Read lunyore OKHURULA 17 Bible Online

OKHURULA 17 - lunyore bible

OKHURULA 17

¹Omukanda kwa Abaisiraeli kwosi kwarula musitsiimi sia Sini nikutsitsanga buli habundu ho MWAMI yali nabalachile. Bakhupa ekambi yabwe ha Refidimu, nebutswa amaatsi sikali habundu yaho tawe.

²Bekan'na Musa nibaboola mbu, “Khuhelesie amaatsi khunywe.” Musa nabakalusia mbu, “Nisina esichilanga nimwekana? Busina muteemanga OMWAMI?”

³Nebutswa abandu bali nende obuluho obwinji ma nibatsilil'la okhwekan'na Musa. Bamubool'la mbu, “Nisina esiachila nokhuhinia Emisiri? Wenyanga okhwira ifwe halala nende abaana befwe nende emiruko chiefwe, khulwo okhukhwima amaatsi?”

⁴Musa yalakaya butinyu khu MWAMI naboola mbu, “Nakhole mbwena abandu yaba? Bali ahembi okhundasa amachina.”

⁵OMWAMI nabool'la Musa, “Bukulakhwo balala khubemeli ba Isiraeli wemele n'nabo imbeli. Khandi obukule indabusi eyawarumikhila okhutiaba khumuchela kwa Naili.

⁶Nzia okhusinjila imbeliwo khulwanda oluli khusikulu sia Sinai. Okhupe khulwanda ne amaatsi ketsa khurulamwo akabandu beetsa khunywa.” Musa yakhola mbwo imbeli wabemeli ba Isiraeli.

⁷Habundu tsana hakulikhwa Masa nende Meriba[3], sichila Abaisiraeli bekaana ma nibateema OMWAMI olwa bali khureeba mbu, “OMWAMI ali hakari hefwe nohomba tawe?”

⁸Abaamaleki beetsa nibaseera Abaisiraeli olwa bali Refidimu.

⁹Musa nabool'la Yoshwa mbu, “Toolakhwo abandu balala nabatsie okhulwana lihe na Abaamaleki mukamba. Ise nasinjile khubutenje bwesikulu nindil'le indabusi yo MWAMI yambool'la mbukule.”

¹⁰Yoshwa yakhola singa Musa yamulaka ma natsia okhulwana lihe nende Abaamaleki, olwa Musa nende Haruni nende Huri batsia khubutenje bwesikulu.

¹¹Buli lwosi olwa Musa yachinganga amakhono kaake Abaisiraeli banyoolanga obulechi nebutswa olwa yakaretsanga hasi, Abaamaleki ne bachiaka okhubaleka.

¹²Olwa amakhono ka Musa kachonya, Haruni nende Huri baleera lichina mbu yekhalekhwo nabo nibasinjila elubeka nelubeka okhuletel'la amakhonoke nibakatila okhukol'lokha ikulu okhwola olweliuba liyela.

¹³Munjila yiyi Yoshwa yaleka Abaamaleki.

¹⁴Ma OMWAMI nabool'la Musa mbu, “Handika amang'ana kosi niwinoosianga akobulechi yibu, kho kabe akokhwitsul'lwa. Bool'la Yoshwa mbu namulule Abaamaleki bosi.”

¹⁵Musa yombokha olusambwa ma nalukulikha mbu, “OMWAMI niye ependela yanje.”

¹⁶Ma naboola mbu, “Muchinge ikulu ependela yo MWAMI! OMWAMI natsilil'le okhulwana Abaamaleki inziayo!”