Read lunyore OKHURULA 21 Bible Online

OKHURULA 21 - lunyore bible

OKHURULA 21

¹“Haana amalako kano khu Baisiraeli.

²Niwakhakula omusumba Muheburania, akhurumikhile khulwemihika chisasaba. Khumuhika kwakhane nakhataru abe omulakhuule sila okhurungakhwo esindu siosi.

³Nikali siyali niyateesia olwa yachaaka okhuba omusumbawo tawe, akhoya okhutsia sila omukhasi olwaba nakhurulangakhwo; nebutswa nikali yali niyateesia olwa yetsa okhuba omusumba, atsie nomukhasi uwe.

⁴Nikali omwamiwe yali niyamuhelesia omukhasi ma omukhasi tsana niyamwibul'la abaana abasiani nende abakhaana, omukhasi uyo nende abaana baabe basikal'le omwami uwe, ne omundu uyo atsie sila esindu.

⁵Nebutswa omusumba naba naboola mbu wayanza omwami uwe, nomukhasiwe, nende abaanabe ma siyenya okhukholwa omulakhuule tawe,

⁶kho omwami uwe amuhile habundu hokhwekayakayila. Habwene yaho amusinjisie hamuliango noho khumatilwa ma afutule esirwisie. Ma omundu uyo alaba omusumba uwe amatukhu kosi.

⁷“Omundu niyakhakusia omukhaana uwe singa omusumba, omukhaana uyo sialakholwa omulakhuule singa abasumba basaatsa tawe.

⁸Naba nakusibwa khumundu owakhenya okhumukhola omukhasi uwe, nebutswa naba naramuyanzisia, kho omukhaana uyo akusibwe khandi khusamwana, omwami uwe sanyala okhumukusia khubandu abamenyibwa tawe, sichila umukholeye obubi.

⁹Omundu naba nakula omusumba mukhaana okhuhelesia omusiani uwe, amubukule singa omukhaana uwe wayebula.

¹⁰Omundu naba nateesia omukhasi wakhabili okhwola atsilil'le okhuhelesia omukhasi wokhuranga ebiakhulia nende tsingubo nende kosi akamukhoyanga singa obwa yamukhol'langa olwokhuranga.

¹¹Naranyala okhuhesia amang'ana yaka khumukhasi uwe wokhuranga, okhwola amukhole omulakhuule ne aranyoolakhwo omurungo kwosi tawe.

¹²“Omundu wosi owakhakhupa owasie ma amwire, okhwola omundu uyo yerwe.

¹³Nebutswa nikakhaba mbu namarabba ne sachomelenje okhumwira tawe, anyala okhwilukhila habundu he Ise nzia okhumumanyia ne ebwene yiyo alaba mumulembe.

¹⁴Nebutswa olwomundu ahambwanga nelileko ma yeere owasie khulwo okhuchooma, okhwola omundu uyo yerwe kata niyakhelukhila khulusambwa lwanje khulwokhwehonokosia.

¹⁵“Omundu naba nakhupa samwana nohomba nyina okhwola yerwe.

¹⁶“Wosi owakheeba omundu okhutsia okhumukusia noho okhumukhola omusumbawe okhwola yerwe.

¹⁷“Omundu wosi owakhalaka samwana noho nyina esilaamo siobubi okhwola yerwe.

¹⁸“Abandu nibaba nibasolana ma mulala akhupe oundi nelichina noho neingumu nebutswa abule khumwira, arahebwa esinyasio tawe. Omundu oba nakhupilwe niyakhakona musitanda,

¹⁹nebutswa olunyuma abe onyala khubuukha ma achende esioba niyetilanga elabusi, omundu wamukhupa uyo okhwola amurunge khulwe inyinga yakosibwa ma amutende okhwola olwomundu wasaalisibwa uyo yakhahona.

²⁰“Omundu naba nabukula indabusi ma achikhupile omusumbawe omusaatsa nohomba omukhasi, ma omusumba tsana afwe habwene nahabwene, omwami uyo okhwola ahebwe esinyasio.

²¹Nebutswa omusumba uyo narakhafwa khwitukhu yilio noho eliakhabili, omwami uyo salahebwa esinyasio tawe. Omwandu kukwe okwayakhaba nakosisie nesinyasio khuye omwene.

²²“Abandu nibaba nibakhupananga ma basaalisie omukhasi oli nda ma omwana arule ne omukhasi uyo sasalisibubwekhwo habundu handi hosi tawe, omundu oba namusaalisie okhwola arunge siosi esiomusaatsa womukhasi uyo yakhenya ma abakhalachi nibasanjilekhwo.

²³Ne nikakhaba omukhasi uyo usalisibwe habundu handi hosi, kho esinyasio silaba obulamu khubulamu,

²⁴imoni khumoni, elino khulino omukhono khumukhono, esilenje khusilenje,

²⁵okhusambwa khukhusamba, lifumire khwifumire, olukuma khulukuma.

²⁶“Omundu naba nakhupa omusumba uwe omusaatsa nohomba omukhasi ma omusumba uyo akosie indol'lo yiye, okhwola amukhole omulakhuule singa omurungo kweimoni.

²⁷Naba namutuya ma elino ndikhulikha okhwola akhole omusumba uyo omulakhuule kube singa omurungo kwelino.

²⁸“Ing'ombe niyakhafumira omundu wosi omusaatsa nohomba omukhasi nolwika ma emwire, ing'ombe y'yo elaswe namachina, ne inyama yayo eralibwa tawe; ne mweneyo arahebwa esinyasio tawe.

²⁹Ne nikakhaba ing'ombe yiyo yali niyanala okhufumira abandu ne mweneyo niyamanyibwa ne siyachiboha tawe; ma nefumira omundu ma emwire, ing'ombe y'yo elaswe amachina ne mweneyo khandi yerwe.

³⁰Nebutswa mweneyo naba nahuchil'lwa okhurunga esindu khulwo okhuhonia obulamubwe, okhwola arunge siosi esienyekhanga.

³¹Ing'ombe neba niyira omusiani nohomba omukhaana, amalako amatelwa yaka karumikhilwe.

³²Ing'ombe neba niyira omusumba musaatsa nohomba omukhasi, mweneyo arunge omwami womusumba uyo etsisilingi amakhumi kataru, ne ing'ombe tsana yirwe namachina.

³³“Omundu naba nafuunula obuko nohomba nayaba obuko narabufuunikha tawe ma ing'ombe noho epunda ekwe mubuko yibwo,

³⁴okhwola mwene buko yibwo arunge omuruko yikwo. Okhwola arunge amapesa khumwenekwo ma omuruko kufiye yikwo kumusikal'le.

³⁵Ing'ombe yomundu neba niyira eyomundu undi, abandu babili yabo bakusie ing'ombe inamu yiyo ma bakabane amapesa kayo. Khandi bakabane inyama yeing'ombe efwiye.

³⁶Nebutswa nikali kamanyikha mbu ing'ombe y'yo yanala okhufumira etsindi ne mweneyo naratsiboha tawe, okhwola arunge ing'ombe inamu khungombe efwiye nebutswa anyala okhubukula ing'ombe efwiye.