Read lunyore OKHURULA 16 Bible Online

OKHURULA 16 - lunyore bible

OKHURULA 16

¹Abandu ba Isiraeli bosi bachiaka oluchendo okhurula Elimu ma niboola musitsiimi sia Sini khwitukhu lielikhumi nakharano khumwesi kwakhabili okhurula nibarula Emisiri. Esitsiimi sia Sini sili hakari wa Elimu nende Sinai.

²Nibali musitsiimi yisio bamumuchil'la Musa nende Haruni,

³ma nibababool'la mbu, “Bwakhabeye obulahi OMWAMI alakhwir'ra Emisiri. Ebwene yila khwakhekhaye hasi nikhulia inyama inyinji nende okhulia ebiokhulia bindi biosi singa obwa khwakhenyele. Nebutswa mukhuleer're musitsiimi sino nimwenya khufwe khulwe inzala okhukhwiira.”

⁴OMWAMI nabool'la Musa mbu, “Luno nzitsanga okhubungulusia ebiokhulia okhurula mwikulu khwinywe mwesi. Abandu batsitsenje sielitukhu okhubunjelesia ebiokhulia ebibahel'le litukhu yilio lionyene. Munjila yiyi nzia okhubateema ndole nibaba nibalonda amebaalo kanje.

⁵Khwitukhu liakhasasaba babunjelesienje ebiokhulia hali khabili singa ebia babunjelesianga sielitukhu ma babitekhe.”

⁶Kho Musa nende Haruni nibabool'la Abaisiraeli bosi mbu, “Omukolooba kwaleelo mwitsa okhumanya mbu OMWAMI niye owamuhinia musibala sie Misiri.

⁷Mukamba tsuli namulola obulafu obukali okhumanyia OMWAMI ali n'nenywe. Uhuliye okhumumuchila khwenywe khuye yee, amamumuchilo kenywe koolanga khuye, sichila ifwe khuhesianga butswa amalako kaake.”

⁸Kho Musa naboola mbu, “OMWAMI niye owitsa okhumuhelesia inyama eyamwitsa okhulia mukolooba, nende emikaati eminji echiamwakhenya okhulia mukamba tsuli, sichila uhuliye amamumuchilo kenywe khuye. Olwa mumumuchilanga khu ifwe, mubetsanga nimumumuchilanga khu MWAMI.”

⁹Musa nabool'la Haruni mbu, “Bool'la Abaisiraeli bosi betse okhusinjila imbeli wo MWAMI sichila OMWAMI uhuliye okhumumuchila khwabwe.”

¹⁰Olwa Haruni yali nal'lomanga khumukanda kwa Baisiraeli kwosi, basukhana nibahenga enasitsiimi, nonoho obulafu obukali bwokhumanyia OMWAMI ali n'nabo bwalolekha mwilumbesi.

¹¹OMWAMI nabool'la Musa,

¹²“Mal'le okhuhul'la amamumuchilo ka Baisiraeli, obabool'le mbu eliuba niliakhayela betsa okhunyoola inyama yokhulia ne mukamba tsuli nabanyoole emikaati chiosi echiabakhenya. Nilwo olwa nabamanye mbu Ise OMWAMI nise Nyasaye wabwe.”

¹³Khumukolooba, ebisindu ebinji okhusila biayela ebinyala okhwitsusia ekambi yosi; ne mukamba tsuli eliime liali ndiamile okhubotokhana ekambi.

¹⁴Olweliime liali ndiakhakhamulukha, khwaliho nende ebindu ebipapale singa amalondo khwiloba khwesitsiimi. Biali singa amachina keifula.

¹⁵Olwa Baisiraeli babiloba sibabimanya tawe, ma nibareebana mbu, “Nisina yisi?” Musa nababoola mbu, “Yibi nebiokhulia ebio MWAMI amuhelesisie mulie.

¹⁶OMWAMI alachile siamulala khwinywe abunjelesie ebimuhel'le okhulia, ebihela etsikilo tsibili khubuli mulala khubeinyumba.”

¹⁷Abaisiraeli bakhola mbwo, abalala babunjelesia ebinji ne abandi nibabunjesia ebitu.

