhakhola akamangalimwa, nende ebindu biokhuchenyia singa ibe?

¹²Wanyil'le butswa omukhono kukwo omusaatsa, ma liloba nilimila abasuku befwe.

¹³Mukhuba omusubilwa musiesuho sisio, wemel'la abandu baabo aba wanunula; mutsingufu tsitsio wabemel'la okhutsia musibala sisio esitsienukhu.

¹⁴Amahanga kahuliye ma katechelanga muburi; Abafilisiti bahambilwe noburi obukali.

¹⁵Abemeli ba Edomu bang'ang'aye; Abandu ba Moabu abetsingufu indenga ibahambile; abandu ba Kanaani bahweye tsingufu.

¹⁶Indenga nende oburi bubahamba. Balolanga tsingufu tsitsio, E OMWAMI, ma bangangala muburi, okhwola olwa abandu baabo bamal'le okhubira; abandu bawahinisie mubusumba.

¹⁷Obaleeranga ma obara khusikulu sisio, habundu ahe ibe OMWAMI, weyahul'la singa hango haho, Ehekalu ye ibe omwene wombokha.

¹⁸Ibe, OMWAMI, olabetsanga omuruchi inziayo!”

¹⁹Abaisiraeli bachenda hakari weinyanza singa abachendanga khwiloba eliomu. Nebutswa olwa amakaari ka Abaamisiri nende etsisululi tsiabwe nende abatsilusianga benjila munyanza, OMWAMI yakalusia amaatsi ma nikabafuunikha.

²⁰Omuroobi Miriamu, omukhaana wanga Haruni, yabukula amanyanga, ne abakhasi bosi bamulonda nibasasianga amanyanga kabwe nibasina.

²¹Miriamu yabembela mbu, “Mwembele OMWAMI, sichila khunyooye obulechi bwoluyali; ufuubile etsisululi nende abatsilusia munyanza.”

²²Nilwo olwa Musa yemel'la abandu ba Isiraeli okhurula khu Nyanza Inzakhanyu okhutsia Suru. Khulwa amatukhu kataru babir'ra hakari wesitsiimi ne sibanyoolakhwo amaatsi tawe.

²³Olwa boola habundu halangwanga Mara, sibaali abanyala okhunywa amaatsi kaho tawe sichila kali amalulu. Nisio esichilanga habundu yaho nihalangwa Mara[2]

²⁴Abandu bekaan'na Musa nibareeba mbu, “Khwitsa okhunywa sina?”

²⁵Musa yasaaya nomwoyo kwosi khu MWAMI ma OMWAMI namumanyia esitonye siomusaala esia yafuuba m'maatsi; ne amaatsi nikakaasa khulwokhunywa. Ebwene yiyo OMWAMI yabahelesia amalako kokhumenyela, khandi nabateemelayo.

²⁶Yababool'la mbu, “Nimuba nimwakhambulila kupu khulwokhukhola akali amalunji khu ise nende okhufumila amalako kanje, sindakhamuhekhwo esinyasio siobulwaye bwosi obwandahaana khu Bamisiri tawe. Ise nise OMWAMI, omuhonianga mubulwaye bwenywe.”

²⁷Ma niboola Elimu ahebitaho likhumi nabibili biali halala nemisaala amakhumi kane nakataru echiamasindu; habwene yaho bakhupa ekambi ahembi khumaatsi.