Read lunyore OKHURULA 22 Bible Online

OKHURULA 22 - lunyore bible

OKHURULA 22

¹“Omundu niyakheeba ing'ombe nohomba likondi ma yeere nohomba akusie, okhwola arunge tsing'ombe tsirano khulwe ing'ombe ndala eyayebela ne amakondi kane khwikondi elala elia yebele.

²“Omwibi niyakhanyoolwa nafunakanga inyumba mubutukhu ma yerwe, omundu oba namwira sali nesikha siobwiri tawe.

³Nebutswa nikakhekholekha m'basu, uyo owir're ali nesikha siobwiri. [

⁴Okhwola arunge, esia yebele. Narali nesindu, okhwola akusibwe singa omusumba khulwo okhurunga esia yali niyebele. Ne omuruko okuba nikwibilwe yikwo, kata ebe ing'ombe, nohomba epunda kata likondi, nikuba nikunyoolekha nikuli omulamu hango hahe, alarunga emiruko chibili khumulala.]

⁵“Omundu niyakhalakhuula tsing'ombe okhwaya musikuuri nohomba m'mukunda kwemisabibu ma tsibire olwakho ma tsilie ebiraakwa ebikhulanga m'mukunda kwomundu undi okhwola arunge ebiraakwa biliywe yibio nende ebiraakwa ebili m'mukunda kukwe kwobuswache nohomba okwemisabibu.

⁶“Omundu niyakhahambia omul'lo m'mukunda kukwe ma nikulanda okhubir'ra mumabibi nikutsia m'mukunda kwomurende ma nikusamba obuswache obukhulanga nohomba obwacheswa ma bwabunjikhwa, kho uyo owahambia omul'lo okhwola arunge obuswache obusambilwe.

⁷“Omundu naba nahuchil'la okhubiikhila omundu undi amapesa nohomba emiandu chindi chiosi ma emiandu yichio chiibwe okhurula munyumba yiye ne omwibi wibile nanyoolekha, omwibi uyo akhoyele okhurunga emiandu yichio esiakhabili.

⁸Nebutswa omwibi uyo naranyoolekha tawe, omundu wabiikha emiandu yichio aleerwe habundu hokhwekayakayila ma habwene yaho yesuhe mbu siali niye oweeba emianduchiomundu uyo tawe.

⁹“Mubuli ling'ana liosi eliokhufunana emiandu, libe eliokhufanana tsing'ombe, etsipunda, amakondi, tsingubo nohomba esindu sindi siosi esikor're, abandu babili yabo abafunananga emiandu yichio bahilwe habundu hokhwekayakayila. Uyo owa Nyasaye naboole mbu ali nesikha yetsa okhurunga hali khabili khumundu wabafunananga n'naye.

¹⁰“Omundu niyakhahuchil'la okhwechekhwa epunda yomundu, nohomba ing'ombe nohomba likondi nohomba omuruko kundi kwosi, ne omuruko yikwo nikwakhafwa nohomba nikusalisibwa nohomba ngwakhabukulwa mubulwani ne ngubula omukobokheli khuko,

¹¹kho kakhoyele omundu wechekhwa okhutsia habundu hokhwekayakayila ma yesuhe mbu siyayiba omuruko kwomundu uyo tawe. Nikakhaba omuruko sikwali okhwibwa tawe khe mwenekwo ahuchil'le okhurulakhwo butswa ne owechekhwa satakha okhumurunga tawe;

¹²nebutswa nikakhaba omuruko kwali nikwebwa, owechekhwa okhwola arunge mwenekwo.

¹³Nikakhaba mbu kwerwa nende tsinyama tsiomubulimo, owechekhwa aleere ebiimo bisikaye singa obukobokheli; sakhoya okhurunga esierwa netsinyama tsiomubulimo.

¹⁴“Omundu niyakhakopa omuruko okhurula khumundu undi ma omuruko yikwo nikwakhasaalila nohomba nikwakhafwa, omwenekwo naraliho, owakukopa uyo okhwola akurunge.

¹⁵Nebutswa yako nikakhekhola omwene muruko naliho owakukopa satakha okhukurunga tawe. Ne nikuli omuruko okwomundu yahaana amapesa khulwo okhukurumikhila, kubal'lwe mumapesa akahanwa khulwo okhukurumikhila.

¹⁶“Omundu naba naselela omukhaana osili omuchima khandi osili okhuhambwa ma naba n'naye, okhwola amukhwe ma amuteesie.

¹⁷Nebutswa samwana omukhaana uyo naba niyakhasuula mbu omundu uyo sateesia omukhaanawe, okhwola arunge samwana amapesa akahelana nende ikhwe yomukhaana osili omuchima.

¹⁸“Mwire omukhasi wosi ofuubanga obusula.

¹⁹“Mwire omusaatsa wosi okholanga omuruko okhuba omukhasi.

²⁰“Mwire omundu wosi ohaananga omusango khu nyasaye undi wosi orali ise, OMWAMI.

²¹“Orakhol'la omundu wamenyibwa obubi nohomba okhumusandia tawe, mwitsul'le mbu mwali abarende abali nibamenyibwa Emisiri.

²²Murakhol'la omulekhwa kata omubisandu obubi tawe.

²³Nimubakhol'la obubi Ise OMWAMI ndabahulila olwa bandakayila okhubakhonya,

²⁴ne ndakhaba nelileko ma nimwir'ra mwihe. Abakhasi benywe balasikala abalekhwa ne abandu benywe balabula abasamwana.

²⁵“Nimwakhakopia amapesa khumundu wanje wosi oli omumanani, murabba singa abahambia libere ma mubanze okhuhebwa injelesia tawe.

²⁶Nimwakhabukula ingubo yomundu wosi ebe singa omusingo mbu nakhurunje, okhwola omukalusisie eliuba nisili okhuyeela,

²⁷sichila niyo eyayefunikhanga okhumulinda obusindu. Nisindu sina sindi esia yakhefunikha? Olwa yakhandakayila niyenyanga obukhonyi ndakhamuhulila sichila ise ndi owetsimbabasi.

²⁸“Oranyeka Nyasaye tawe, kata oralaama esilaamo siobubi khumwemeli wabandu benywe tawe.

²⁹“Mumban'ne ebihanwa okhurula khubuswache bwenywe, khuwaini yenywe nende khumafura kemiseituni olwa bilabile. “Muhaane khu ise abasiani benywe bambeli.

³⁰Mumbelesie ebibulwa biambeli bietsing'ombe tsienywe nende amakondi. Esibulwa siambeli es'saatsa simenye nende nyina wasio khulwa amatukhu kane nakataru, ne khwitukhu lia munane, musihaane khu ise.

³¹“Inywe muli abandu banje, kho muraliakhwo inyama yomuruko kwosi okwir'rwe netsinyama tsiomubulimo tawe, nebutswa muhaane inyama y'yo khutsimbwa.