¹⁸Ne olwa babichela, banyoola mbu yabo abali nibabunjelesisie ebinji sibaali n'nabio ebiyombele esichelo tawe, ne yabo abali nibabunjelesisie ebititi sibali n'nabio ebilemu tawe. Buli mundu yali nabunjelesisie ebimuhel'le.

¹⁹Musa nababool'la mbu, “Omundu wosi arakhabibiikhakhwo okhwola mukamba tawe.”

²⁰Nebutswa balala mubo sibahuchil'la aka Musa yababool'la tawe, ma babiikhakhwo esitonye. Olwa mukamba kwoola, biali nibikwiye tsinyende ma mbihunyanga obukundu, ma Musa naba nelirima n'nabo.

²¹Buli mukamba, siomundu yabunjelesianga yibio ebimuhel'le; ne olwom'basu kwalulanga pa, ebialinji nibisikaye hasi biakhamulukhanga.

²²Khwitukhu liakhasasaba babunjelesianga ebiokhulia bihela esiakhabili singa babunjelesianga bulitukhu khumundu; etsikilo tsibili khubuli mundu. Abemeli bosi bomukanda beetsa nibabool'la Musa akene yako,

²³naye nababool'la mbu, “OMWAMI ulachile mbu mukamba nelitukhu litsienukhu eliokhuhuluukha eliahanwa khu MWAMI. Muteekhe siosi esia mwakhenya okhutekha. Ne siosi esiba nisisikala sibiikhwe sibeka ma silindibwe okhwola mukamba.”

²⁴Babibiikha okhwola litukhu elialondakhwo singa Musa yali nabalachile. Sibiayononekhakhwo nohomba tsinyende sitsiayinjilakhwomwo tawe.

²⁵Musa nababool'la mbu, “Mulie yibi olwaleelo, sichila leelo nelitukhu lie Sabato, litukhu liokhuhuluukha eliahanwa khu MWAMI, ne sinamunyoolekhwo ebiokhulia biosi esioba wekambi tawe.

²⁶Okhwola mubunjelesie ebiokhulia khumatukhu kasasaba nebutswa khwitukhu liakhane nakhataru, litukhu liokhuhuluukha, ebiokhulia sinabibekhwoho tawe.”

²⁷Khwitukhu liakhane nakhataru abandu abalala batsia okhubunjelesia ebiokhulia, nebutswa sibabinyoolakhwo tawe.

²⁸Ma OMWAMI nabool'la Musa mbu, “Abandu inywe, namusuule okhulonda amalako kanje okhwola lina?

²⁹Mwitsul'le mbu Ise, OMWAMI muhelesisie litukhu liokhuhuluukha, ne niko akachilanga khwitukhu liakhasasaba namuhelesinjie ebiokhulia ebihala amatukhu kabili. Siomundu yekhalenje ahelitukhu liakhane nakhataru limunyoola, ne ararulakhwo hangowe tawe.”

³⁰Kho abandu sibakholanga emilimo khwitukhu liakhane nakhataru tawe.

³¹Abandu ba Isiraeli balanga ebiokhulia yibio amana. Biali singa inzoli indititi indafu ne biali ebielungu singa ebibisikuti biobuukhi.

³²Musa naboola mbu, “OMWAMI ukhulachile mbu khulekhekhwo amana kandi kabiikhilwe tsinzibulo tsiefwe tsiamatukhu aketsanga kho babe abanyala okhulolakhwo ebiokhulia ebio MWAMI yakhuha mbu khulie nikhuli musitsiimi olwa yakhuhinia Emisiri.”

³³Musa nabool'la Haruni, “Bukula indabu otsukhemwo amana akahela etsikilo tsibili ma ore amana kene yako imbeli wo MWAMI kabiikhilwe tsinzibulo tsiefwe tsiamatukhu ketsanga.”

³⁴Singa OMWAMI yali nalachile Musa, nimbwo Haruni yakabiikha imbeli we Lisanduku lie Indakano, mbu kabiikhwe.

³⁵Abaisiraeli balia amana yako khulwemihika amakhumi kane okhwola olwa boola musibala sia Kanaani aha bali okhumenya.

³⁶(Ne esichelo esiali nisirumikhilwanga siali singa esimwelo sietsikilo amakhumi kabili.)