Read lunyore OKHURULA 19 Bible Online

OKHURULA 19 - lunyore bible

OKHURULA 19

¹Khwitukhu liokhuranga khumwesi kwakhataru olwa Baisiraeli bali nibamal'le okhurula Emisiri, boola musitsiimi sia Sinai.

²Bali nibachend'e okhurula Refidimu ma nibool'le musitsiimi sia Sinai. Kho bamala nibakhoma ekambi yabwe ebwene y'yo hasikulu sia Sinai.

³Ma Musa niyanichila khusikulu okhutsia okhwakaana nende Nyasaye. OMWAMI nalanga Musa nali khusikulu ma namubool'la abool'le Abaisiraeli, abolwibulo lwa Yakobo mbu,

⁴“Mwali okhulola ake ise OMWAMI ndakhol'la Abaamisiri khandi singa obwa ndamubukula mumbaha tsianje singa inditsu echinganga ebiminywi biayo mumbaha tsiayo, ma nimuleera okhwola hano.

⁵Luno nimuba nimumbulile ma nimulonda indakano yanje, namube abandu banje. Esibala siosi nesianje, nebutswa inywe namube abandu banje abelwa,

⁶abandu bahanwa khu ise sienyene, ne namuurumikhile singa abesaalisi.”

⁷Kho Musa yaselenjera ma nalanga abemeli ba Baisiraeli halala ma nababool'la kosi ako MWAMI yali namubooleye.

⁸Abandu bosi nibakalusia halala nibaboola mbu, “Nakhukhole kosi ako MWAMI abooye,” ma Musa nabool'la OMWAMI akene yaka.

⁹OMWAMI nabool'la Musa mbu, “Nanzikhe khwinywe nindi mwilumbesi lisiro, kho mbu abandu nabambul'le nin'nomanga n'nawe, ma nabakhusubilenje okhurula olwaleelo.” Musa nabool'la OMWAMI akabandu bali nibabooye,

¹⁰ma OMWAMI namubool'la mbu, “Otsie khubandu ma obabool'le besiiye olwaleelo nende litukhu liamukamba niberechekhelanga okhwekayakaya. Okhwola basaabe tsingubo tsiabwe

¹¹ma berechekhe litukhu lianalilonde mukamba. Khwitukhu yilio nanzikhile khusikulu sia Sinai ahabandu bosi banyala okhundola.

¹²Ware olwakho okhubotokhana esikulu mbu abandu baralusiila tawe, ma obabool'le baranina esikulu nohomba kata okhwesunda ahembi khusio tawe. Omundu wosi naba naseena esilenjesie khusikulu okhwola yerwe;

¹³okhwola alaswe namachina nohomba yerwe netsisele, omundu wosi naramutil'lekhwo tawe. Kano nakekhole khubandu nende khumiruko; okhwola biosi birwe. Nebutswa olwolwika luba nilukhupilwe, nilwo olwa abandu banyala okhwanichila khusikulu.”

¹⁴Ma Musa naselenjera okhurula khusikulu ma nabool'la abandu berechekhe okhwekayakaya. Kho basaabe tsingubo tsiabwe,

¹⁵ma Musa nababool'la mbu, “Mwerechekhe khwitukhu elilonda mukamba ne omundu arabbakhwo nomukhasi okhwola olwene yilwo tawe.”

¹⁶Khumukamba kwelitukhu liakhataru, khwaliho nende ikhupa nende tsimbeni nende lilumbesi lisiro khusikulu ma okhwanukha khwolwika okhukali nikhuhul'likha. Abandu bosi mukambi batechela khulwo oburi.

¹⁷Musa yabemel'la okhurula mukambi okhutsia okhwakaana nende Nyasaye, ma nibasinjila hasikulu.

¹⁸Omwosi kwetsula khusikulu sia Sinai siosi sichila OMWAMI yali niyekhele khusio mumul'lo. Omwosi kwatuuma nikuhenga mwikulu singa omwosi okutuumanga khusitioli esikali ma abandu bosi nibatechela obutinyu.

¹⁹Okhwanukha khwolwika khwameetekha okhuba okhukali okhusila. Musa yal'loma, ne Nyasaye namukalusia nomuhukumo omukali.

²⁰OMWAMI yekha khusikulu sia Sinai ma nalanga Musa okhwanichila khubutenje bwesikulu. Musa yanichilayo

²¹ma OMWAMI namubool'la mbu, “Selenjera hasi ma okaye abandu balekhe okhukhalania olwakho okhwitsa okhumenga m'moni; nibakhola mbwo, abenji khubo bakhafwa.

²²Kata abesaalisi ababetsanga ahembi khu ise okhwola besiiye abene khase ndakhabaha esinyasio.”

²³Musa nabool'la OMWAMI mbu, “Abandu sibanyala okhwanichila yino tawe. Sichila ibe wakhulaka mbu okhwola khumanye mbu esikulu nesitsienukhu ma khware olwakho okhusibotokhana.”

²⁴OMWAMI namukalusia mbu, “Selenjera hasi ma witse nende Haruni. Nebutswa abesaalisi nende abandu bosi barasiilakhwo olwakho okhwitsa khu ise tawe, khase ndakhabaha esinyasio.”

²⁵Musa yamala naselenjera ahabandu bali ma nababool'la ako MWAMI yali nabooye.