Read lunyore OKHURULA 18 Bible Online

OKHURULA 18 - lunyore bible

OKHURULA 18

¹Kukanyene Musa Yetsero, omwesaalisi wa Midiani yahul'la kosi aka Nyasaye yali nakholeye Musa nende abandu ba Isiraeli olwa yabahiinia Emisiri.

²Kho Yetsero niyetsa khu Musa namuler'ranga omukhasiwe Sipora owa Musa yali niyalekha inyuma,

³halala nende abasiani ba Sipora babili, Gerishoni nende Eliasa. (Musa yali niyaboola mbu, “Ise ndali nindamenyibwa musibala esicheni”; kho yali niyakulikha mulala khubasiani babe Gerishoni[4].

⁴Khandi yali niyaboola mbu, “Nyasaye wa papa wanje yali okhukhonya ma niyasoola mbu ndekhe okhwirwa nomuruchi we Misiri”; kho yamala nakulikha omusiani we undi Eliasa[5].)

⁵Yetsero yetsa halala nomukhasi wa Musa nali nabasianibe babili musitsiimi aha Musa yali nakhupile ekambi hasikulu esitsienukhu.

⁶Yali narumanisie ling'ana khu Musa mbu beetsanga,

⁷Kho Musa yatsia okhumubukan'na namwinamila ma namutsunzuna. Bareebana akobulamu bwabwe ma nibatsia mwiheema lia Musa.

⁸Musa yabool'la Yetsero kosi ako MWAMI yali nakhol'le khumuruchi nende abandu be Misiri khulwo okhununula Abaisiraeli. Khandi yamubool'la obutinyu obwabandu bakaana n'nabwo khunjila nende obwo MWAMI yali nabasool'le.

⁹Olwa Yetsero yahul'la yaka kosi yasangala

¹⁰ma naboola mbu, “OMWAMI afumibwe owakhusoola ibe okhurula khumuruchi nende khu Bamisiri! OMWAMI afumibwe awali okhununula abandu okhurula mubusumba!

¹¹Luno manyile mbu OMWAMI nomukhongo okhuyomba abanyasaye bandi bosi sichila yakhola yaka olwa Abaamisiri bachiayilisia Abaisiraeli.”

¹²Ma Yetsero naleera omusango okwokhusambwa omuchima nende emisango chindi chiokhuhanwa khu Nyasaye; ne Haruni halala nabemeli ba Isiraeli bosi batsia halala nende Yetsero okhulia esiokhulia siomusango singa omulukha kwokhwekayakaya Nyasaye.

¹³Litukhu elialondakhwo Musa yali nakhalachilanga abandu emise ma nafulukhana okhurula mukamba tsuli okhwola olweisi yamwaama.

¹⁴Olwa Yetsero yalola, kosi aka Musa yakhola yamureeba mbu, “Nimang'ana sina yaka kosi akokhol'langa abandu? Busina okholanga yaka wenyene, ne abandu nibasinjiye hano okhurula mukamba tsuli okhwola isi nemwaama nibenyanga obakhonye?”

¹⁵Musa namukalusia mbu, “Okhwola khole mbwo sichila abandu beetsanga khu ise nibenyanga okhumanya akobulalilo bwa Nyasaye.

¹⁶Olwabandu babili basolananga, beetsanga khu ise nase mbamanyie niwina khubo oli habwene, ma mbabool'le aka Nyasaye yenyanga nende amalako kaake.”

¹⁷Ma Yetsero namubool'la mbu, “Siokakholanga munjila yahabwene tawe.

¹⁸Wiitsa okhuchonya khandi abandubo yaba beetsa okhuchonya. Yaka kakhuyombele okhukakhola wenyene.

¹⁹Luno lekha khwibaal'le injila indahi, ne Nyasaye yetsa okhuba n'nawe. Nakahabwene ibe okhukobokhela abandu imbeli wa Nyasaye nende okhuhaana oburambane bwabwe khuye.

²⁰Obebaal'le amalako ka Nyasaye ma obenoosie singa obwa bakhoyele okhumenya nende akabakwana okhukhola.

²¹Nebutswa okhumeeta khukene yako, weele abandu bobuchesi ma obemekhe babe abemeli babandu: babe abemeli babandu etsielefu, etsimia, amakhumi karano, nende amakhumi. Okhwola babe abandu abaritsanga Nyasaye, abanyala okhusubilwa khandi abaranyala okhuhuchil'la ebihetso.

²²Abene yabo barumikhe singa abakhalachi bemise chiabandu tsinyinga tsiosi. Banyala okhuleera khuibe emise chiosi emitinyu, nebutswa bo abene banyala okhukol'losia oburambane obutititi. Yako nakakhwanguhile sichila nabakhukhonye emilimo.

²³Noba nokhola yaka, singa Nyasaye alakanga, siolachonya tawe ne abandu yaba bosi beetsa okhukalukha ingo wabwe oburambane bwabwe nibukol'losibubwe.”

²⁴Musa yahuchil'la lichetsiyio lia Yetsero

²⁵ma niyeela abandu abachesi okhurula mu Baisiraeli bosi. Yabemekha singa abemeli babandu etsielefu, etsimia, amakhumi karano, nende amakhumi.

²⁶Bakhola omulimo kwokhukhalachila abandu tsinyinga tsiosi nibaleer'ranga Musa emise emitinyu nebutswa nibakol'losianga oburambane butiti abene.

²⁷Ma Musa nasebula Yetsero ma Yetsero nakalukha ingowe.